Тяддень 12 июльста Саранскяйса ётафтовсь «Юрхтава» мокшень аватнень Ассоциацияснон марстонь собранияц, конань пингста кочкафтольхть тя организацияти од председатель и правления. Председателькс тя вастти кемокстафоль Мокшэрзянь государственнай национальнай драматическяй театрать директороц Светлана Ивановна Дорогайкина.
Собранияса ламоц кизефкснень ваномста сафоль мяльс пуроптомс Ассоциациять видеса «Юрхтава» фольклорнай ансамбль. Тянь коряс работать вятемонза ушедсь Мордовия Республикань Заслуженнай артисткась Любовь Петровна Князькова. Сон и путфоль коллективти руководителькс.
Пуроптомс фольклорнай ансамбль… Ня колма валхнень эшксса ащи виень аф ужяльдезь активнайста трудендамась.
«Юрхтава» Ассоциацияти сувси ламоц мокшаватнень мазыхть вайгяльсна, аньцек кулхцондолеть эсост. Но фольклорнай башка ансамбльс «цёфкснень» кочкамстост лама арьсема синь марса морамаснон, репертуарть лангса, щапнень-каряпнень колга. И, конешна, фалу пуромкшнема марс репетициянь ётафнема, од моронь тонафнема.
Газетаньконь кунардонь ялгац, Мордовия Республикань Заслуженнай артисткась Любовь Петровна Князькова кярьмодсь «Юрхтава» ансамбльть пуроптоманцты илештень кятть, оцю ответственностень марязь. Перьфканза кочказень Ассоциацияв сувси морама машты мокшень аватнень-стирьхнень и тевсь тусь.
Покодемань шида меле «цёфксне», кой-мзярс юкстамок кудонь тевснон колга, азф пингть пуромкшнихть репетицияс Мокшэрзянь национальнай театрав.
Л.П.Князькова тонафнесыне синь моронь морама, «латцесыне» вайгяльснон, петнесыне эльбятьксснон…
Валонзон коряс, тяфта и удалась пуроптомс 12 ломаньцта ащи «Юрхтава» фольклорнай ансамбльть. Но тя аф корхтай сянь колга, што коллективса аш кода морсемс и лиятненди. «Юрхтавать» кенкшенза панжадот мокшень сембе аватненди, конат ёрайхть няфтемс маштомошиснон и варжамс вийснон морамаса.
Тяни ансамбльса морсихть юрист, адвокат, Н.П.Огарёвонь лемса Мордовскяй государственнай университетонь преподавательхть, библиотекарь, бухгалтерхт, предпринимательхть, журналистт и стак тов.
Фольклорнай ансамбльть васенце выступленияц ётась декабрьста Саранскяйса «Новая песня древней земли» Межрегиональнай фестивальса. Премьерась-ушеткссь ульсь цебярь. Мокшень щамса-карямса наряжаф мокшаватне-баяраватне моразь «Раман Аксясь» мокшень мороть. Тяда башка, тя фестивальса эсь моронц моразе и «Юрхтавать» солисткац В.Чудаева.
Кда корхтамс мокшаватнень репертуарснон колга, то сон сяда тов кармай козякофневома народнай и авторскяй мокшень моротнень мархта. Тяниень пингть эзонза сувсихть ни «Раман Аксясь», «Вай, паксяса», «Сенькань Микитань Ульянась», «Панжи, панжи лайме порась», «Бславак мокшень авать», «Вири молян», «Луганяса келунясь» и лия моротне.
Мокшаватне тевс нолясазь мокшень синцень щамснон-карямснон. Но мзярс аф сембонь синь улихть. Лисема васта муф—ансамблень кой-кона участницатне анцесть нарятт содафснон кядьста.
Коллективсь надияй, сай пинге, мзярда «Юрхтава» Ассоциациясь стафты морси мокшаванзонды сценать лангса выступандакшнемс щапт.
Цебярь ушеткс тиф—«Юрхтава» фольклорнай ансамбльсь пуроптф. Арьсетяма, штоба сонь вайгялец кайголь фалу!
Т.Альшина.