Масторлангса эрь ломанть ули сонцень шкайгиц, сонцень промозоц. И оцю паваз, мзярда ломанць нинге одкс пингста мушендсы тя кинц и эряфоньберьф моли эзганза апак шарфнек.
Тянь ширде удалась Краснослободскяй райононь Зайця велеста Анна Павловна Циликинати. Эсь эряфонц сон сотнезе шабань тонафтомать мархта, пцтай нильгемонь киза макссь учителень тевти.
Анна Павловна шачсь Зубово-Полянскяй райононь Кужа велеса. Тядянза-алянза покодсть колхозса. Стирнясь кассь тевонь кельгикс, оцю мяльса тонафнесь школаса, сявондсь аньцек «ветет». Мокшень кяльть школаса эста вятезе Л.М.Заиграйкина. Сон аф аньцек макссесь шабатненди козя содамошит, но и маштсь крьвястемс седисост кельгома тядянь-алянь кяльснонды. Мзяра киза ни ётась ся пингста, а Анна Павловна тячемс мяляфтсы тонафтыенц. Сон тяфтама лац маштсь салама шабатнень мяльснон, што нльне зарник цёранятневок цебярьста содазь предметонц. Улема, ёт эста стирнять седиса шачсь мяльсь арамс учителькс.
Школать аделамда меле Анна Павловна поступась тонафнема Зубово-Полянскяй педагогическяй училищав. Тясонга Шкайсь кучсь стирти цебярь педагокт. Мокшень кяльть вятезе М.К.Вишняковась. Сонь мархтонза ётафтф кизотне нинге сядонга пяк кемокстазь стирнять седиса кельгомать шачема кяленцты. Эряви азомс, Анна хуш и тонафнесь «Ёмла классонь учитель» специальностьс коре, сяда пяк венемсь кяльхненди. Теенза тёждяста макссевсь немецоннеське, а сяс сась мяльс поладомс тонафнеманц вузса омба масторонь кялень факультетса, коза и поступась заочна, аделамок училищать.
1980 кизоня Анна Павловнань направленияс коре прважазь покодема Краснослободскяй райононь Зайця велень школав. Дипломоц сонь ульсь ёмла классонь учителень, но апак заняк тяфтама васта школаса ашель, сяс сон вете кизот покодсь пионервожатайкс. А мзярда аделазе университетть, теенза макссть вятемс мокшень и рузонь кялень урокт. Пингонь ётазь ушедсь вятемонза немецонь кяльтьке.
Зайцяса Анна Павловна васьфтезе сай пингонь мирденц, мокшень содаф поэтть Николай Петрович Циликинонь. «Эх, кодама стихт сон тейне тяшнесь!—мзолдозь лятфнесы мокшавась.—Макссыне тейне сёрманякс, а мон шаран-тиян, тага лувсайне». А рьвяямдост меле Анна Павловна арась мирденцты васенце кулхцондыкс, критикокс и редакторкс. Сон ужяльтькшнезе поэтть, ашезе стяфне рана шобдава кудъётконь тевонь тиема, вдь ся веньберьф тяшнесь, мадондсь варьхмодемшовор. Тячемска пара редактор лаца аноклакшнесыне стихотворениянзон журналхнень и книгатнень эса печатламс.
Мирттнень-рьвятнень Циликиттнень шачсть колма идьсна: 2 стирьсна и цёрасна. Анна Павловнань сатнесь кельгомац и седиень лямбоняц кода эсь шабанзонды, стане и сятненди, конатнень тонафнезень.
2000 кизоня Зайця велень школаса лядсть вейхкса класст. Анна Павловнанди максозь ёмла класснень. Сяс мес шабада кржаль, сембе синь озафтольхть фкя кабинетса. И сон 45 минутать явондозе сембонь ёткова. Васенда васенце классти 10 минутат темать азондсы, тоса—омбоцети. Эста математикать и «Окружающай мир» предметть шабатне велень школаса ёмла класса тонафнезь мокшекс. И кодамовок тапоркст ашесть эвондакшне, мзярда синь ётнесть ветеце классу, коса предметтне вятевсть рузкс.
2008 кизоня Зайцяса школать сёлгозь. Велень шабатнень кармасть усксемост Гумна рузонь вели. А.П.Циликинась поладозе эсь покодеманц тоса. Сон вятсь эрь кодама урокт: и технология, и немецонь кяль, а тяда башка нинге краеведениянь кружок. Но сембодонга лама вий макссесь кельгома мокшень кяленцты. Сяс мес школась рузоннель, кяльсь тонафневсь кода факультатив—фкя част недяляти. Но и тя нюрьхкяня пингське сатнесь тевонь содай учительти, штоба шарфнемс шабатнень мяльснон тонафневи предметти. Рузонь стирнятне и цёранятне аф аньцек пара мяльса яксесть уроконзонды, но и примсесть участия мероприятиятнень эса, конатнень аноклакшнезень Анна Павловна. Синць анцесть учительснон кядьста тонафнемс мокшень стихотвореният, мокшень морот, кштимат. А кодама пара мяльса щашендозь мокшень панархнень! Учениконза фалу лисендсть сяськикс райононь и республикань олимпиадатнень эса, яксесть морама фестивальхненди-коза, тяшнесть исследовательскяй работат мокшэрзянь культурать коряс, васетькшнесть мокшень поэттнень и писательхнень мархта.
2019 кизоста сявомок Анна Павловна аф работай, но тячемс учениконза, васедемок мархтонза, азонкшнихть сюкпря мялень салай уроконзон инкса. Аф кунара Циликинать тернезь мекольце звонокс вейхксоце классу Гумна вели. Касф-венемф учениконза ктморязь сире учительницаснон, лятфнезь мялень салай мероприятиятнень, конатнень ётафнезь марса.
Тяни мокшавась шарфты-веляфты кудъёткса. Каникулатнень пингста ванни унокт. Эздост павазу мокшавать ниле: кафта стирнят и кафта цёранят. Атясна-щятясна, Николай Петрович, тяни лемни стихт ни теест, а Анна Павловна тонафни уноконяснонды мокшень морот. Софья уноконяц, улема, тусь эсь лацонза, теенза тёждяста тонафневихть кяльхне. Щаванц лездоманц вельде стирнясь сатомшка лац аноклась мокшень кяльть коряс ошень олимпиадати и лиссь сяськикс. Оцю уноконяц, Полина, эряй Москуса, но и сонга аф юкснесыне юронзон. Оцю мялец содамс алянц шачема кяленц. Стирнясь вяти исследовательскяй работат мокшень культурать коряс. Проектонза сатнихть вастт школань пялькстоматнень эса.
Кельгсы мокшекс щафста якаманц Елена рьвяняцка. Сонць стирсь рузава, Ефаево шабра велеста. Тяни эряй-покоди Москуса, но кодак аньцек сай вели, авозенц шири, эсток щашенды мокшень паля. Ули од авать и стак шинь щамоц, и иланьге—Анна Павловна стафтозе. Сон азоравась козя, арьзясонза лама мокшень паляда, эрь кодама размеронь, тюсонь. Лама стафнесь тонафниензонды, мзярда нинге покодсь школаса. Эряви азомс, Зайця велеса кородозь ванфнесазь мокшень койхнень-обуцятнень. Ётафневихть илат, конат лия вастса, ужяленди, юкстафт ни. И сембе ня илатнень пингста аватне наряжакшнихть мокшень щамса. Мокшекс наряжафста яксихть церькаву. Сонь Зайцяса панжезь аф кунара. Анна Павловна службатнень пингста арси клирести, тонафни саф певчайхнень мархта службань морафтома.
А.П.Циликинась школаса лама киза покодеманкса казьф «Российскяй Федерациянь воспитаниянь и просвещениянь Почётнай работник» нагруднай знакса. Сонь улихть Благодарностец Республикань Оцюнять эзда и лия оцю казненза.
И.ФАДЕЕВА.