—Владимир Иванович, 2 февральста сявомок театранте лемневи И.М.Яушевонь лемса Мордовиянь оперань и балетонь государственнай театракс. Кода работай сон од статусонь вешфкснень коряс?
—Минь программасонк лама жанрань пцтай 50 спектакль. Но репертуарсонк лядсть музыкальнай спектакльхневок. Нят: мюзиклат, музыкальнай комедият, иттненди музыкальнай ёфкст и лия жанрань спектакльхть.
И.М.Яушевонь лемса оперань и балетонь государственнай театрась лиссь творческяй од и кели кис. И минь сяда товга карматама аноклакшнема и няфнема стама операт и балетт, конатненди ули вешфкс.
—Кодама од операт и балетт арьсекшнетяда путомс тядде?
—Синь кочкавихть мировой классикань шедевратнень ёткста, коса тяфта жа лама операда и балетта, конатнень сёрмадозь Пётр Чайковскяень, Сергей Прокофьевонь, Модест Мусоргскяень, а тяфта жа омба масторонь классикнень произведенияснон лангс Россиянь композиторхне.
Эряви азомс, што тяда инголивок минь путнеме ни классическяй операт и балетт. Корхтамась мольфтеви «Евгений Онегин» операть, а тяфта жа «Снегурочка», «Алёна Арзамасская» и лия балеттнень колга.
И.М.Яушевонь лемса оперань и балетонь театрась эрьгавста работай эсь од статусонц вешфксонзон коряс. И репертуароньконь ширде минь тячи ащетяма фкя серьса Россиянь инь содаф оперань и балетонь театратнень мархта.
—Владимир Иванович, оперань и балетонь путомста, пшкятькшнетяда-аф лезксонкса лия театратненди?
—Россиянь сембе театратне фалу лездыхть фкя-фкянди постановкань путомста. Тяфта ладявсь кунара ни. Кепотьксонди, минь режиссёроньке путы балет или опера Оренбургскяй театраса, коса главнай рольхнень налхксазь минь артистоньке, и—меколанкт: тостонь режиссёрсь и артисттне работайхть минь постановкасонк.
Тяфта козякофневи театрать репертуароц и тянь вельде касфневи ваныхнень лувкссна. Кда кафта кизода тяда инголе оперань или балетонь няфтемста залсь пяшкотькшневсь 20 процентс, то тя кизонь васенце кварталста сон пачкодсь ни 30 процентти. Надиян, кизоть аделавомс классическяй постановкань ванома сашендыхнень лувкссна пачкоди 80 процентс.
—Кода латцевихть театрать тевонза гастрольхнень мархта?
—Аф кунара минь мрдаме Оренбургскяй областьста, коса няфтеськ «Ромео и Джульетта», «Эсмеральда» балеттнень и «Храбрый портняжка» музыкальнай ёфксть. Сембе спектакльхне ётафтовсть музыкальнай комедиянь Оренбургскяй государственнай театрать сценанц лангса.
Тянь эзда содави, што И.М.Яушевонь лемса оперань и балетонь государственнай театрась моли творческяй виде киге!
Кда корхтамс гастрольхнень колга, конат арьсекшневихть ётафтомс омба масторса, синь анокламаснон коряс работась мольфтеви фалу.
—Кодама мероприятият аноклай оперань и балетонь театрась Великай Сяськомать лемс?
—Минь анокламе войнань кизонь и патриотическяй моронь концерт, конань няфтьсаськ 9 майста Саранск ошень эряйхненди и инжихненди Советскяй площадьса. Тяка шиня театрать сценанц лангса кармай «Небесный тихоход» спектакльсь.
Тяда башка, оперань и балетонь театрань артисттне и лия сотрудникне кочкайхть гуманитарнай лезкс СВО-нь участникненди. Синь кодайхть маскировочнай сетьть, тиендихть окопонь штатолхт.
Лиякс мярьгомс, минь сотнесаськ Отечестваньконь тяда ингольдень и тячиень историянц фкя сюлмос. Сяс Сяськомась кармай мельганк!
Владимир НЕСТЕРОВ.