15 июньцта Саранскяйса ётафтовсь Мордовскяй (мокшень и эрзянь) народонь Межрегиональнай общественнай организациять Исполкомонц Президиумонц заседанияц. Пингстонза ванфоль, кода ётафневихть эряфс «Мордовия Республикань национальнай культурать, государственнай кяльхнень и лия кяльхнень Мордовия Республикаса ванфтомасна и виияфтомасна» государственнай программать мероприятиянза.
Исполкомонь Президиумонь членда башка, заседанияса рабочай повесткать коряс тяфта жа работасть Мордовия Республикань Оцюнять и Правительствань Администрациять, Саранск ошень округонь Администрациять, республикань Культурань, национальнай политикань и архивнай тевонь, Образованиянь и лия министерстватнень, Мордовиянь высшай учебнай заведениятнень, культурань, образованиянь, наукань лия учреждениятнень, республикань национальнай газетатнень и журналхнень, аф коммерческяй и лия народонь общественнай организациятнень представительсна.
Исполкомонь Президиумть заседаниянц панжезе и вятезе Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин.
Кода пачфтезе пуромфненди Юрий Александрович, «Мордовия Республикань национальнай культурать, государственнай кяльхнень и лия кяльхнень Мордовия Республикаса ванфтомасна и виияфтомасна» государственнай программась арьсеф-тиф Мордовия Республикань Оцюнять А.А.Здуновонь Поручениянц коряс. Арьсезь программать Мордовия Республикань Правительствать видеса гуманитарнай наукань НИИ-сь, кемокстазе документть эсь подписьсонза 2021 кизонь 27 декабрьста Мордовия Республикань Правительствать Председателец В.Н.Сидоров.
Государственнай программать эряфс ётафтоманц коряс ответственнай исполнителькс азф-ладяф Мордовия Республикань Культурань, национальнай политикань и архивнай тевонь министерствась. Программань соисполнительхне Мордовия Республикань Образованиянь и лия министерстватне, а тяфта жа республикань профильнай лия ведомстватне, культурань и образованиянь учреждениятне, аф коммерческяй и общественнай организациятне.
Сонць государственнай программась ащи колма подпрограммаста. Васенцесь лемтьф Мордовия Республикань государственнай и лия кяльхнень тонафнемаснонды; омбоцесь—республикань нароттнень национальнай культураснон тонафнемаснонды; колмоцесь—республикань нароттнень тядянь-алянь кяльснон тевс нолямань сферать келептеманцты.
Государственнай программаса тяфта жа путф вешфкс, конань коряс эрь мезне сонь мероприятиянзон эряфс ётафтомаснон пингста эряви тиендемс-ётафнемс мониторинкт. И синь итогснон коряс тиендемс отчётт Правительствать заседанияса и информациянь средстватнень вельде.
Сяльде Ю.А.Мишанин макссь вал Мордовия Республикань культурань, национальнай политикань и архивнай тевонь министрть васенце заместителенцты А.И.Карьгинонди. Александр Иванович пачфтезе пуромфненди мероприятиятнень лувксснон, конат ётафтфт ни государственнай программать вешфксонзон пяшкодеманкса. Синь ётафтовсть Мордовия Республикаса и Россиянь лия региоттнень эса, коса компактнайста эряйхть мокшэрзят.
Нят—Тядянь-алянь кялень Международнай шись, Международнай участия мархта мокшень и эрзянь кяльса диктантсь, национальнай культурать историянц коряс научно-образовательнай форупне, «Масторава» Межрегиональнай конкурссь, Мокшэрзянь кялень Всероссийскяй шись, «Наследия» национальнай культурань школась, «Акша келу» и «Раськень озкс» национальнай фольклоронь государственнай илатне, Славянскяй письменностень и культурань шись и лия мероприятиятне, конат няевиста касфтсазь республикань нароттнень национальнай культураснон.
Маластонь пингть национальнай культурань виияфтомань-касфтомань сферас эсь цебярь ширеснон сувафтсазь «Сабантуй» татаронь Всероссийскяй праздниксь и «Шумбрат» мокшэрзянь Всероссийскяй илась, конат ётафтовихть Мордовия Республикаса.
Мордовия Республикань Оцюнять и Правительствать Администрацияса массовай информациянь средстватнень мархта тевонь вятемать коряс отделонь заведующайсь И.И.Скопина пачфтсь пуромфненди финансовай лезксть колга, кона макссеви общественнай организациятненди и массовай информациянь средстватненди национальнай кяльхнень виияфтоманкса и синь тевс нолямань сфераснон касфтоманкса.
Саранск ошень округонь оцюнять заместителец—социальнай политикать коряс департаментть директороц О.В.Шуляпова азондсь пуромфненди ся работать колга, кона вятеви Мордовиять столицаса мокшень и эрзянь кяльхнень тевс нолямань сфераснон келептеманкса. Тя работать итогонзон коряс, Саранскяйса троллейбусонь и автобусонь 11 маршрутса лотксема васттнень лемсна тяфта жа кармайхть азондовома мокшень и эрзянь кяльса.
Сяльде государственнай программать вешфксонзон эряфс ётафтомаснон колга пуромфненди азондсть Мордовия Республикань педагогическяй работниконь профессиональнай мастерствань виияфтомань Центрать ректороц Е.В.Самсонова, Мордовия Республикань Правительствать видеса гуманитарнай наукань НИИ-ть директороц Г.А.Куршева и тя институтонь научнай сотрудниксь, педагогическяй наукань докторсь А.М.Каторова, Мордовия Республикань Образованиянь министерствань общай образованиянь отделонь консультантсь Н.В.Салмова и Мордовскяй книжнай издательствать директороц, филологическяй наукань кандидатсь Р.И.Акашкина.
Исполкомонь Президиумть заседаниянц аделавомста Ю.А.Мишанин азсь оцю сюкпря пуромфненди цебярь работанкса. Тяфта жа сон азсь мяль: тяддень сентябрьста ётафтомс мониторинг Мордовия Республикаса мокшень и эрзянь кяльхнень тонафнемаснонды.
Мекпяли Ю.А.Мишанин населениянь Всероссийскяй переписть ётафтомаса оцю путксонкса Мордовскяй (мокшень и эрзянь) народонь Межрегиональнай общественнай организациять Благодарностьса казезень Национальнай театрань, Мордовиянь Народнай и Заслуженнай артисттнень Мария Плотниковать, Елена Гудожниковать и мокшень содаф блогерть Оксана Белкинать.
В.НЕСТЕРОВ.