27-28 ноябрьста Саранскяйса ётафтовсь «Марса/вейсэ—Мы вместе» мокшэрзянь од ломанень III Межрегиональнай форумсь, коза пуромкшнесь кемотть од стирь и цёра Мордовияста, Московскяй, Нижегородскяй, Саратовскяй и Самарскяй областтнень эзда. Форумть аноклаец-ётафтыец Мокшэрзянь народть Межрегиональнай общественнай организацияц МР-нь Культурань, национальнай политикань и архивнай тевонь министерствать ширень кирдеманц вельде. Темац—«Койхне-обуцятне од ломаттнень эряфса».
Форумонь васенце шиня участникне ульсть экскурсияса Мордовия Республикать эзга Росгвардиянь Управлениять «АРКУДА» специальнай подразделениясонза, кона ащи Рузаевка ошса. Омбоце шиня И.Д.Воронинонь лемса краеведческяй музейса мольфтевсь форумть работац.
Мероприятиясь ушедовсь мокшетнень и эрзятнень колга мялень салай видеороликста. А меле фкя-фкянь мельге залу сувасть «Торама» фольклорнай ансамбльсь и «Варма» арт-театрась, конат кеняртьфтезь пуромфнень мокшэрзянь мороса и тяниень пингонь национальнай щамонь няфтемаса.
Форумть работанц панжезе МР-нь культурань, национальнай политикань и архивнай тевонь министерствань отделонь начальниксь Александр Кочеваткин, кона лувозе министрть Светлана Баулинать пуромксонь участникненди приветствиянц. Сяда тов корхтасть эксперттне: Мокшэрзянь народть Межрегиональнай общественнай организациянц председателец Юрий Мишанин, протоиерейсь, Саранскяй и Мордовскяй епархиянь Саранскяй епархиальнай управлениянь ответственнай секретарсь Алексей Селезнев, Н.П.Огарёвонь лемса МГУ-нь юридическяй институтонь профессорсь Юлия Сушкова, военнай действиянь ветеранць Александр Николаев, С.Д.Эрьзянь лемса музеень отделонь заведующайсь Наталья Челмакина. Синь пачфтсть оттненди духовно-нравственнай питнишитнень, мокшэрзянь сядонгольдень семьятнень койснон-обуцяснон, патриотизмать, народоньконь козя культуранц колга.
Арась ни патриотическяй пара койкс тернемс илас-пуромксс специальнай военнай операциянь участникнень. МР-ть эзга Росгвардиянь Управлениянь «АРКУДА» спецподразделенияса покодись, СВО-нь участниксь Денис Солдатов карзиса пяк лац моразе Бахонь «AIR» композициянц и азондсь од стирьхненди-цёратненди шачема-касома масторонцты оцю кельгоманц колга.
Шить омбоце пялестонза вал максфоль эстеест од ломаттненди. Синь азондсть эсь проектснон колга, конат тяфта или лиякс лезнихть мокшень и эрзянь кяльхнень, культурать, койхнень-обуцятнень ванфтомаса и виияфтомаса. Тиендьсазь синь тянь интернетть вельде. Кепотьксонди, Инсарскяй райононь Исавелень мокшень цёрась Илья Первойкин панчсь «Мокшень мемнят» пеетькшнемань-сингорямань канал, Москуста мокшень стирсь Мария Маршакова стакшни-сёрматкшни тяниень пингонь мокшень щапт и вятьсы «Москунь мокша» мокшень кяльса телеграм-каналонц. МГПУ-нь студенткась Анастасия Виряскина—киберволонтёр. Интернетса эсь видеонзон-фотографиянзон вельде тиендьсы содафокс эсь народонц культуранц. Нинге фкя од стирть, НТМ телеканалонь «Вал» программань репортёрть Яна Кудашкинать ули «Тонеть» лем ала лопаняц «ВКонтакте» соцсетьса, коса сембось эрзякс и эрзятнень колга.
Кеняртьфти, мес улихть ётксонк озадонь седихть аф ащекшни од ломатть, конат кельгсазь тядянь-алянь кяльснон, аф виздихть корхнемс мокшекс или эрзякс, содасазь койхнень-обуцятнень, пара мяльса наряжакшнихть национальнай щамса и лама тиендихть минценнеть ванфтоманкса. Надиятама, синь арайхть цебярь кепотьксокс лиятненди и тяфтама ломаньда, афкуксонь патриотта кармай сяда лама. Эста народоньконь сай пингонц инксовок пичедемс-ризнамс аф сави.
«Марса/вейсэ—Мы вместе» форумсь шумордавсь мялень салай концертса, конань панжезе Мордовиянь фкя инь содаф и кельгови коллективсь—Г.И.Сураевонь-Королёвонь лемса «Келу» фольклорнай ансамбльсь, а меле поладозь синць форумонь участникне.
Ольга ЕВДОКИМОВА.