«Искусствань веть» вельде—патриотизмати!

4 ноябрьста Мордовия Республикаса, кода и марнек странаса, отмечавсь Народнай единствань шись. Тя праздникть лемс республикаса ётафтовсь лама аф фкя лацонь мероприятия, коса азондовсь илать эвондаманц и сонь оцюдонга оцю питненц колга Россиянь лама национальностень народть тяниень эряфса.
Тяфтама мероприятиятнень эзда фкясь 4 ноябрьста келиста ётафтовсь Саранск ошень П.С.Кирилловонь лемса Краеведческяй библиотекаса «Искусствань ве-2022» Всероссийскяй акциять мяльса кирдезь. «Народнай единствань ши» мероприятиять эсь выступлениянц мархта панжезе библиотекать заведующаец Н.М.Бояркина. Сон азондсь пуромфненди илать историянц колга.
Кода содаф, 1612 кизонь 4 ноябрьста Россиянь лама национальностень народонь ополчениясь, конань пуроптозь и вятезь Нижний Новгород ошень земскяй старостась Кузьма Минин и князсь Дмитрий Пожарский, нолдазе воляс польскяй интервенттнень эзда Моску ошть!
И тянь мархта путфоль пе Смутнай пингти, кона ушедсь Россияса Иван Грознай оцязорть куломда меле и мольсь ся пингс, мзярда оцязоркс кочкафоль Михаил Фёдорович Романов.
Ули кода азомс: Народнай единствань шись эсь лемонц вельде лятфнесы тейнек—Россиянь лама национальностень народти, мзярда сон марса, сяськови эрь врагсь, а Родинась лихтеви любой паласта-зиянцта!
Сяда тов библиотекань сотрудникне ётафтсть пуромфненди «Вов сон кодама, тядянь-алянь масторсь!» лем ала краеведческяй экскурс. Пингстонза пачфтсть республикать и странать марстонь сатфксснон, мокшэрзянь крайть содаф ломанензон, национальнай культуранц и литературанц колга. Сяльде няфтьфоль «Коень наследникт» видеороликсь, коса азондовсь творческяй ся ломаттнень колга, конат тячи работайхть мокшэрзянь национальнай культураса, литератураса и печатьса.
«Искусствань ве-2022» Всероссийскяй акциянь фотозонаса ульсь кода няемс Степан Эрьзянь инь содаф скульптуранзон и Федот Сычковонь картинанзон фотоснимкаснон.
Мекпяли илас сафне ванозь «Кельк и содак тядянь-алянь крайть» и «Народнай единствань ши» информационно-тематическяй выставкатнень, конат П.С.Кирилловонь лемса Краеведческяй библиотекаса кармайхть работама ноябрь ковть аделавомс.
В.НЕСТЕРОВ.