Ётай недялять республиканьконь столицаса ульсь «Иненармонь» мазышинь и асушинь II Межрегиональнай конкурссь. Сонь ётафтозе «Юрхтава» мокшаватнень ассоциациясна МР-нь Культурань, национальнай политикань и архивнай тевонь министерствать ширень кирдеманц вельде.
Конкурсса примась участия 18 кизоста сявомок 35 кизосотненди молемс кеветие мокшень и эрзянь стирь Саранскяйста, Мордовиянь аймакнень эзда и Пензаста.
Пялькстомась мольфтевсь колма шит. Васенце кафта шитнень стирьхне примасть участия аф кржа мастер-класса, а стане жа тисть путкс специальнай военнай операциянь участникненди лездомати: кодасть боецненди лямбе щапт, маскировочнай сетьть, тяштсть теест од кизонь поздравления мархта открыткат и сёрмат.
Мекольце шись сембода мялень салайсель. Мокшэрзянь национальнай драматическяй театраса ульсь афкуксонь шоу—тяса мазыста и келиста ётафтовсь конкурсть финалоц. Участникне лисендсть сценать лангс мокшень и эрзянь щамса. Эрь стирсь няфтезе эсь маштомошинц и асушинц творческяй номеронц пингста: кие кштись, кие морась, кие стихотворения азондсь, а кой-кит анокласть и аф оцю сценкат. Сембе аш ни кода лац няфтезь пряснон. Участницатнень ваныхне васьфнезь и прважсезь кядень кайги цяпамаса. «Иненармонь» мазышинь и асушинь конкурсса васттне явовсть тяфта. Васенцеть занязе «Сияжар» национальнай программань ведущайсь Екатерина Евстигнеева, омбоцеть—Мокшэрзянь национальнай драматическяй театрань актрисась Татьяна Биушкина, колмоце вастти лиссь Н.П.Огарёвонь лемса МГУ-нь Национальнай культурань институтонь студенткась Олеся Пестова.
Гран-прить сатозе Н.П.Огарёвонь лемса Мордовскяй госуниверситетонь филологическяй факультетонь тонафнись, мокшень стирсь Дарья Шиндяйкина.
—Ашень арьсекшне, што тяфта сембось лиси. Ламос таколдонь молемс-аф конкурсс. И тяни мон павазуван, мес примань участия «Иненармонь» пялькстомаса,—азозе Дарья.
Кода пачфтезе «Юрхтава» мокшаватнень ассоциацияснон председателец Светлана Дорогайкина, конкурсть арьсекшневи ётафтомс сай кизонявок.
Ольга Евдокимова.