ЭСЬ СЕДИСОНЗА КАНДЫ МОКШЕНЬ МОРА

Ломаттне фалу арьсихть: кодама кармай сай пингонь поколениясь, кие поладсы ломанень юромть. И сидеста кулендян тяфтама валхт эряфкшуфнень эзда: кле, од ломаттнень лангс надияма аш. Но тя аф тяфта, сяс мес тяниень пингть оттне тиендихть оцю тефт, вешсазь эсь пряснон и ёрайхть кандомс ломаттненди лезкс, касфнесазь эсь асушиснон и маштомошиснон. Аф кунара васетькшнень тяфтама ломань мархта. Мокшень цёрась Кирилл Миронов оцю мяльса отвечась кизефксонень лангс.

—Кирилл, азонтт аф лама эсь колгат. Коса тонафнят, шачеть-касоть и кодапт кельгома тефне?
—Тонафнян Н.П.Огарёвонь лемса Мордовскяй госуниверситетонь Историко-социологическяй институтса. Шачень Инсарскяй райононь Исавелеса. Кельгома тевдон лама: музыкальнай инструментса морамась, книгань лувомась.
—Азонтт шачема велецень колга.
—Кода ни азыне, шачень Исавелеса. Сон аф пяк оцю. Велезень пяк кельгса и арьсян теенза панжемс и касомс сяда тов. Шачема велезе фалу максси тейне вийхть и мон пара мяльса улендян тоса. Фалу лажаткшнян Исавелети.
—А кода эвондась эсот музыкати кельгомась?
—Тя кельгомась мархтон идькс пингста сявомок. Тейне тядязе фалу морсесь нюрямонь морот, конатнень фалу мялезель кулхцондомс. Монцьке кельгса морамазень. Нинге шабакс мялезель налхкомс кодама-кодама инструментса. И тя пингс тя мяльсь мархтон, эряфозень ёран сотомс мороть мархта.
—Музыкальнай кодама инструментса маштат морама и кунара-аф тонадоть тянди?
—Лама киза моран инструментса. Васенда тонадонь морама гитараса. Сон тейне пачкодсь рузонь кялень и литературань учителезень эзда, тя ульсь школаса. Оцю мялезель тонадомс: ванондонь интернетса видео-урокт, варчсень лама мелодияда, тяфта и тонадонь. Велень клубса мунь гармония, сявине, штоба тонафнемс. Васенда аф пяк лисендсь, а сяльде тевозе тусь. А нинге маштан морама балалайкаса.
—Пяк пара, мес кельгсайть фольклорть и мокшень кунардонь моротнень! Мезьса синь салазь мяльцень?
—фольклорть кельгса шабакс пингста. Сон сувась седиезон, сяс мес фольклорсь няфтьсы юромонь асушить и ёнть, сотсамазь атяньконь мархта. Арьсян, тяфтама музыкаста ули кода сявомс лама мезе цебярь.
—содат мокшень кунардонь лама морода, коста синь вешендьсайть?
—Аф мярьган, што лама, но содан сатомшка. Васенда вешендине рузонь фольклорть интернетса, меколи лятфтайне и мокшеннеть. Вешендень лама информацияда литератураста, интернетса и соцсетьса. Моротнень валснон сёрматкшнине каготкас. Кельгса эсь велесон васетькшнемс эряфкшу ломаттнень мархта. Марса морсетяма, а моротнень сёрматкшнесайне диктофонц, кулхцонкшнесайне и тяфта тонафнесайне.
—Примсеть-аш участия кодамовок мероприятияса или конкурсса?
—Да, примсень участия. Эсь велесон выступандакшнень илатнень и мероприятиятнень эса. Улендень и районнай сценать лангса. Примсень участия «Шумбрат, Мордовия» Народнай творчествань Республиканскяй фестивальса. Сявондень призовой вастт. Мзярда поступань тонафнема университету, ашень лотка тянь лангс. Няфнине мезе маштан театральнай конкурсса, КВН-ца и стак тов.
—А кодаптольхть сатфксне?
—Улихть участниконь дипломне. Университетса примсень участия «Студентонь тундаса», «Зрнянь Первокурсник» и «Мистер ИСИ» конкурснень эса.
—Арьсян, нят аф мекольце сатфксне и сай пингста тейть аф весть удалай. Ашель мяльце азондомс эсь колгат интернетса? Панжемс YouTube̕ са канал или вятемс блог?
—Тянь колга ашень арьсекшне. Тячи, улема, нинге рана ушеткшнемс тяфтама тефт. Тейне эряви пинге тонадомс, виияфтомс маштомошизень.
—Ульсь-аш мяльце сёрмадомс и нолдамс мора?
—Ульсь, но нинге аф пяк лисенди, эряви покодемс. Варчсесайне вийнень поэзияса. Лац лисенди арьсемс сиде моронят. Но корхтамс мороть колга нинге аф пинге.
—университетть эряфса примсят участия?
—Сувсян Студенческяй совету и профсоюзнай организацияти. Аноклакшнетяма лама мероприятия, конкурс, ила, лезнетяма студенттненди.
—Тевфтома аф ащекшнят. Кода ётафнесак ётка пингцень?
—Ётка пингтон аф пяк лама. Кельгса налхксемс инструментса, лувондан книгат. Занцеса прязень футболса, шахматаса.
—Аф лама шачема кяльцень квалма. Мезе арьсят колганза?
—Пяк кельгса мокшень кяльть. Мокшень кяльсь—тя пацят, конат максыхть мокшетненди лиемс вяри и аф прамс, юмамс.
—Сюкпря, Кирилл, корхнеманкса. Кодама совет максолеть од ломаттненди?
—Штоба афолезь юксне эсь юрснон. Эрь шуфтсь кирди вельденза, синьфтомост сон юмай-арай. Ётай пингфтома аф ули сай пингсь.

Последние новости

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель...

РЕСПУБЛИКАВ САСЬ ОД ТЕХНИКА

«Экология» нацпроектть «Сохранение лесов» региональнай проектонц эряфс ётафтоманц рамкаса...

ВАНФТОЛЬХТЬ ЭРЯВИКС КИЗЕФКСТ

23 июльста Саранскяйса, Республикань Кудть конференц-залсонза, ётафтовсь Мордовия Республикань...

В Мордовии развивается система оказания первичной медико-санитарной помощи

В Мордовии в рамках национального проекта «Здравоохранение» развивается система...

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди кенкшнень. Тейнек, Порапа велень шабатненди, тяфтама ломанькс арась Анна Николаевна Купряшкинась. Смузю, внимательнай, заботендай, но...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь Александрия агроошкаса—Днепр ляйть трваса ётафтовсь «Купалье»—«Александрия собирает друзей» республиканскяй оцю ила. Эсонза примась участия кафта...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель 107 киза. Шачема уженясонза, Торбеева посёлкаса, ётафтовсь лама интереснай ила. Ульсть панчфонь путомат, мужествань урокт,...