—Владимир Иванович, кода латцеви тяддень кизось творческяй ширде И.М.Яушевонь лемса Мордовия Республикань государственнай музыкальнай театрати?
—Азса видеста, ули мезьса шнафтомс пря и ули коза касомс.
Эряви азомс, творческяй ширде тяддень кизось, кафта-колма ингольдень кизотнень лаца, театрати арась пяк удалафокс. Кизоть ушетксса зрительхне оцю мяльса ванозь Джузеппе Вердинь «Травиата» операнц, Сергей Прокофьевонь «Ромео и Джульетта», Родион Щедринонь «Конёк-Горбунок» и Нина Кошелевать «Алёна Арзамасская» одкстоптф балетснон. Декабрьста классическяй оперань кельгихне няйсазь Джакомо Пуччининь «Богема» операнц, Валентин Красногоровонь «Рыцарские страсти» мюзикланц, иттненди «Морозко» и «Репка» музыкальнай ёфкснень.
Лиякс мярьгомс, тя кизоть кувалмоста путфт классическяй кафта операт, классическяй кафта балетт, фкя мюзикла и иттненди музыкальнай фкя ёфкс. Койсон, тя сатомшка няевикс сатфкс, кона корхтай театраньконь творческяй касоманц колга. А марнек театрать репертуарса тячи 50-да лама опера, балет, мюзикла рузонь, мокшэрзянь и омба масторонь классическяй лия произведения.
—Сембе-аф постановкатне тушендыхть ваныхнень мяльс?
—Кда корхтамс балеттнень, оператнень и лия произведениятнень колга, конат няфневихть театраньконь сценанц лангса, залсь уленди пяшкотьф пцтай 100 процентс.
Минь суваме Россиянь музыкальнай театрань Ассоциацияти и тянь вельде ладяме творческяй соткст странань лия музыкальнай театратнень мархта. Кепотьксонди, И.М.Яушевонь лемса музыкальнай театрань балетонь, оперань и лия постановкань ведущай солисттне налхкихть синь постановкасост, а синнетне—минь операсонк или балетсонк.
Тяфта жа минь кемокстаме Россиянь Оцю театрать мархта марстонь творческяй тевонь вятемать коряс договор. Тостонь од артисттне стане жа налхкихть минь операсонк и балетсонк. Аф кунара тяфтама соткст минь ладяме Санкт-Петербургонь Музыкань кудть мархта.
—Коса тядде ётнесть театрать гастроленза?
—«Оцю гастрольхть» федеральнай программать финансовай лезксонц вельде тяддеть кувалмоста театрась ётафтсь гастрольхть Приволжскяй федеральнай округонь эрь регионца. Балетоньке, операньке и классическяй лия постановканьке тушендыхть ваныхнень мяльс. Тяда меле минь усксетяма округонь региону лия операт и балетт.
Ужяль, конешна, но театраньке аф сидеста уленди гастрольса республикань муниципальнай райоттнень эса. Декорациянь и исполнителень лувксть коряс постановканьке оцюфт, синь аф тяльгондихть райононь Культурань куттнень сценаснон лангс. Сяс гастроленьке кармайхть вятевома сяда тов Приволжскяй федеральнай округонь и странань лия региоттнень эса, а тяфта жа—омба масторса, Китайса.
—Кодамот планонте сай кизонди?
—Театрань сценать лангса путовихть од балетт, операт, аноклавихть классическяй музыкань концертт. Тяфта жа келептеви гастроленьконь географияц. Коронавируснай пандемиять инкса ладяф перяфксне валхтфт, сяс театрась эреклафтсыне гастролень ингольдень сотксонзон кода Россияса, стане и омба масторса.
Од постановкатнень ёткса васенце вастти мон путса «Ушаков» балетть. Кода содаф, тяфтама балет Россияса нинге ашезь путне фкявок музыкальнай театра. Минь—васенцетне!
—Удалаза арьсефонте, Владимир Иванович.
—Сюкпря.
Владимир Нестеров.