24 майста Л.П.Кирюковонь лемса Саранск ошень музыкальнай училищаса ётафтовсь республикань хоровой коллектифнень, конат пялькстсть Всероссийскяй VIII хоровой фестивальть региональнай этапсонза, гала-концертсна.
Кода содаф, тя Всероссийскяй фестивальсь странаса ётафневи 2014 кизоста сявомок. Сонь вельденза касфневи Россиянь профессиональнай и народнай хорхнень мастерствасна, кемоксневихть Российскяй нациянь нароттнень ёткса культурнай, национальнай и религиознай сотксне. Кафкса кизоста, мзярс ётафневи тя фестивальсь, эсонза эсь асушиснон няфтезь пцтай 13000 профессиональнай и народнай хоровой коллектив и 400000 вокалист. Марнек ня кизотнень кувалмоста Всероссийскяй фестивальса, конань арьсезе-тиезе Россиянь хоровой обществась, няфтезь эсь мастерстваснон 1500000 лама ломань, конат обществасонк тиихть творческяй валда атмосфера.
Всероссийскяй хоровой фестивальсь ётафневи колма этапса: региональнай, окружной и федеральнай уровеньца. Тядде Российскяй Федерациянь Президентть В.В.Путинонь «Российскяй Федерацияса Россиянь нароттнень культурнай наследияснон кизонь ётафтомать колга» Указонц вешфксонзон коряс Всероссийскяй VIII хоровой фестивальсь лемтьф Россиянь моронь козяшити. Финалоц арьсекшневи ётафтомс тяддень ноябрь-декабрь кофнень Моску ошса.
Мордовия Республикаса Всероссийскяй VIII хоровой фестивальть региональнай этапсонза, кона ётафтови тяддень 1 февральста сявомок и 18 сентябрти молемс, эсь мастерстваснон няфтезь Саранск ошень и республикань 15 муниципальнай райононь 28 профессиональнай и народнай хоровой коллектив. Эздост 11 коллективсь лиссь сяськикс Всероссийскяй VIII фестивальть региональнай этапсонза. Региональнай этапонь гран-прить сатозе Г.И.Сураевонь-Королёвонь лемса «Келу» фольклорнай ансамбльсь. Сон няфтьсыне жюрити и зрительхненди мокшэрзянь кунардонь пингонь моротнень мазышиснон Нижняй Новгородса, коса тяддень 9 июньцта ётафтови Всероссийскяй VIII хоровой фестивальть окружной этапоц.
Гала-концертса няфтезь эсь маштомошиснон ваныхнень инголе марнек 11 коллективсь. Синь сяськсть Всероссийскяй VIII фестивальть региональнай этапсонза. Сембонь синь концертть ушедомда инголе лямбоста поздравляндазень и арьсесь теест сатомс творческяй од сатфкст Мордовиянь культурань, национальнай политикань и архивнай тевонь министрть васенце заместителец А.Е.Губанищев.
В.ИОСИФОВ.