Газетасонк оцю мяльса пачфнетяма удалаф мокшаватнень колга, конат сафтсазь лама тевса. Маштыхть кштима-морама, пидема-панема, кельгсазь национальнай щапнень-каряпнень. Самай тяфтапнень ёткс сувси и Рузаевскяй муниципальнай районцта Любовь Костинась.
Любовь Павловна эряй Рузаевскяй райононь Мокшень Пишля велеса. Трудти кельгомась мокшавать ваймоса эвондась нинге шабакс. Шачемас-касомас коре сон тястоконь, Мокшень Пишлянне, семьясост сисем браттнень-сазорхнень ёткста ветецесь. Семьяснон ульсь кода путомс кепотьксокс лиятненди: эрясть ладязь, тядянь-алянь кулхцондозь, фкя-фкянди лезнезь. Куд пирьфсна пяшксель жуватада, конатнень мельге васенце якайхнельхть иттне, мзярс оцюфне заняфтольхть покодема вастса: алясна—Рузаевкань машина киса, тядясна—велень колхозса.
Кафксоце классть шумордамда меле Люба поступась тонафнема училищав. Содамошинкса ичкози якамс ашезь сав, Рузаевкань фкя училищась ульсь тязк, Мокшень Пишляса. Мокшень стирсь тонадозе «мастер-садовод» специальностть, конань коряс меле работась велень хозяйстваса. Мзярда колхозсь сёлговсь, ётась покодема велень клубу. 2004 кизоста сявомок Любовь Павловна работась Мокшень Пишлянь медпунктса санитаркакс. Тяни Любовь Костина пенсияса.
Мокшавась фалу кенерькшнесь и тянивок кенерькшни няфнемс прянц творчестваса, комсь ветие кизода ламос морси «Лихтибряня» народнай ансамбльса, кона пуроптф велень клубть видеса. Коса аньцек ашезь уленде коллективть мархта тя пингста! Седити пачкоди мороса Мокшень Пишлянь аватне и стирьхне кеняртьфнесазь аф аньцек эсь райононь эряйхнень, но и сидеста лисендихть республиканскяй сценать лангс. Ульсть и «Шумбрат, Мордовия!» Народнай творчествань республиканскяй фестивальса, «Шумбрат» национально-фольклорнай иласа.
Кода азозе Любовь Павловна, морсема ушедсь нинге колмоце класса. Школаса и училищаса морсесь ськамонза, хорса, улендсь илань вятикс. Морось занци оцю васта мокшавать эряфса. Сон и тевть лезды тиемс сяда курокста, и мяльть петьсы-кеподьсы. Седиень озафтома вастокс ащи Любовь Павловнанди мокшень нарядсь. Национальнай щамть фалу щашендсы оцю мяльса. Виде, колсеви мокшавать мялец сянкса, мес мокшень панарсь пцтай юмась стакшинь эряфстонк, мархтонза наряжакшневи аньцек илас, сцена лангс. А вдь нинге аф кунара велева мокшаватне эрь шиня якасть тяфтама нарядса.
Любовь Павловна—пяшксе эрьгада, сон весяла ломань, мархтонза корхнемста эстокиге кеподи мяльце. Мокшавась цебярь рьвя, кельги тядя и щава. Сонь кафта иденза и кафта уноконянза. Синь сидеста сашендыхть инжикс. Любовь Павловна каванякшнесыне синь эсь пидеф танцти ярхцамбяльса.
Уноконянзон эзда фкясь, Вика, «тусь щаванц киге». Стирнясь пяк кельгсы моронь морсеманц, сонь мазы вайгялец. Рузаевкаса ули «Тяштеня» идень эстетическяй воспитаниянь (национальнай культурань) центра. Вика сувси ся шабатнень ёткс, кит якайхть тоза. И «Тяштеняса» Вика морси морот. Сембода сидеста—мокшэрзянь, кунардонь, народнайхть. Мокшень Пишляса ламотне шарфнихть мяль, што мазы вайгяльсь, мороньконди кельгомась ётасть Викати кельгома щаванц, Любовь Павловнань эзда.
Велень ломанць пенсиясовок фалу тев потмоса. Тундаста сявомок пцтай кельмотнень прамс фкявок ши аф ащекшни стак. Вов и тячиень героиняньковок най мезе-мезе тии. Мирденц мархта улихть нешксна, тявок веши аф кржа пинге. Мокшавась кизонда аноклакшни компотт, сокт, желет, салыяфни куярхт, помидорат. Семботь тянь мархта каванякшнесыне аф аньцек мала ломанензон, но и содафонзон, ялганзон.
Эряй Любовь Павловна Мокшень Пишлять вярьгак вастсонза, коста няеви марнек велесь. И эрь шиня кельгозь ванонды шачема-касома уженянц лангс. Сон, кле, тейне инь мазысь и питнись!
Татьяна АЛЬШИНА.