«ДаншиноFest» фестивальсь удалась

18 июньцта Пензенскяй областень Белинскяй райононь Даньшино мокшень велеса «Даньшино—Райское поместье» культурнай центраса келиста ётафтфоль «ДаншиноFest» V Всероссийскяй историко-культурнай фестивальсь.

Кода азозе Райскяй поместьять азороц, фестивальть арьсиец и меценатоц Н.Н.Пиксин, илас сашендсть представительхть Россиянь 15 регионцта: Москуста, Санкт-Петербургста, Пензенскяй областьста, Белгородста, Самараста, Саратовста, Ульяновскяйста, Тамбовста, Рязаньцта, Нижняй Новгородста, Туласта, Калугаста, Дагестан Республикаста, Кабардино-Балкарияста и Мордовияста. Аф кржаль оцю инжида. Ётксост МР-нь культурань, национальнай политикань и архивнай тевонь министрть васенце заместителец А.И.Карьгин, Пензенскяй областень культурань и туризмань министрть заместителец Ильдар Мавлюдов, Белгородскяй областень туризмать коряс Управлениять начальникоц Ия Подзолкова, МР-нь торговлянь и предпринимательствань министрть заместителец Марина Жулина, Пензенскяй областень региональнай виияфтомань Институтть ректороц Геннадий Белорыбкин и лиятне.
Илань аноклайхне старандасть тиемс стане, штоба няфтемс мокшэрзянь национальнай культурать мазышинц сембе ширде: кайгсть народнай морот, саласть сельмованф щапне-каряпне, кеняртьфнесть национальнай ярхцамбяльхне.
«Пензенская мордва III-XX веков. Археология и этнография»—тяфтама лем ала работась Даньшинаса Пензенскяй государственнай краеведческяй музейть передвижной выставкац, коста ульсь кода маласта содафтомс Пензань мокшэрзятнень сядынгольдень эряфснон мархта. Историяти мялень салай эсь лацонь экскурсиякс арась «Нароттнень и обряттнень колга» программась. Выставочнай площадкав сайхне пуромкшнесть кувака очередьс, штоба тифтемс фотографият Пензенскяй областьса эряй нароттнень традиционнай щамснон мархта.
Фестивалень инжихненди удалась варжамс аф аньцек мокшэрзянь, но и Сурскяй краень лия нароттнень ярхцамбяльснон, а стане жа касфнемс мяльснон шабра региоттнень эзда саф творческяй коллектифнень выступленияснон мархта. Синь ётксостольхть Мордовияста Г.И.Сураевонь-Королевонь лемса «Келу» фольклорнай ансамбльсь, Саратовста казачьяй и содаф моронь «Россы» театрась и «DagDance» кавказскяй кштимань ансамбльсь и ламотне лиятне.
Койс коре иласа келиста няфтьфтольхть Мордовиянь Рузаевскяй районць, а стане жа С.Д.Эрьзянь лемса изобразительнай искусствань музейть экспозициянза.
Кой-кит инжихнень ёткста оцю мяльса ванцть мокшендаса тюрематнень мельге, коса маштомошиснон няфтезь Тамбовскяй и Пензенскяй областень спортивнай клупне, а лиятне варчсезь вийснон мастер-класснень эса: тиендсть эсь кядьсост някат-оберект, сёвонень кукшеннят-месть, котцесть кептернят…
Фестивальс пуромфне, сядонга пяк сят, кит сашендсть Даньшинав васенцеда, пара мяльса тифнесть фотографият Райскяй поместьянь мазы перьфпяльть эшксса. Н.Н.Пиксин тиезе тя вастть афкуксонь ёфксонь уженякс. Аньцек аф фкя лацонь касыкста тяса сядот. Оцю паксява сетьмоста якайхть сярттне, зубратне, косулятне, верблюттне, сей-тов лиендихть беркуттне, филиттне, улихть нльне павлитт и индийскяй каркт. Николай Николаевич нолдась шачема-касома уженянцты од ваймопожф, казсь од эряф.
2021 кизонь Russian Event Awards событийнай туризмаса национальнай премиянь эксперттнень оценкаснон коряс «ДаншиноFest» Всероссийскяй историко-культурнай фестивальсь занязе I вастть «Культураса и искусстваса инь цебярь туристическяй событиясь (Населениясь 100000 ломаньц молемс)» номинацияса.
О.ЕВДОКИМОВА.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...