16-19 августста Мордовияса ётафтовихть оцю мероприятият.
Нят: «Россиянь этнокультурнай лама ширесь: тя пингонь вызофне и касомань-вииямань перспективатне» финно-угорскяй нароттнень Всероссийскяй II форумсна, кона аноклаф марса Национальносттнень тевснон коряс Федеральнай агентствать мархта, и «Минь марсотама!» национальнай культурань од ломанень Всероссийскяй фестивальсь, кона ётафтови Культурнай инициативань Президентскяй фондть лезксонц вельде.
Мордовияв сайхть инжихть Россиянь 50 регионцта. Теест ётафтовихть экскурсият республикань содаф и мазы васттнень эзга.
«Россиянь этнокультурнай лама ширесь: тя пингонь вызофне и касомань-вииямань перспективатне» форумсь ушедови 17 августста, тяза сай 714 участник 37 регионцта. Оцю мероприятиясь торжественнайста панжеви И.М.Яушевонь лемса музыкльнай театраса. Тяса жа ётафтови форумть пленарнай заседанияц. А секциятне кармайхть работама Н.П.Огарёвонь лемса Мордовскяй госуниверситетса. Шиньберьф А.С.Пушкинонь лемса культурань и ваймамань паркса республикань эряйхнень и инжихнень кармайхть кеняртьфнемост региононь творческяй коллектифне, ётафтовихть «Тюштянь налксемат» и лия пялькстомат.
18 августста Советскяй площадьса ушедови «Минь марсотама!» национальнай культурань од ломанень Всероссийскяй фестивальсь. Сонь пингстонза кармайхть сисем оцю мероприятият. Васендакиге, тя Россиянь содавикс и ламотненди кельговикс творческяй коллектифнень арт-марафонцна. Тяза пуромихть тяфтама ансамбльхть кода Москуста «САДко» коллективсь, «Партизан FM» фолк-группась, Краснодарста «Скрыня» алянь коллективсь, Севернай Осетияста-Аланияста «Ритмы гор» морамань и кштимань ансамбльсь, Владимир ошста «Владимирские рожечники», Удмуртияста «Айкай», Башкортостанцта «Аманат», Донецкяй Народнай Республикаста «Донбасс», Дагестанцта «Гергибель» коллектифне и лият.
Сяда тов ётафтовихть «Масторланго» («Вселенная») этно-модань конкурссь, «Тев» народнай художественнай промыслань и ремеслань Межрегиональнай фестивальсь, коза сай 50-да лама машты кядь ломань странань 15 регионцта, «Бренд-2023» велетнень-ошнень брендонь фестивальсна, «Мордовия хлебосольная» гастрофестивальсь, «Время возможностей» творческяй инициативань Межрегиональнай фестивальсь-форумсь, «Поющее дерево» шуфтста керсиень фестивальсь и стак тов.
«Минь марсотама!» фестивалень ётафтома васттне: Советскяй и Сяськомань площаттне, Ленинонь и Толстоень лемса ульцятне. Сценась, кода и фалу, кармай ащема МР-нь Государственнай Собраниять каршеса, «Книжный мир» лавкаста сявомок Коммунистическяй ульцять эзга ладявихть национальнай подворьятне. «Тев» фестивалень площадкатне муйхть васта Толстоень лемса ульцяса. Советскяй площадьса, Ленинонь памятниконц маласта скверса, инжихненди ули кода варжамс Мордовиянь велень хозяйствань и продовольствиянь предприятиятнень продукцияснон.
Мероприятиятне ётафтовихть аф аньцек Саранскяйса, но и муниципалитеттнень эса, тяконь лувксса Торбеевскяй, Темниковскяй, Чамзинскяй, Атяшевскяй, Краснослободскяй и лия районга.
Ольга ЕВДОКИМОВА.