Инсарскяй районць
Тя недляшить Саранскяень ваныхнень эсь творчестваснон мархта кеняртьфтезь Инсарскяй райононь художественнай самодеятельностень артисттне. Концертта башка РДК-нь омбоце этажса ладяфоль декоративно-прикладной творчествань выставка «Мастерство земли Мордовской». Тяса няфневсть валенцят, национальнай вышивкат, мокшень щамса-карямса наряжаф някат и лама нинге мезе. Но ваныхнень салазе мяльснон «Лятфнембялень книгась», коза кочкаф Великай Отечественнай войнань воиттнень колга информациясь. Аф кунара синь эвондась нинге фкя альбомсна, кона лемтьф СВО-са шавф эсь ломаньцнонды.
Инсарскяй райононь отчётнай концертсост, конань лемдезь «Сёрмадан тейть нинге весть…» няфтевсь оцю патриотизмась и кельгомась эсь национальнай койхненди-обуцятненди. Ламоль концертонь программаса Родинать колга морода. «Поюня» фольклорнай ансамбльсь, кштимань и морамань народнай ансамбльсь «Надежда» кеподезь ваныхнень мяльснон, токазь седиснон. Тусь залть мяльс Виктория Осиповать морамац, а тяфта жа «Задоринка» и «Калейдоскоп» кштимань коллектифнень кштимань няфтемасна.
Аш кода аф азомс «Сиянь вайгяльхть» хорть, «Вдохновение», «Светлица», «Переправа» вокальнай ансамбльхнень морамаснон колга. Ваныхненди казсть павазу минутат синь вайгяльснон кулхцондомс.
Сембе концертонь программась аноклафоль цебярьста, арьсефоль эрь номерсь. Но башка ваныхнень седиснон токазе, мяльснон салазе войнать колга театрализованнай пакшсь, конань няфтезь «Златоуст» художественнай валонь кружоконь участникне. Оцю таколдома ваныхнень седис кандсь СВО-нь ветераттнень морамасна. Руслан Пантелейкин моразе «Стаканца тяштеня» мороть, а Андрей Барашкин—«Сянгяря тюсонь тонь кельгома сельмотне».
Инсарскяй районть концертонь программастост ваныхне няезь, кода фкя пингсь полафневсь лияса, аськолямок фкя событиятнень эзда омбоцетненди. Концертонь няфтихне лац пачфтезь эсь масторснон самобытнай шинц.
Любовь МАРКИНА.