ЕЖИМИЛАСЬ ТЯНИ КОРХТАЙ МОКШЕКС

Кафта кяльса сёрмады идень писательть Елена Николаевна Шиловать лиссь васенце книгац мокшекс, конань лемоц «Ежимилась—мазы сеель-стирня». Эняльдеме авторти азондомс тя марстонь оцю кеняртьксть колга газетаньконь лувиензонды.

—Елена Николаевна, тунда, корхнемок творчествацень колга, лувиеньконь кеняртьфтить пяк цебярь куляса: рузонь кяльса лиссь идень васенце книгаце «Ежимила—принцесса Листвянки».
—Тячи ули сядонговок кеняртьфти кулязе! Книгазень Ежимила сеель-стирнять и сонь ялганц, врьгаз-цёранять Волкашкать колга июньцта нолдазь мокшень кяльса Мордовияса. Эрь сёрмадыти сембода питни ся, мзярда книгаса геройхне корхтайхть авторть тядянь кяльсонза. Пяк учеме тя шить эса. Мярьгомок «минь», мяльса кирдьсайне сембе лездыхнень, сяс мес синьге путксснон вельде Ежимилась тяни корхтай мокшень кяльса.
—Кода повестть-ёфксть лемоц мокшекс и книгань кодама издательствась сонь нолдазе?
—Лиссь Мордовскяй книжнай издательстваса. Раиса Ивановна Акашкинась, сонь генеральнай директороц, и сембе, кит тоса покодихть и кочказь-аноклазь книгазень, няфтезь пряснон книгань ноляма тевса содайкс и маштыкс. Тейне, кода авторти, пароль мархтост работамс, сяс мес ётксонк фалу ульсь фкя-фкянь шарьхкодема. Лангаксонц, страницатнень дизайнаснон и рисункатнень—семботь кадоськ стане, кода рузонь вариантса. Полафтсь аньцек текстсь и книгать лемоц, кона тяни морафтови «Ежимилась—мазы сеель-стирня». Арьсян, иттненьге мяльс туй, мзярда тиражть явсазь библиотекава и книгась пачкоди лувихненди.
—Елена Николаевна, мезень колга азондови книгацень эса? Мезенкса шарфтсть Мордовияса лангозонза мяль, сувафтомок социальнай ширде эрявикс национальнай литературать ёткс?
—Тя ёфкссь ялгаксшить, фкя-фкянди лездомать, тядятнень-алятнень и шабаснон ёткса ладямать и идень касфтомать колга. Вирень эряйхнень образснон вельде няфтевихть ломаттнень промозсна-усолсна—оцюфнень и ёмлатнень. Пара вайме, мезьдовок аф пели и видешинь кельги сеель-стирнясь Ежимилась книгаса повонды лама тевс и палас. Сон арай сембонди кепотьксокс и цебярьста эсь прянь вятеманц вельде тонафтсыне лиятнень, кода эряви тиендемс, а кода аф. Тяряфтонь сёрмадомс афкуксонь мокшень кяльса, рузонь валфтома, но тяка пингть, иттненди шарьхкодеви валса.
—Кие ётафтозе ёфксцень мокшекс и кие арась теенза литературнай редакторкс?
—Кодак повестть-ёфксть сёрмадыне рузкс и кучине издательствав, куроконе ётафтыне мокшекс. Васендакиге кучине «Мокша» журналу, штоба ванолезе сонь главнай редактороц Марина Владимировна Аникинась. Башка книгакс лисемда инголе повестсь-ёфкссь кармась печатлакшневома пакшень пакш журналса. Оцю сюкпря М.В.Аникинати тянкса! Сон и арась книгати литературнай редакторкс. Лисенди, Ежимилать литературнай тядяцан, а Марина Владимировна—сонь крёснавац. Сёрмадыти кафта кяльса ётафтомс эсь произведенияц аф стака, и меколанкт, сяда пара, мзярда сонць авторсь ётафтсы кяльста кяльс. Сяда мазыста няфтемс кой-кодама образть или сяда пяшкодемс геройть промозонц, теенза эсь эздонза можна тиендемс эрь кодама полафткст. А лия ётафтыти, кона аф ащи авторкс, тя аф мярьгови.
—Вов кода пара содамс кафта кяльхть!
—Колмоцетьке содаса—английскяйть. Идень книгать «Оду аф кармай ризнама» ётафтыне мокшеннети английскяй кяльста. Сонь сёрмадозе израилень идень писательсь Яэль Медини, но иврит кяльть аф содаса, а рузкс тя произведениять ашезь ноля. Вов и савсь английскяйста—мокшекс. Пяк тусь шабатнень мяльс азкссь Дори цёранять и пиненянц колга! Печатлафоль «Якстерь тяштеня» журналса, а Оксана Белкинась морафтозе сонь вайгяльса, и корязонза тиеме видео-книга.
—Эста «Ежимилаське» ётафтома английскяй кяльс! Ашеть арьсекшне тянь колга?
—Сядовок оцю мялезе «мазы сеель-стирнять» колга книгать васенда нолдамс минцень, шабрань, финно-угрань кяльса. Ушедомс, кепотьксонди, инь маланнеста тейнек—эрзянь кяльста. Койсон, аф кизос коре ёню сеель-стирнясь эрзякска корхтама тонады! Мордовскяй книжнай издательствать директоронц Раиса Ивановна Акашкинать мархта минь ни корхнеме тянь колга, и сонга арьси лацон: тя улель пяк пара.
—Пароль ба, мзярда мокшень шабатне книгацень морафтсазь, ётафтомс мархтост Мордовияса творческяй васедемат.
—Прясон тя мяльть кирдьса. Аноклан ялгаксшить и ладямать колга мокшень кяльса программа и карман кепотьф мяльхть васетькшнема библиотекаса и школаса иттнень мархта. СоюзДетЛитть эзда, коза монга примафан, минь, идень писательхне, пингонь-пингонь ётафнетяма тяфтама творческяй корхнемат-васедемат и литературнай пялькстомат рузонь шабатнень мархта. Казенттяма эсь книганьконь эзда сяськихненди казнет, а лядыхненди, кепотьксонди, книгань закладканят. Тяфта ёмла лувихненди васедемать темац и авторть произведениянза сяда шарьхкодевихть и мяляфтовихть.
—Книгатне сёрматфт и нолдафт кафта кяльса, тяни пинге авторти ваймамс?
—Ваймосемс аш кода! Надияфтонь ёмла лувихненди, кодак синь сявозь кядезост Ежимила сеель-стирнять колга васенце книгать, сёрмадомс полаткс. А валсь, кда максыть, кирдема! И сёрмадонь. Омбоце книгать лемоц «Волшебница по имени Ежимила», и нолдазе сонь Санкт-Петербургонь книгань сяка жа издательствась—«Четыре». Тиражть курок пачфтьсазь интернет-магазиттненди, и книгась кармай мишендевома, кода и васенцесь, лама вастова. Кинь ули мялец, вешсы, коста рамамс и морафтомс. А монць озан сонь ётафтома мокшекс. Тя пяльксть эса сядовок лама мялень салай приключенияда, и тяса врьгаз-цёранясь Волкашкась шарьхкодьсы, што тя аф сембонь лаца сеель-стирня, а афкуксонь волшебница. А мес тя мяльсь прязонза сась—тинць морафтсасть и эста содасасть.
—Удалаза арьсефце! Миньге пара мяльса морафтсаськ «Ежимилась—мазы сеель-стирня» книгацень мокшекс, мзярда пачкоди библиотекав. И учсаськ полатксонц. Шарьхкодеви, омбоце книгаце надияфты улемс тяфтама жа мялень салайкс, кода и васенцесь.

Т.Альшина.

Последние новости

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Президентть Посланияста

 Башка мяль Владимир Путин эсь Посланиясонза шарфтсь образованиять качестванцты....

Саранск встретил март «Весенней ярмаркой подарков» 

1 марта в столице региона, при поддержке Министерства экономики, торговли и предпринимательства Республики Мордовия и регионального Центра «Мой бизнес» открылась «Весенняя ярмарка подарков». Традиционно...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение» предусматривает профилактику развития данного диагноза у пациентов с высоким сердечным риском. Для достижения этой цели...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29 февраля 2024 года Послание Президента – это, по сути, программа развития страны, образ будущего, который выходит...