18 декабрьста Коломна ошса ётафтовсь «Фкя менель ала» IX-це национальнай культурань фестивальсь. Мялень салай тя илать мархта шумордавсь 2022 кизось, кона Россияса азфоль Культурань и искусствань кизокс. Арьсезе фестивальть (рузкс лемоц «Под небом одним») Коломнань Мокшэрзянь землячествать вятиец, эрзявась Марина Владимировна Макаркина и васенцеда ётафтозе сонь 2012 кизоня.
Мекольдень кафта кизотнень коронавируснай урмать сюнеда ашесть кочксев и ашесть морсекшне-кштикшне «фкя менель ала». И вов сась ся пингсь, мзярда морсихненди, ваныхненди ульсь кода кочкавомс марс и ётафтомс фкя-фкянди лажатфснон.
«Коломна» Культурань кудсь пяшксель национальнай моронь кельгида и народнай щамонь шнайда. Аф ваномок якшама и лову погодать лангс, однек-сиренек састь учсеф мазышить лангс ванома.
Фойеса коллектифне и башка морсихне кеняртьфтезь ломаттнень мороса и кштимаса, а творческяй маштомошиснон няфтезь сяльде ни залса. Мялень салай лама кштима и национальнай мазы щам ульсь сценать лангса. Мокшетне, эрзятне, русне, татархне, башкирхне, белорусне, узбекне и нльне цыгаттне—сембе кепотьф мяльса эсь творчестваснон, асушиснон вельде кандсть содамошит народснон культураснон колга. Пяк кенярдеме инксост, сяс мес эрь артистсь, кона щафоль национальнай щамса, лисендсь сценать лангс гордостень марязь и няевсь, што шачема кяльсна и обуцясна—тя синь прянь шнафтома вастсна.
Мзярда сценать лангс лисендсть мокшэрзянь морсихне, ломаттне кайгиста цяпазь кядьснон и кенярдезь корхнесть: «Мордва! Мордва выступает!» «Моро» ансамбльсь теест кельговсь кунара. Сонь пуроптозе Акатьево велень Культурань кудса М.В.Макаркина, кодак ётась тяза эряма. И ся пингста сявомок «Морофтома» Коломнаса аф ётни национальнай фкявок ила.
Мокшетнень эзда тоса кунара морсихть мирттне-рьвятне Лябушефне, конат ётасть тяза эряма Зубово-Полянскяй районцта. Иван Петрович морси гармонияса, а Евдокия Ивановна—вайгяльса. Аф ляткшни эздост Торбеевскяй райононь мокшавась Нина Метликина.
Тя кизоть васенцеда сашендсть фестивальс Москувонь мокшаватне Наталья Гуськова и Вера Кашайкина. Синь сувсихть «Валдоня» ансамбльти, кона пуроптфоль 2016 кизоня. Вятиец Наталья Гуськова мярьгсь, што мокшаватнень нинге нона кизотнень мяльсноль самс Коломнав и кеняртьфтемс мокшень мороса тостонь эряйхнень. Но, кода ни азфоль, арьсефснон тапарязе коронавируснай урмась. А тяни удалась! И «Валдоня» ансамбльсь афкуксонь шинь валдонякс валдоптозе национальнай фестивальть.
Кеняртьфти ся, што илать пингста сценать лангс лисендсь идень аф кржа коллектив. Кудса, школаса, кштимань-морсемань студиятнень эса шабатнень касфтсазь аф аньцек творческяй ломанькс, а нинге тонафтсазь кельгомс национальнай культурать, марямс сонь, сотомс мархтонза эсь эряфснон. Вдь сят, кит содасазь родной кяльснон и ванфтсазь сонь, мороса шнасазь шачема-касома уженяснон и народснон, теест сембонди сатовихть цебярь эряф и васта фкя менель ала.
Елена Шилова.