И.М.Яушевонь лемса Мордовскяй государственнай музыкальнай театрать директороц, республикань искусствань Заслуженнай деятельсь В.И.Шарапов:«Театрав сашендыхть башка ломатть, а тоста лисенди народ!»

—Владимир Иванович, кодама работа тячи мольфтеви И.М.Яушевонь лемса Мордовскяй государственнай музыкальнай театраса театральнай од сезонть анокламанц и ётафтоманц коряс? Мзярда и кодама произведенияса ёратада тинь сонь панжемс?
—Ушедсаськ корхтаманьконь ётай кизонь театральнай сезонть эзда, конань пингста театрась сатсь сатомшка няевикс сатфкст.
Васенцекс, сценаньконь лангса Москувонь режиссёрсь Валентин Варецкий путозе Г.Канчелинь «Ханума» музыкальнай комедиянц, репертуарозонк тяфта жа сувась «Тёжянь и фкя ве» балетсь, конань путозе Россиянь Заслуженнай артистсь Виталий Ахундов.
Омбоцекс, ётай кизонь театральнай сезонть пингста театраньке тяфта жа сатомшка цебярьста ётафтсь гастрольхть. Балетонь, оперань и музыкальнай лия жанрань постановканьконь мархта минь улеме Пензаса, Ульяновскяйса, Сызраньца и Приволжскяй федеральнай округонь культурнай лия столицатнень эса.
Кда корхтамс тяддень Театральнай 87-це сезонть колга, эряви азомс: сонь ётафтоманц коряс сембе анокламань тефне тиендевсть лац-ряц и аделафт эсь пингстонза. Сяс тячи тейне ули кода азомс: И.М.Яушевонь лемса Мордовскяй государственнай музыкальнай театрась Театральнай од сезононц панчсы 3 и 4 сентябрьста П.Чайковскяень «Локстинь эрьхке» («Лебединое озеро») кафта действиянь балетса и Г.Канчелинь «Ханума» музыкальнай комедияса.
театральнай 87-це сезонти театрань коллективсь аноклась сембе вийса. Сяс, надиян, ваныть мяльс туйхть балеттне, оператне, музыкальнай комедиятне, мюзиклхне и лия жанрань постановканьке, конатнень сон няйсыне театральнай сезонть пингста театрасонк и гастрольса!
Тяда башка, тяддень театральнай сезонть пингста театраса путовихть од постановкат, конат няевиста козякофтсазь репертуароньконь. Нят—П.Чайковскяень «Спящая красавица» балетоц, А.Островскяень «Снегурочка» пьесанц коряс Н.Римскяй-Корсаковонь операц, конатнень премьерасна ётафтовихть тяддень декабрьста.
Синдедост башка, Мордовия Республикань Оцюнять А.А.Здуновонь финансовай лезксонц вельде путовихть Дж.Вердинь «Травиата» операц и лия классическяй произведениятне.
Театральнай 87-це сезонцта минь тяфта жа мольхтяма гастрольс Белоруссия Республикав и ётафттама гастролень оцю тур Россиянь содаф культурнай центратнень эзга.
Работада инголе кармай лама.
—Кода содаф, кой-кона театратнень эса аф сатнихть классическяй репертуаронь артисттне. А кода тянь мархта ащихть тефне И.М.Яушевонь лемса Мордовскяй государственнай музыкальнай театраса?
—Афкукс, классическяй искусствань театраса тяфтама прябала ули. Но, эряви азомс, тяфта жа эрь учрежденияса тя прябалать машфтоманкса вятеви оцю работа.
Тяфтама работа эрьгавста мольфтеви миньге театрасонк. Фалу вешенттяма оперань и балетонь од артистт, конатнень ули мяльсна профессиональнайста касомс сценаньконь лангса.
Тяда башка, театрав терневихть контрактонь коряс фкя сезонц содаф артистт музыкальнай лия театратнень эзда. Но сембось минь театрасонк кирди артистонь костякть лангса, кона содафнесы ваныть марнек репертуароньконь мархта. Сон, тя костяксь, лац содасы и шарьхкодьсы ся оцю задачать, конань ломаттненди эряви пачфнемс классическяй искусствань эрь коллективти.
Тянь колга пяк лац мярьгсь немецкяй классическяй писательсь, Нобелевскяй премиянь лауреатсь Томас Манн: «Театрав сашендыхть башка ломатть, а тоста лисенди народ!»
—Владимир Иванович, кода содаф, И.М.Яушевонь лемса Мордовскяй государственнай музыкальнай театрась, российскяй и омба масторонь классикада башка, тяфта жа ушедсь путнемост мокшэрзянь культурань деятельхнень произведенияснон. Кода кармай мольфтевома тя работась сяда тов?
—Театраньконь репертуарса тячи 50 лама классическяй произведения. Ётксост улихть мокшэрзянь произведениятка. Нят—Россиянь и Мордовиянь содаф композиторть Н.Кошелевать «Алёна Арзамасская» и «Мокшэрзянь ёфкс» балетонза, конатнень зрителеньке ванондсазь оцю мяльса!
Арьсян, Нина Васильевна курок сембонь минь кеняртьфтьсамазь од произведенияса. Тяка пингть, азса видеста, минь учтама тяфтама произведеният Мордовия Республикань культурань и искусствань лия деятельхненьге ширде!
—Владимир Иванович, газетаньке эсь лувиензон лемста арьси театрати цебярьста панжемс Театральнай 87-це од сезононц и сонь пингстонза фалу марямс кельгома ваныть ширде.
—Оцюдонга оцю сюкпря пара мяленкса-арьсеманкса!
В.Нестеров.