24 октябрьста Саранскяйса, П.С.Кирилловонь лемса ошень Краеведческяй библиотекаса, ётафтовсь «Мокшень цёфкскятне азондыхть ёфкст» поэзиянь и прозань книгать презентацияц. Марстонь сборникти сонь кочкаец-пуроптыец республикань Заслуженнай писательсь Николай Голенков сувафтозень мокшень од поэттнень и прозаикнень Марина Агеевать, Оксана Белкинать, Оксана Долговать, Татьяна Зюзинать, Татьяна Кузьменкоть, Марина Лёвинать, Валентина Харитоновать, Наталья Чумбаевать и Елена Шиловать стихснон и азксснон.
Книгась лиссь 300 экземплярса «Издательскяй куд «Книга» издательстваса.
«Мокшень цёфкскятне азондыхть ёфкст» книгать презентациянц панжезе библиотекать заведующаец Нина Бояркина.
Сяльде эсь мялензон «Мокшень цёфкскятне азондыхть ёфкст» поэзиянь и прозань сборникть колга азозень Николай Голенков. Сон тяфта жа макссь оцю питне Марина Агеевать и лия авторхнень стихснонды, конат сёрматфт эсь «слогсост» и конатнень улихть синцень вайгяльсна, и арьсесь теест творчестваса сатомс од и няевикс сатфкст.
Эсь творчестванц колга пуромфненди азондсь поэтсь Марина Агеева. Сонь валонзон коряс, теенза малат философиять, ломанть, перьфпяльть, обществать колга и лия тематне, конат тяфта жа малат лувихнендивок.
Марина Фёдоровна пачфтезе пуромфненди: кле, курок сон кочкасыне стихонзон башка книгас. И лувозень пуромфненди кой-конатнень, конат печатлафт «Мокшень цёфкскятне азондыхть ёфкст» поэзиянь и прозань марстонь сборникса.
Сяда тов пуромфненди эсь творчестваснон колга азондсть и лувсть стихт и азкст блогерсь и поэтсь Оксана Белкина и прозаиксь Валентина Харитонова.
Аделавсь презентациясь «Мокшень крайняй, шачем крайняй…» мокшень мороса, конань содаф поэтть и драматургть Александр Пудинонь стихонзон лангс сёрмадозе композиторсь Василий Радионов.
Владимир ИОСИФОВ.