Эрясь народонц мархта фкя эряфса

А.С.Пушкинонь лемса республиканскяй национальнай библиотекаса 8 июльста ётафтовсь литературно-музыкальнай ила, кона лемтьфоль эрзянь поэтть, прозаикть, драматургть, лия кяльста ётафтыть, СССР-нь Писателень союзонь членть, мокшэрзянь литературань ушедыхнень эзда фкять, Великай Отечественнай войнань участникть Пётр Семёнович Кирилловонь шачема шиста 115 кизонь топодемати.
Аноклазь и ётафтозь илать библиотекань национальнай и краеведческяй литературань отделонь сотрудникне.
Илать панжезе и вятезе национальнай и краеведческяй литературань отделонь научнай сотрудниксь Валентина Бояркина.
Минь справканьке: мокшэрзянь поэтсь, прозаиксь и драматургсь Пётр Семёнович Кириллов шачсь 1910 кизонь 8 июльста Самарскяй областень Похвистневскяй райононь Малый Толкай велеса крестьянонь семьяса.
Аделазень Саранскяйса Мокшэрзянь педагогическяй техникумть (1928 кизось), Москувонь редакционно-издательскяй институтть (1933 кизось), Кинематографиянь Всесоюзнай институтть (1937 кизось).
1934 кизоня примафоль СССР-нь Писателень союзу.
Содафокс сонь тиезь «Валске Суро лангсо» («Сура лангса шобдавась») историческяй поэмац, «Спасскяй монастырьсе» и «Васенце урок» повестенза, «Литова» историческяй драмац, «Войнань киява» поэзиянь сборникоц, «Учительница», «Валдо васоло угол вельхкссэ» пьесанза.
Великай Отечественнай войнать пингста П.С.Кириллов, эряфонь аф ужяльдезь, тюрсь фашисттнень каршес. Казьф Отечественнай войнань 1-це и 2-це степенень и «Якстерь тяште» ордеттнень мархта, боевой лама медальса.
Кулось поэтсь, прозаиксь и драматургсь Москуса 1955 кизонь 24 ноябрьста.
Кода азозе пуромфненди Валентина Бояркина: «П.С.Кирилловонь эряфонь киц латцевсь тяфта жа, кода и лия ся пингонь од ломаттнень, конат шачсть-кассть крестьянонь семьяса. И сон куломозонза эрясь эсь лама национальностень народонц мархта фкя эряфса».
П.С.Кириллов лац содазень эрзянь и рузонь кяльхнень, мокшэрзянь кунардонь пингонь фольклорть, мезсь пяк лездсь теенза произведениянзон сёрмадомста. Тя лац няеви «Межафтома» поэзиянь книгасонза, «Стака киява» стихонь и поэмань сборниксонза, «Кузьма Алексеев» пьесасонза и «Литова» драмасонза, кона лемтьф Алёна Арзамасскаяти.
П.С.Кирилловонь творчестванц колга эсь мялензон азозень П.С.Кирилловонь лемса Саранскяень Краеведческяй библиотекать заведующаец Нина Бояркина. Сон мярьгсь, кле, поэтть, прозаикть и драматургть лемса библиотекань сотрудникне эсь мероприятияснон вельде аф аньцек ванфтсазь П.С.Кирилловонь и сонь творчестванц колга мялямть, но и сувафтсазь тяниень пингонь од и эряфкшу лувихнень мяльс сонь эсь ёмла и оцю Родинанц и эсь лама национальностень народонц колга арьсематнень.
П.С.Кирилловонди лемтьф стихотворениянц пуромфненди лувозе Мордовиянь Писателень союзть председателец Татьяна Швецова.
Аделавсь литературно-музыкальнай илась концертса, конань аноклазе «Ламзурь» фольклорно-этнографическяй ансамбльсь.
Владимир Нестеров.