Кода содаф, тяддесь Российскяй Федерациянь Президентть Владимир Путинонь Указонц мархта азф Отечествань аралаень кизокс. Миньцонк вятеви патриотическяй оцю работа. Культурань и искусствань учреждениятне виияфтсазь патриотическяй койхнень странань лама национальностень народть ваймоса и мяльса.
Кда корхтамс ся работать колга, кона вятеви республикать столицаса, эряви азомс: тяса васенце вастса ащи Саранскяень Централизованнай библиотечнай системань учреждениятнень работасна. Кода азозе ошень ЦБС-нь директорсь Мария Денисова: тяниень пингонь библиотекатне арасть стама учреждениякс, коса касфтовихть Россиянь афкуксонь патриотт.
Тяддеть ушедомста сявомок, ошень библиотекаса ётафтовсь патриотическяй лама мероприятия, конат лемтьфтольхть Отечествань аралаень шити, Тундань и Трудонь илати, Сяськомань шити, Россиянь и Россиянь Государственнай флагонь шитненди.
Кда корхтамс мекольце илать колга, эряви азомс: Саранск ошень библиотекатне 22 августста ётафтсть мялень салай лама мероприятия. Пингстост азондовсь Россиянь Государственнай флагть тиевоманц и сяда товолдонь историянц колга.
Минь справканьке: Государственнай флагонь шись васьфневи эрь кизонь 22 августста. Флагсь—тя государствань инь няевикс символ, кона пуроптсы эсь перьфканза народть. И сотнесыне кеме сотксса эсь ётковаст странань тяда ингольдень, тяниень и сай пинкнень.
Тяфта жа, кода мярьгсь Мария Денисова, оцю путкс Саранскяень библиотекатне сувафнихть республикань лама национальностень народть ёткса межнациональнай, межкультурнай и межрелигиознай сембе ширдень соткснень кемокстамаснонды. Тя тиендеви Мордовиянь поэттнень и писательхнень, культурань и искусствань деятельхнень, священнослужительхнень мархта васедематнень вельде. Саранск ошень библиотекаса тяфта жа сидеста ётафневихть специальнай военнай операциянь участникнень и ветераттнень мархта васедемат. Пингстост од лувихненди азондови, мес и кода эряви араламс Родинать.
Тяфта жа оцю работа Саранскяень библиотекатне вятихть региональнай национальнай компонентть пачфтеманкса. Тяниень пингть странаса и республикаса вятеви оцю работа марнек мирса содаф скульпторть Степан Эрьзянь шачема шиста 150 кизонь топодемать васьфтеманкса.
Тя илать лемс странаса и республикаса ётафтови лама мероприятия.
Владимир Нестеров.