Якутиянь Мирнинскяй райононь Айхал посёлкань мокшетне несколька кизода инголе пуромсть общинас, конанди макссть «Мордовия» лем. Пцтай сембе синь—Темниковскяй райононнет.
«Мордовия» общинать официальнай представителец—землячканьке мокшавась Лариса Рыськина. Лариса Викторовнань валонзон коряс, васенце аськолкснень эрявикс тевса тиезень Темниковскяй райононь мокшалясь Владимир Анчин.
Тя посёлкаса аф кржа общинада. Эсь кяльснон, койснон-обуцяснон кородозь ванфтсазь татархне, буряттне, калмыкне, лиятне. Мокшетневок састь мяльс пуромомс марс, арамс ичкоздень Якутияса эсь кялень, культурань ванфтыкс. Илештень кятть эрявикс тевти кярьмодсь и Лариса Рыськина. Мокша ломаттне тисть интернетса группа, конань вельде кирдихть соткст фкя-фкянь мархта, а Лариса Викторовнань кочказь эстеест вятикс. Сон лама тиенди сянкса, штоба касфтомс общинати сувсихнень лувксснон. Тяниень пингть Айхалса эряй несколька сяда ломань, конат шачсть Мордовиянь Темниковскяй, Атюрьевскяй, Краснослободскяй и лия райоттнень эса. И ламосна, конешна, мокшет. Общинать «седикуцюняц»—пцтай колмогемонь ломань. Ламотне эздост примсихть участия ётафневи илатнень, лия пуромкснень эса, тиендемок сяда содафокс мокшень щамоньконь-карямоньконь, коеньконь-обуцяньконь, мокшэрзянь культурать целайнек. Общинась пуроптсь «Мокша» фольклорнай ансамбль, сяс Айхалонь эряйхне тяни кулендьсазь мокшэрзянь мороньконь. Саранскяйста общинать лемонц мархта заказасть оцю баннер, кона мокшэрзянь масторста пачфтьфоль мянь Айхалу.
Аф кунара, 5 июльста, Айхал посёлкаса «Дружба народов» ЛЭК-ть территорияса ётафтовсь «Ысыах Приполярья 2025» национальнай ила, коса примась участия и «Мордовия» общинась.
Лариса Рыськинать валонзон коряс, Айхалонь мокшетне ашесть ляда ширеса мероприятиять эзда. «Мордовиять» представителенза мокшекс азсть приветствиянь валхт и пачфтсть общинать квалма. Тянь тиезь Нина Ишаева, Елена Морозова и сонць Лариса Викторовна.
Сембе ванозь национальнай щамса-карямса щаф някать, конанди нарядть стазе нинге фкя мокшавась Светлана Майорова.
Шову бозать илати пидезь-аноклазь Валентина и Семён Абанофне, мокшень пачатнень и пярякатнень панезень Нина Илаева.
«Мордовиять» представителенза марса лия общинатнень мархта мазоптезь «Ураса» якутскяй кизонь национальнай эряма вастть тя иланди.
Ысыах иласа сембе пуромфнень васьфтезень башка пирьфсь, кона арась лама нациянь марстомомань символкс—Народонь ялгаксшинь тюсюльге кудсь. Тяса эрь общинась няфтезень народонц коензон-обуцянзон и каванязень сайхнень национальнай ярхцамбяльса и симомбяльса.
«Ялгаксшинь шрась арась таньфонь афкуксонь илакс. Ламотне, варжамок мокшень пачатнень и шову бозаньконь, анцесть нинге. Пароль мялезонк, што Айхалу илас сайхне шназь пидефоньконь-паньфоньконь, вдь сембе тя танцтинять анокласьк бабаньконь-щаваньконь эзда саф рецепттнень коряс»,—мярьгсь Лариса Рыськина.
Национальнай иласа ульсть и лия общинат: осетинскяйсь, конань лемоц «Иристон», казахстанскяй «Атамекенць», славянскяй «Любо» общинась, татароннесь-башкироннесь «урайсь», дагестанскяй «Каспийсь», «Эрел» якутскяй землячествась, «Досуг» киргизскяй общинась. Сембе синь лац-ряц анокласть, няфтезь эсь народснон культурнай козяшинц. Достойнаста и мокшэрзянь народть инкса гордостень марязь Ысыах иласа няфтезе эсь прянц и «Мордовиясь».
Илас сашендсть аф аньцек общинати сувсихне, но и лия мокшетне. Тядятне-алятне мархтост вятезь идьснон, штоба содафтомс ёмлатнень атяснон-бабаснон культураснон, койснон-обуцяснон мархта, а нинге—кирдемс «Мордовиять» ширенц.
Ысыах якутскяй илась лемтьф кизоти. И Айхалса сон ётась пяк лямбоста.
Татьяна Альшина.