Мокшавась Наталия Зуева шачсь-кассь Рузаевскяй райононь Сузгярьге мокшень велеса трудонь кельги семьяса. Тядянза-алянза, Нина и Виктор Клячиттне, касфтсть, эряфонь виде кис лихтсть вете итть, конатнень ёткста Наталия Викторовна лувксс коре омбоцесь.
Наталия Зуева ламос эрясь Сузгярьгса, эрь шиня якась железнодорожниконь ошу работама. Меле рамась Рузаевкав квартира, коса тяни эряй стиренц Валериять и цёранц Евгениень мархта.
Наталия Викторовна—лама тевса сафтыхнень и кенерихнень эзда. Работай воспитателькс Рузаевскяй муниципальнай райононь «Комбинированнай видонь «Радуга» идень сад МБДОУ-ть «Комбинированнай видонь 10№ идень сад» структурнай подразделениясонза и дополнительнай образованиянь педагогокс «Тяштеня» идень эстетическяй воспитаниянь (национальнай культурань) центраса. Лиякс азомс, мокшавать эряфоц вов ни лама киза сотф шабатнень мархта и тя тиендьсы сонь павазукс.
Валонзон коряс, улемок мокшень лама идень семьяса пцтай инь оцюкс, пара мяльса лезнесь тядянцты альняканзон и сазоронц ваннемста. Мезсь ашезь лисенде, сон тянди тонафнесь аканц—Клячиттнень васенце шабаснон Светланать эзда. Светлана Викторовна стане жа работай «Тяштеняса».
Сузгярьгонь школать шумордамдонза меле Наталия Викторовна ламос арьсема ашезь карма и поступась М.Е.Евсевьевонь лемса Мордовскяй государственнай педагогическяй институтонь дошкольнай образованиянь факультету, кочкамок «Педагогика и методика начального образования» специальностть, конанди дополнительнайста мольсь «Педагогика и психология» специальностсь. Высшай образованиять колга дипломса квалификацияц тяфтама: «Организатор-методист дошкольного образования. Педагог-психолог». Сон—высшай квалификационнай категориянь специалист.
Сотомс эсь эряфонц дошкольнай образованиять мархта—тянь квалма мокшень стирсь арьсесь нинге школаса средняй класснень эса тонафнемстонза, сяс няйсь эстеенза фкя ки, кона вятезе педагогическяй институту.
«Касонь оцю семьяса, улень ванникс сяда ёмлатненди. Сяс нинге эста няине прязень иттнень мархта работайкс»,—мярьгсь мокшавась.
Вузть шумордамдонза меле, 1999 кизоня, ушедсь работама Рузаевкань 1№ идень садса воспитательти лездыкс. Сяда тов—воспитателькс. Несколька кизода инголе сась работама 10№ идень саду. Шабатнень мархта покоди комсь киза. Тяда башка, кемоньда лама киза сон—дополнительнай образованиянь педагог «Тяштеня» центраса, конань коллективоц кунара содаф кода национальнай коень-обуцянь, культурань ванфты.
Рузаевкань 10№ идень садса воспитательсь Наталия Зуева вяти «Келуня» краеведениянь кружок. Тиендьсы тянь эсь авторскяй программанц коряс, кона ётазе экспертнай комиссиять. Тяниень пингть сон и методистсь Ольга Азоркина аноклайхть нинге фкя программа, кона лемтьф мокшень кяльса тонафнемати. Программати арьсесть лем—«Панчфу руця». Сон кармай улема мокшень кяльса.
Мезе тиендихть иттне «Келуня» кружокса? Наталия Викторовна тиендьсы семботь, штоба сяда лама содальхть эсь странаснон и регионцнон культураснон, национальнай ширеснон колга. Стирнятне и цёранятне сявондевихть экскурсияс ошень парку, библиотекав. Нинге идень садса арсихть ялгакс мокшэрзянь народть фольклоронц, декоративно-прикладной искусстванц мархта, тиендеви сембось ёмла Родинати кельгомада пяшксекс, патриотокс касфтомаснон инкса.
Васенце занятиятнень пингста идень саду якайхне содафневихть мокшэрзянь крайть историянц, эсонза эряй лама нациянь мокшетнень мархта, меле сашенды пинге историяти, культурати, музыкати. И, конешна, сатомшка мяль шарфневи мокшэрзянь налхксематненди. «Келуня» программась моли рузонь кяльса.
«Сяс мес программась лемтьф краеведенияти, ламошкац сотф Рузаевкать содаф ломанензон, вастонзон, историянц мархта»,—азонды воспитательсь.
Идень садса ули кабинет, кона лемтьф мокшетнень эряфснонды-ащефснонды. Сонь пуроптозе Лариса Миронова. Лариса Ильинична путозе тя тевти седиень-ваймонь лямбонц. Тяни кабинетса-музейса арьсекшневи ётафнемс занятият шабатненди.
Аф кунара иттне воспитательснон мархта ульсть экскурсияса Рузаевкань модульнай библиотекаса, кона пяк тусь мялезост.
Идень садса ётафневи илатнень пингста шабатне сидеста улендихть наряжафт национальнай тяниень пингонь щамса.
Ёткшиста Наталия Зуевась эряскоды «Тяштеня» центрав, коса стане жа работай стирнятнень и цёранятнень мархта. Дополнительнай образованиянь педагогсь вов ни лама киза вяти теест кружок, аноклай эсост школав молемати. Тяда башка, содафнесыне национальнай коеньконь-обуцяньконь мархта. Сяда тов арьси ётафнемс занятият мокшень кяльса. И, надиятама, тя тевоц удалай!
«Мокшень правдань» корреспондентть мархта корхнемста Наталия Викторовна аф весть лятфнезе сянь, што работама кафцьке вастонзон мархта теенза пяк и пяк удалась. Тевонза сотфт иттнень мархта. Тя васенцесь. Тяда башка, 10№ идень садса и «Тяштеня» центраса цебярьхть коллектифне, конатнень эса сембось сатневи марстонь вийса. Благодарностень валхт мокшавась азсь 10№ идень садть заведующаенцты Светлана Вельдановати и «Тяштеня» центрать директоронцты, мокшавати Анна Тишкинати. Светлана Николаевна и Анна Ивановна фалу лездыхть, шарьхкоттядязь.
Аф кунара дополнительнай образованиянь педагогсь Наталия Зуева ётафтсь 10№ комбинированнай видонь идень саду якай стирнятнень и цёранятнень мархта «Мокшэрзянь народть коенза» лем ала мастер-класс. Пачфтсь теест поколенияста поколенияс ётни народнай койхнень, культураньконь колга. Нинге лятфтазе иттненди кода кудъётконь паршихнень лемсна кайгихть мокшекс.
Мокшавась фалу примси участия и общественнай тефнень, пуромкснень эса. Меля сёксенда ульсь Мокшэрзянь народть съездсонза, тяни аноклай воспитателень конкурсс. «Келуня» кружокти аноклаф авторскяй программац сатнесь районнай Грант. Гордостень марязь щашендсыне мокшавань щапнень-каряпнень. Ули и «Тяштеня» центрать эзда щамоц, и сонцень. Тядяц, Нина Ивановна, эряфоньберьф сёрмады сюреса. Сонь кядьсонза мазоптьф пряруцятнень, нардаматнень, тодлангакснень стирец нолясыне тевс шабатнень мархта работамста.
Наталия Викторовна эряй Рузаевкаса, но шачфтыензон-касфтыензон ширеса, Сузгярьгса, уленди пяк сидеста. Ошень эряфть, работать эзда ваймамакс лувондсы переса-коса покодемать. Модась максси теенза од вийхть-эрьгят.
Татьяна Владимирова.