2000-це кизотнень ушетксста Москуса «Масторава» Мокшэрзянь общественнай организациять видеса эвондась морамань аф кржа ансамбль, тяконь лувксса и семейнайхть. Ётксост ульсть мокшеннетка: «Эх, мордовочка», «Колапань вайгяльхть» и лиятне. Эзост сувсесть мазы вайгяль мокшаватне, конатненди мзярда-бди удалась работамс «Келу» ансамбльса Георгий Сураевонь-Королёвонь мархта. Нят: Анна Сургаева, Анна Пиксайкина, Галина Будко. Москуса эрямстост синь ашесть ява моротнень мархта, пуроптозь перьфкаст мазы вайгяль аватнень-стирьхнень.
2014 кизоня Российскяй Федерациянь Президентть видеса Мордовия Республикать Постояннай Представительстванц Мокшэрзянь Культурань центранц видеса ушедозе творческяй эсь кинц «Азорава» фольклорнай ансамбльсь, конань руководителец Мордовия Республикань культурань Заслуженнай работниксь, мокшавась Анна Сургаева. Тняра кизоста мокшаватне аф весть арсесть Всероссийскяй ламоц конкурсонь и фестивалень лауреатокс. «Азоравать» «арзяц» козя кунардонь пингонь мокшэрзянь мороса, обрядовай сценкаса.
Тяддесь «Азоравати» юбилейнай—топоди 10 кизот сонь пуроптомстонза. Моли юбилейнай концертти анокламась, сяс январень ваймама шитневок арасть мокшаватненди творческяй тевда пяшксекс. Но аф аньцек репетициятнень мархта синь заняфт. Сире од кизонь карша, кепотьксонди, пуромкшнесть калядама и ащема куттнень (посиделки) пингста лятфтазь кунардонь койхнень, обуцятнень, морасть морот.
Тянь семботь кородозь ванфтсазь и содафнесазь тя козяшить мархта од поколениять.