26 апрельста ёмла ваныхне и синь тядясна-алясна учевихть «Юр» спектакльс
ИНО-ИНЬ. Тяфтама лем канни идень национальнай театрась, кона ушедозе эсь работанц тяддень 1 апрельста Саранскяйса, Мокшэрзянь национальнай драматическяй театрать видеса.
Тя проектть ширенц кирдезе Культурнай инициативань Президентскяй фондсь, а арьсезе сонь—«Валда ванф» (Светлый взгляд) АНО-сь.
«ИНО-ИНЬ» театрать лемоц эрзянь и мокшень кяльста ётафтови кода «самый-самый». Лиякс азомс, инь эрявикссь и роднойсь. Кинди арьсеф тя театрась? 3-7 кизоса иднятненди и синь тядяснонды-аляснонды. А кда тинь мокшень или эрзянь семьяста и мяленте содафтомс шабантень родной культурать мархта—идень национальнай театрась учи эсонт!
Эрявикс проектть васенце тевоц—касфтомс и виияфтомс нациятнень ёткса сотксонь кирдемать и культурать. Сембе спектакльхне кармайхть няфневома мокшэрзянь ёфкснень коряс, конатнень бабатне-щаватне азонкшнесазь эсь уноконяснонды. Постановкатнень эса примайхть участия мокшень и эрзянь кяльса корхтай актёрхне и тевс нолдавихть тиф някатне-персонашне.
«ИНО-ИНЬ» идень национальнай театрась—Мордовия Республикаса васенце бэби-театрась, кона кармай няфнема визуальнай спектакльхть-инсталляцият. Вельденза иднятне и оцюфне содафтовихть Мордовиянь национальнай ширеть мархта.
Тевс нолдавихть тяниень пингонь театрань приёмтне, мезть вельде мокшэрзянь культурать мархта содафтомат и инь ёмла ваныхне, конат шарфтыхть тянь лангс сяда оцю мяль.
26 апрельста идень национальнай театрась пуроптсыне ёмла ваныхнень мокшэрзянь мифологиять коряс «Юр» сказаниять—спектакльть ванома. Билеттне мишендевихть ни! «ИНО-ИНЬ» театрать спектаклянза кармайхть ётнема Мокшэрзянь национальнай театрать балетнай залсонза.
Кода моли анокламась «Юрти» и мезень колга идень тя спектакльсь? Тянь и ламоть лиять квалма азондсь постановкать сценаристоц и режиссёроц, Мордовия Республикань Заслуженнай артисткась Екатерина Исайчева.
Екатерина Сергеевнань валонзон коряс, «Юр» ёфкссь кармай молема рузонь кяльса, но, тияк, ваныхне кармайхть содафневома мокшень и эрзянь кяльхнень мархта. Кепотьксонди, иттне, тя или тона пингть, тердевихть примамс участия постановкаса. Актёрхне теест азсазь, кода постановкаса азф валсь рузонь кяльста ётафтови мокшекс и эрзякс, а меле шабатне синць ни азсазь ня валхнень.
И нинге. «Юр» постановкать шумордамдонза меле эрь ванысь получай «кудонь заданиянди» аф оцю буклет, коса кармайхть улема мокшень и эрзянь сембе ся валхне, конатнень кулезь и тонафнезь спектакльть пингста.
Премьераса налхкихть актёронь кафта состафт, эрть эса—колмонь ломань. Тевс кармайхть нолявома и някатне-персонашне. Тяни молихть репетициятне, аноклавихть декорациятне, актёрхнень костюмсна.
26 апрельста мокшэрзянь мифологиять коряс «Юр» спектакльсь пуроптсыне премьерать ваныензон кафксть—11 и 13 частста. Сяда лама колганза тяштема аф карматама—сада и ваность тинць!
Татьяна Альшина.