Даньшиноса няфтевсть тяниень пингонь мокшень и эрзянь щапне

Пензенскяй областень Белинскяй райононь Даньшино мокшень велеса лаказь лакай эряфсь. Бта аф кунара, июньцта, аньцек ётафтовсь «ДаншиноFest» историко-культурнай фестивальсь и вов ни аф оцю веленяса тага кочкавсть инжихть. Эрь кизоня августть песта тяса ётафневи «ДаншиноFashion» мокшэрзянь оцю модань няфтемань фестивальсь. Пензенскяй областьса эсь коллекцияснон няфтезь Мордовиянь кафта студиятне: «VARMA» этно-арт-театрась и «МАСТОРАВА» модань театрась.

Тяниень пингонь мазы щамда башка инжихненди аноклафоль оцю концерт, коза сувасть Мордовиянь и Пензань инь цебярь коллектифнень выступлениясна. Сембонь мяльснон салазе Старошайговскяй райононь Сире Теризморгань народнай хорсь, кона тядде сась Даньшинов васенцеда. Оцю выступления няфтсь «УМАРИНА» моронь и кштимань Мордовскяй государственнай ансамбльсь. Кизоста кизос фестивалень сембе оцю илатненди сашенды В.И.Ромашкинонь лемса «Торама» фольклорнай ансамбльсь. Спектакль-концерт няфтсь «МАРИВАННА» Пензань фолк-группась.
«Пензенская мордва III-XX веков. Археология и этнография»—тяфтама лем ала работась Пензенскяй государственнай краеведческяй музейть вастста вастс ётафневи выставкац. Няфтевсь Россиянь Фотохудожниконь и Россиянь Журналистонь союзонь членть Б.А.Тишулинонь «Даньшино—территория возрождения» выставкац. Шумордавсь сембось поздна илять этно-дискотекаса.
«Тяниень пингть од ломаттнень стака саламс мяльснон фольклорнай мороса и народнай коллективса, синь кельгсазь «шоуть». Тя фестивальть ётафнесаськ 2019 кизоста сявомок и лемдеськ тядязень колга мялямть ванфтоманц инкса. Сон пяк кельгозень мокшень щапнень, мокшень моротнень. Фалу кородозь ванфтсь минцень, мокшень культураньконь, коеньконь эса. Хуш мзяра киза ни аш шиса, а мокшэрзянь тяниень пингонь костюмонь няфтемань фестивальсь ётафневи эрь кизоня и кармай ётафневома сяда тов»,—мярьгсь «ДаншиноFashion-2022» фестивальть оргкомитетонц председателец, мокшалясь Николай Николаевич Пиксин.
Шумбракстомань валхт сембе инжихненди азсь Пензенскяй областень культурань и туризмань министрсь Сергей Вячеславович Бычков.
Илась кочкась лама ломаньда: кие тястонь—Даньшинонь, кие сась маластонь велеста, кие—Пензаста.
Анастасия Андреевна Кириллова ялганзон мархта сась Даньшинав Пяркино шабрань велеста.
«Пяк кеняртьфти, мес аймаксонк ётафневихть тяфтама оцю илат. Фалу пара мяльса сашенттама концертонь ванома»,— мярьгсь сон.
Сергей Николаевич Пиксин шачемас коре тястонь, но лама киза эряй Пенза ошса. «Фалу оцю таколдома мархта сашендан эсь шачема велезон. Старандан, коза сатнихть вийне, лездомс брадозти Николаенди. Лятфнеса идькс пингоньконь, мзярда веленьконь келес аватне якасть мокшень панарса, морсесть мокшень морот. Кеняртьфти, мес тячи сцена лангса минь няйсаськ ня койхнень. Эряви аф виздемс корхтамс эсь кяльсонк, катк лия нароттневок няйсазь козяшиньконь»,—мярьгсь мокшалясь.
тя оцю илать пингста кемокстаф культурнай соткснень коряс соглашения «ДаншиноFest» историко-культурнай фестивальть и Сире Теризморгань Национальнай культурань центрать ёткса. Тя корхтай сянь колга, што Даньшино велеса фалу кармайхть няфневома Сире Теризморгань центрать выставканза, кармайхть ётафневома марстонь илат, марса кеподеви этнотуризмась. И меколанкт, Сире Теризморгань эряйхненди няфтевихть Пензенскяй областень Даньшино мокшень велень койхне.
«Тячи Николай Николаевичень мархта путоськ кяденьконь кагодть лангс, коса сёрматф, што культурнай центраньке кармайхть вятема марстонь тефт мокшень культурать виияфтоманкса. Аф карматама учема кинь-бди ширде лезкс, а ушеттама тиема тефнень минць. Эста, улема, эрь аймакса, эрь велеса ули Даньшиноть лаца шкаень уженя»,—мярьгсь Сире Теризморгань Национальнай культурань центрать директороц Светлана Александровна Видясова.
Профессиональнай коллективда башка «ДаншиноFashion-2022» фестивальть сценанц лангста кайгсть велень самодеятельнай коллектифнень моросна. Тяса и няеви кунардонь и тяниень пингонь культуратнень ёткса соткссь. Даньшино велень мокшаватне Вера Акимовна Болотникова и Татьяна Фёдоровна Экомасова синць тяштихть и морайхть мокшень сиде моронят. Содайхть сире пингонь морот. Татьяна Фёдоровна ульсь велень клубонь заведующайкс. Коллективсна морсесь марнек Белинскяй районца. Тяни клубсна аш, но улихть «ДаншиноFashion-2022» фестивальть лаца илат, коса ули кода няфтемс Пенза аймаконь Белинскяй райононь мокшетнень культураснон козяшиснон.
О. Белкина.

Последние новости

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Президентть Посланияста

 Башка мяль Владимир Путин эсь Посланиясонза шарфтсь образованиять качестванцты....

Саранск встретил март «Весенней ярмаркой подарков» 

1 марта в столице региона, при поддержке Министерства экономики, торговли и предпринимательства Республики Мордовия и регионального Центра «Мой бизнес» открылась «Весенняя ярмарка подарков». Традиционно...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение» предусматривает профилактику развития данного диагноза у пациентов с высоким сердечным риском. Для достижения этой цели...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29 февраля 2024 года Послание Президента – это, по сути, программа развития страны, образ будущего, который выходит...