Культурань республиканскяй дворецса ётай пяденцять ламоль ломаньда кода аш мзярдовок. И тя аф стак. Тяса ётафтовсь пяк лямбе и мялень салай ила—Россиянь Заслуженнай и Мордовиянь Народнай артисткать, Мордовия Республикань Государственнай премиянь лауреатть, Славань орденонь Кавалерть, Мордовскяй филармониянь солисткать Нина Марковать «Эряфозе монь—морось!» лем ала творческяй илядец. Сон лемдевсь Нина Васильевнань творческяй кинц ушедомста 45 кизонь топодемати. Залу пуромкшнесть артисткать ялганза, радня ломаненза, творчестванц кельгиенза Саранскяйста, республикань райоттнень и нльне лия региоттнень эзда. Аф кржаль почётнай инжида, конатнень ётксотольхть Российскяй Федерациянь сенаторсь Пётр Тултаев, Мордовия Республикань культурань, национальнай политикань и архивнай тевонь министрсь Светлана Баулина.
Концертнай программать Нина Васильевна ушедозе «Паранзась» шачема-касома веленцты лемтьф мороть эзда, мезть мархта тага весть шарьхкотьфтезе, кодама оцю васта занци эряфсонза ёмла родинац, конашкава уски тоза седиец. Артисткати питни и кельгови аф аньцек шачема уженяц, но и родной кялец. Аф стак творческяй илядьсонза васендакиге кайгсть мокшень моротне, тяфтамотне кода «Сюк, сюк, ковава», «Пайгонясь», «Тундать самац», «Косат ина тон» и лиятне.
Нина Марковать лаца вии и мазы вайгяль мумс пяк стака. Моростонза эрь валнясь сувай ломанть ваймос, токасы мянь седи куцюнянц. Кода сембе концерттнень пингста, тя мезтьке Нина Васильевнань сценать лангс эрь лисемац васьфневсь кядень кайги цяпамаса.
Артисткать мяленц коряс творческяй илядьсонза примасть участия и моразь репертуарстонза моротнень Мордовскяй филармониянь ламоц артисттне. «Карусельки» идень образцовай вокальнай студиясь и Маруся Фоминась моразь «Сюк, сюк, ковава» мороть, конань тядде стане жа юбилеец—сон тяштьфоль 20 кизода тяда инголе. Олеся и Владимир Фомиттне моразь «Кизонь ве» мороть, конань Нина Васильевна тяштезе марса Н.Ф.Мокшинонь мархта. Мордовиянь Заслуженнай артисткась Евгения казезе ваныхненди «В любовь надо верить» цебярьс верондафты композициять. «Российские сады» лирическяй мороть седиень токазь моразе Карина и Александр Сергеефнень семейнай дуэтсна. Мордовиянь Заслуженнай артисткать Нина Учватовать мархта сценать лангс лисендсь ART Vision кштимань театрась—марса синь моразь-кштизь «Тундать самац» мороть. Стане жа концертса примасть участия: МР-нь Заслуженнай артистсь Вячеслав Зобков, «Девчата» ансамбльсь, Светлана Лапицкая, Андрей Бочканов, «Земляки» группась, «Лейне» народнай кштимань ансамбльсь.
Иляденьберьф Нина Марковать лемс кайгсть поздравлениянь лямбе валхт.
—Нина Васильевна Маркова—Мордовия Республикать национальнай достоянияц,—мярьгсь Российскяй Федерациянь сенаторсь Пётр Тултаев.—Сон цебярь пример эсь народонцты, эсь кяленцты и культуранцты служамаса. Ёт содаса артисткать, сон мзярдовок ашезь визне и тянивок аф визди корхнемс эсь родной кяльсонза. Тяка пингть сонь творчествац интернациональнай и, конешна, асудонга асу. А мзярда творчествась асу, сон фкя лаца мала и шарьхкодеви и мокшэрзятненди, и русненди, и татархненди, и лия национальностень ломаттненди. Нина Марковась содаф лама вастова. Но содафшись ашезе полафта сонь кальдяв шири. Россиянь Заслуженнай и Мордовиянь Народнай артисткась лядонды ингольцекс малакс ваныхненди, уленди концерт мархта оцю и ёмла, ичкоздень и мала велетнень и веленятнень эса. Сянкса сонь ломаттне и кельгсазь.
Корхнихть, асу ломанць асу сембоса. Тякоть ули кода азомс Нина Марковать колгавок. Сон аф аньцек асу артистка, но и композитор, тяштсь музыка аф кржа моронди. Васенцеть синь ёткстост—«Молитвать» Нина Васильевна моразе творческяй илядьсонза.
Нина Марковать творческяй киц аф аньцек кувака, но и козя. Сон морсекшнесь странаньконь пцтай сембе ошензон эса, а стане жа Эстонияса и Поволжьянь республикатнень эса, Германияса, Чехословакияса, Венгрияса и Польшаса. Нина Васильевна Мордовиянь артисттнень ёткста фкясь и тякось, конань моронзон мархта пластинкать нолдазе «Мелодия» фирмась. Артисткать пяк козя репертуароц. Тяса и народнай морот, и творческяй сочиненият, и, конешна, мокшэрзянь композиторхнень моросна. Марковась морай шачема крайть мазышинц, кельгомать, павазть колга.
Нина Васильевна салай мяль аф аньцек мазы вайгяленц, но и лангс няевоманц мархта. Творческяй илядьсонза полафтсь аф фкя щам и эрть мархта сон ульсь афкуксонь баяравакс, Толавакс. Ваныхне пяк кельгсазь Н.Марковать.
Кельгома Нина Васильевна! Сюкпря творчествацень инкса! Шумбраши тейть, паваз. Катк седиень эжди моротне кеняртьфнесамазь нинге лама-лама киза!
О.Евдокимова.