Атюрьевскяй районца «Мокшень правдать» кельгсазь и учендсазь

Васенце васедемась ётафтовсь Атюрьевскяй райононь администрацияса.

Райононь оцюнять заместителец Н.С.Шаронов азозе, што национальнайть мархта сотф кизефкснень синь кирдьсазь башка контроль ала. Районца тянь коряс лама тиендеви оцю и цебярь тевда. Панчсевихть туристическяй маршрутт, ваймосемань зонат. Национальнай койхне-обуцятне районца пяк козят, мялень салайхть. «Мокшень правдати» ули мезе колгаст сёрмадомс.

О.В.Евдокимова лятфтазе, што тяни моли «Мокшень правдати» сёрматфтомась. Велеряйхне тяштьфнихть газета аф кальдявста. А вов бюджетнай организациятне, коза сувсихть велень администрациятне, школатне, библиотекатне, аф фалу мушендыхть ярмакт «Мокшень правдань» сёрматфтомс.

—Сявсаськ кизефксть кеме контроль алу,—мярьгсь Н.С.Шаронов.—Афкукс минь райононьке пильгонек-прянек мокшень. Мокшетненди эряви морафнемс эсь газетасна, цебярьста содамс кяльснон, литератураснон, культураснон.

Курташка велень средняй общеобразовательнай школаса О.В.Евдокимовати няфтезь музейснон, конань ули сертификатоц, официальнай статусоц. Музейсь пяк козя экспонатса. Синь азондыхть Курташка велень поселениянь велетнень, тястонь ломаттнень колга. Кочкафт экспонатт Курташкаста, Оброчнайста, Булдыгаста, Уразовкаста, Вольно-Никольскяйста и лия вастста. Ня велетнень эзда лиссь лама содаф ломаньда. Нят Советскяй Союзонь кафта Геройхне А.Г.Махров, Ф.Ф.Коновалов, Социалистическяй Трудонь геройсь Н.С.Маресина, генерал-майорсь Н.П.Мельников, лиятне. Музеи экспонатонь кочкамась ушедовсь пяк кунара. Васенце аськолкснень тя тевса тиезень историянь ингольдень учительсь Н.А.Ямщикова. Тоса тя тевть поладозе Н.Н.Сиркина. Ну и, конешна, азома сянь, што сембоса оцю путкссна директорть Н.И.Бурнашкинонь, завучть С.И.Чумаровать, Н.А.Пиксаевать. Тяда башка, Н.А.Пиксаева технологиянь урокса, кружокса тонафтсыне иттнень бисерть мархта работама, кодама, стама. Шабада тяни школаса аф лама, сембоц 53. Но школань коридоронь стенаса сняра казнедост, што сембе афи лятфтавихть. Нят васенце степенень диплопт, Почётнай грамотат, Благодарностть. Ули мезе няфтемс, мезьса шнафтомс пря.

А школань библиотекав «Мокшень правдань» главнай редакторть мархта васетькшнема пуромкшнесть учительхне. О.В.Евдокимова азондсь газетать колга. Кодама лопанят, рубрикат, уженят эсонза лисендихть. Учительхне азозь мокшень кяльса лисенди фкя и тяка газетать колга эсь мяльснон-арьсемаснон. Лама лямбе вал азсть «Мокшень правдать» колга школань директорсь, педагогическяй трудонь ветеранць Н.И.Бурнашкин, учительхне Н.Я.Алёнина, Т.М.Сорокина, М.Н.Алёшкина, Т.А.Маскайкина и лиятне.

Кяшалнясь (Духонькинась), Перевесьясь, Заграннайсь сувсихть Перевесье велень поселенияти. Тяса эряйхть мокшет и руст. Мокшетнень эзда ламотне сёрматфнихть «Мокшень правда». Корхтамась мольфтеви П.И.Мелишевать, А.Д.Кабаевать, М.В.Кабаевать и лиятнень колга.

—Газетась мялень салай сембе ширде, мазы,—азозе О.В.Евдокимовати связень отделениянь оцюнясь Л.В.Кузьминова.—Сяс велень поселениясонк сонь лама кельгидонза, сёрматфтыдонза. Оцю мяльса «Мокшень правдать» тяштьфнесазь и тяддеть омбоце пяленцты.

Тякось савсь кулемс и Перевесье велень основной общеобразовательнай школань учительхнень мархта васьфтемста. Кода азозе школань директорсь Е.С.Пугаев, учениктост аф лама, сембоц 26 шаба. Но синь мезьсовок аф лядондыхть райононь школатнень эзда. Примсихть участия районца и велеса ётафневи сембе илатнень эса. Улихть сатфкссна, казнесна.

Учительхнень мархта васьфтемста О.В.Евдокимова тяфта жа азондсь «Мокшень правдать» колга. А учительхнень эзда савсь кулемс газетать колга лама шнамань валда. Вов ни лама киза «Мокшень правдать» тяса сёрматфнесазь С.Н.Руськина, Т.И.Шукшина, Н.Е.Степанова и лиятне.

Лямбе васедема ётафтовсь и Кяшал велеса. Тяса шачсь и кассь лама содаф ломаньда. Нят А.С.Малькин, Ф.П.Девятаев, А.А.Аверясов, А.И.Карьгин, И.И.Поршин, ламотне лиятне. Кяшалсь—шачема велец и О.В.Евдокимовать. Кяшалса пяк лама «Мокшень правдань» сёрматфнида, кельгида. Нят А.М.Балашова, З.М.Кяльгина, Ф.А.Богданова, О.П.Чепайкина, И.Г.Сятишев и лиятне. Кепотьксонди, Ф.А.Богдановась газетаньконь морафнесы 60 лама киза. Васенда тяштьфнезе аляц, тылонь тружениксь, велень хозяйствань ветеранць А.Е.Общев. Газетаньконди цебярь ялгакс ульсь и мирдец В.С.Богданов, РСФСР-нь и Мордовскяй АССР-нь Заслуженнай учительсь. Тяни педагогическяй трудонь ветеранць эряй ськамонза. Тялоть тяддевок ётафтозе Саранскяйса, стиренц ширеса. Но «Мокшень правдать» мархта ашезь явонда мзярдовок.

Кяшалонь школасовок лама «Мокшень правдань» сёрматфнида. Нят Н.Г.Панькина, Л.П.Байчурина, Л.П.Очкина, П.В.Агутина, П.П.Агутина, лиятне. Тонафтыхнень мархта васьфтемста историянь учительсь П.М.Шабайкин кеподсь пяк эрявикс кизефкст. Фкясь синь эздост сотф А.С.Малькинонь кудонц ванфтоманц мархта. Кле, улель пара, кда эсонза панжеволь музей. Тяни лама корхтави туристическяй маршруттнень эряфс сувафтомаснон колга. Арьсекшневи панжемс туристическяй маршрут Стрельникова вели. А А.С.Малькинонь кудоц ащи кафтошка вайгяльбе ня васттнень эзда. Цебярь улель, кда сонга сувафтоволь тя маршрутти.

Сембе васьфтематне ётасть лямбоста, фкя-фкянь кулезь-шарьхкодезь. Синь эздост няевсь, што мокшень ломаттне кельгсазь эсь кяленьконь, мокшень газетать, пичедихть минценнеть, мокшеннеть ванфтоманкса. Финцне ни кенерсть сёрматфтомс «Мокшень правда». Пяк ламотне надияфтсть тиемс тянь маластонь шитнень. Кирдьсазь-аф валснон, няфтьсы пингсь.

И.Вешкин.

Последние новости

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги»...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

Национальный проект способствует развитию предпринимательской деятельности в Мордовии

Министерство экономики, торговли и предпринимательства РМ совместно с Центром...

В Мордовии строятся социальные учреждения

В рамках федерального проекта «Старшее поколение» национального проекта «Демография»...

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром «Мой бизнес» оказываетпомощь предпринимателям Мордовии, предоставляя различные меры государственной поддержки бизнесу республики. Так, в рамках национального...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги» ведется капитальный ремонт автодороги «г. Саранск – р.п. Ромоданова – с. Большое Игнатово» - с....

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...