ЭРЬ ТЕВСОНЗА—МАЗЫШИ, ЭРЬ ВАЛСОНЗА—ЁНЮШИ

Улихть асу, эрь тевса машты мокшават Мордовия Республикань эрь районца, а стане жа и лия региоттнень эса. Тячи «Мокшень правдась» инжи Ковылкинскяй райононь Мокшень Коламазса, коса эряй тяфтама ломаттнень эзда фкясь— Р.А.Канайкина. Колганза азонттама оцю мяльса.

Раиса Алексеевна Канайкина шачемас коре Ковылкинскяй райононь Сире Маманя велеста. Тоса тонафнесь начальнай школаса, а меле содамошинзон касфнезень тяка райононь Оцю Азясь велень школаса, конань шумордамдонза меле поступась Н.П.Огарёвонь лемса Мордовскяй государственнай университетонь филологическяй факультету.
Тонафнема кизотне ётасть апак маряк, и вов мокшень кялень и мокшэрзянь литературань, рузонь кялень и литературань учительсь направленияс коре кучфоль работама Ковылкинскяй райононь Мокшень Коламаз велень школав.
Ниле кизот Раиса Алексеевна вятсь мокшень кялень и мокшэрзянь литературань, рузонь кялень и литературань урокт 5-8 класснень эса тонафни стирнятненди и цёранятненди. Школаса Р.А.Жидкова васьфтезе сай пингонь мирденц Андрей Сергеевич Канайкинонь. Мокшень цёрась эста работась школаса учителькс.
Мокшень Коламаз велень школаста Раиса Алексеевна ётась работама тяка велень библиотекав и вов ни несколька кемотть киза кельгозь тиендьсы «книгань азоравань» тевонц.
Мокшень Коламазса Раиса Алексеевна кунара арась эсь ломанькс. Тоса пуроптсь семья, Андрей Сергеевичень мархта шачсть колма идьсна. Ужяль, Р.А.Канайкина лядсь удавакс. Но эряфсь мольсь сяда тов. Эрь шись сашендсь эсь тевонзон-заботанзон мархта.
1986 кизоста сявомок Раиса Алексеевна—заведующай Мокшень Коламазонь библиотекаса. Тняра пингста ширезонза книганкса, журналонкса, газетанкса сашендсь пяк и пяк лама ломань. И эрти эздост Р.А.Канайкина мушендсь и тянемс мушенды мяльс туф книга.
Валонзон коряс, тяни Мокшень Коламазонь библиотекав сашенды 380 ломань—тняра лувида велеса. И эрть сонцень вешфксоц. Фкясь анай
отечественнай классика, омбоцесь—историческяй литература, колмоцесь—кельгомать колга роман, иттне сяда вешихть ёфкст. Тяни библиотекась школать зданияса, сяс книганкса-мезенкса сашендыхнень ётксот школаса тонафнихне, учительхне. Эрь недяляня тяза пачфневи «Мокшень правдась». Газетати стане жа оцю вешфкссь, велеряйхне морафнесазь сонь оцю мяльса.
Но аф аньцек библиотекань заведующаень тевонц мархта содаф мокшавась. Нинге сон—Мокшень Коламазонь клубть видеса «Келуня» фольклорнай народнай ансамблень участница. Морсемась—кельгома тевонзон эзда фкясь. Тянь ули кода азомс «Келунять» и лия участницанзон колга. Оцю мяльса синь пуромкшнихть репетицияс, коль козякофнесазь ансамбльть репертуаронц кода тяниень, стане и кунардонь пингонь мороса. Оцю лезкс максси гармонистсь Е.В.Сарайкин.
Р.А.Канайкинать валонзон коряс, кунардонь моротнень вельде ули кода сяда лац шарьхкодемс атяньконь-бабаньконь эряфснон, вдь тя или тона мороса сидеста пачфневи эстонь тефнень колга.
А кода морсемс мокшень, мокшэрзянь морот национальнай щамфтома-карямфтома? Аш кода тянь тиемс. Тянь нинге лама кизода инголе шарьхкодезь и «Келуня» ансамблень мокшаватне. Сембонь кой-мезе ванфтовсь тядяснон, щаваснон-бабаснон эзда, но тя аф сатомшкаль. Мордовиянь эрь районть ули национальнай эсь щамоц. Мазы сон и Ковылкинскяй районца—най ванондолеть лангозонза. Башка азома мазоптоманзон колга.
Раиса Алексеевна тиендемост ушедсь нинге школаса тонафнемста—виензон варчсезень и сюреса сёрмадомаса, и ёмла ожнаняста кочксемаса. Мокшень Коламазса эрямстонза ашезь ява нинге фкя кельгома тевонц мархта. Тяни Р.А.Канайкинать тифонзон содасазь ламотне. Мокшавась котф лангс сюреса сёрмады, ёмла ожнаста лапаскат, ашкотфт, баяравань крганят тиенди. Мокшавань панархненди петьксонза келихть, лама тюсонь, сельмоце эздост аф явфтови. Нинге тиенди кяме петькст, кяме цюлкат. Мокшаванякс наряжакшни някат. Вов тяса ни педа-пес семботь тиендьсы сонць: сташенды панар, сапоня, аноклакшни ёмла руцяня, котци цюлканят и, конешна, меле ни эрь някать мазопнесы ашкотфса, баяравань крганяса, лапаскаса…
Раиса Алексеевнань эсь кядьса тиф мазоптоманза и няканза аф весть няфневсть ламоц выставкатнень эса, коса пяк тушендсть ваныхнень мяльс.
Р.А.Канайкинать колма иденза. Сембонь высшай образованиясна. Ниле уноктонза: кафта стирнят и кафта цёранят. Стирня уноконзонды мокшавась аноклась и казсь някат-мокшаванят.
Кизефксть лангс, мзяра пинге эряви, штоба анокламс тяфтама няка, Раиса Алексеевна отвечась, што ковсь ули сатомшка, но тя кда аньцек някать мархта работамс. А велень эрь эряйть улихть и лия тевонза, да нинге работась. Тундаста сявомок пцтай ловть прамс Р.А.Канайкина заняф перень тевонзон мархта. Сай библиотекаста и кярьмоди панденятненди. Касфни модамарьхть, перень лия сёрот. Сяс авань кядьтевонзон тиендьсыне ётка пингста или тялонда.
Аф аньцек эсь колганза азондсь героиняньке. Шназень Мокшень Коламазонь машты кядь лия мокшаватнень. Ня мастерицатнень квалма азонттама газетаса сяда тов.

Т.АЛЬШИНА.

Последние новости

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги»...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

Национальный проект способствует развитию предпринимательской деятельности в Мордовии

Министерство экономики, торговли и предпринимательства РМ совместно с Центром...

В Мордовии строятся социальные учреждения

В рамках федерального проекта «Старшее поколение» национального проекта «Демография»...

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром «Мой бизнес» оказываетпомощь предпринимателям Мордовии, предоставляя различные меры государственной поддержки бизнесу республики. Так, в рамках национального...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги» ведется капитальный ремонт автодороги «г. Саранск – р.п. Ромоданова – с. Большое Игнатово» - с....

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...