30 ноябрьста, Саранскяйса, Культурань республиканскяй Дворецть сценанц лангса, «Шумбрат, Мордовия!» Народнай творчествань XXVIII республиканскяй фестивальть-конкурсть мяльса кирдезь, эсь отчётнай концертснон няфтезь Инсарскяй и Рузаевскяй муниципальнай райоттне.
Концертс сайхненди ульсь кода ваномс ня кафта аймакнень декоративно-прикладной творчествань выставкаснон.

Тяддень фестивальсь-конкурссь лемтьф Россияса азф Семьянь кизоти и Мордовияса—Трудовой династиятнень кизоснонды, сяс отчётнай концерттнень пачк ётасть кафта ня тематне.
Инсарскяй муниципальнай районть выступлениянц ушедомста приветствиянь валхт азсь Инсарскяй райононь оцюнять заместителец, Инсарскяй райононь администрациять Социальнай работанц коряс Управлениять начальникоц Рауф Долотказин.
Отчётнай концертсь панжевсь прологса, коса примасть участия райононь кштимань и морамань коллектифне, тяконь лувксса «Мокшень правдать» пара ялганза—Мокшень Паёвка велеста «Поюня» народнай фольклорнай ансамбльсь и Кацятовста «Мокшаваня» Народнай хорсь. Мокшень аватнень-стирьхнень национальнай щамсна-карямсна аш ни кода лац мазоптозь сценать лангс лисихнень.
Эсь маштомошиснон няфтезь «Капельки», «Кнопочки», «Непоседы» кштимань коллектифне.
Сиде моронят лочазь лочась Исавелеста Миронофнень семейнай ансамбльсна.
«Катенька-стирнясь» мокшэрзянь народнай мороть моразе «Поюня» Народнай фольклорнай ансамбльсь, а Кацятовста «Мокшаваня» Народнай хорсь—Анна Асташкинать музыканц и валонзон лангс тяштьф «Анна» мороть.
Сценати лисендсь и специальнай военнай операциянь участникть цёрац Матвей Матвеев, кона аноклась ваныхненди «Музыкальнай момент» концертнай номер (композиторть А.Пивкинонь музыканц лангс).
Инсарскяй муниципальнай районть отчётнай концертоц ащесь комсь номерста. Эрь выступлениясь лац-ряц аноклафоль, арьсефоль. Родинати кельгомась, семьянь питнишитне, патриотокс улемась ащесть васенце вастса.
Сяда тов сценать лангса отчётнай эсь концертонц няфтезе Рузаевскяй муниципальнай районць.
Рузаевскяй муниципальнай райононь оцюнясь Александр Юткин мярьгсь, што районць вов ни 28-цеда няфтьсы творческяй отчётонц и кизоста кизос эвондакшнихть асу од ломатть, сценать лангса поколениятнень полафнесазь лиятне.
«Проводы в армию» рекрутскяй обрядсь аноклафоль Рузаевскяй райононь Палаевка, Болду и Левжа мокшень велетнень музыкальнай материалснон коряс. Няфтьфоль, кода инголи рекруткс—служама сявондезь удалаф цёратнень. И аф кафта-колма кизос, а мзярс синь шумбрат-тазат, мзярс сатыхть вийсна-эрьгасна.
«Вай, пакся, сокаень пакся» (моразе Огарёва велеста «Мокшаночка» Народнай фольклорнай коллективсь), «Пакся-пакся» (моразе Левжа велеста «Ару лихтибря» Народнай фольклорнай коллективсь), «Вай, тядяй» (моразе «Тяштеня» фольклорнай ансамбльсь) мокшэрзянь народнай моротне нинге весть няфтезь, што Рузаевскяй районца эряйхть мазы вайгяль мокшават, конатнень ёткса улихть и моронь ушедыхть, и вяри ювадихть!
Рузаевкаста А.В. Ухтомскяень лемса Культурань центраста «Парафраз» народнай коллективсь—народнай инструменттнень оркестрасна (руководителец Мордовия Республикань культурань Заслуженнай работниксь Анна Денисова, аноклась и лия коллектифнень мархта няфтсь концертнай несколька номер, конат пяк тусть ваныхнень мяльс.
Специальнай военнай операциянь участникть цёрац, Левжа велеста Артём Кочнев морафтозе «Посвящение отцу» эсь стихотворениянц.
Брянскяй партизаттнень мороснон моразе «Отрада» Народнай вокальнай ансамбльсь, «Храни, Господь, семью» мороть—Эдуард Маркарян, «Россия» мороть—концертонь сембе участникне. Залу озафне ламос цяпазь теест кядьснон!
Татьяна АЛЬШИНА.
Фототне Николай КАРАНОВОНЬ.