Мокшэрзянь национальнай драматическяй, рузонь драматическяй и музыкальнай театратне, С.Д.Эрьзянь лемса изобразительнай искусствань и И.Д.Воронинонь лемса краеведческяй, Военнай и трудовой подвигонь музейхне, Республикань Кудть конференц-залоц, Н.П.Огарёвонь лемса Мордовскяй госуниверситетть Культурань и искусствань дворецоц, «Высота» образованиянь центрась—нятненди и республикань ламоц лия зданиятненди интерьерть тиезе мокшалясь Иван Щанкин.
13 сентябрьста С.Д.Эрьзянь лемса музейть выставочнай залсонза панжевсь «Иван Щанкин. Искусство интерьера» выставкась, а стане жа ётафтовсь тяфтама жа лем ала книганц презентацияц.
Иван Петрович шачсь 1963 кизоня Ковылкинскяй райононь Од Пшень велеса. 1988 кизоня шумордазе Ф.В.Сычковонь лемса Саранскяень художественнай училищать, 1993 кизоня—С.Г.Строгановонь лемса Московскяй государственнай художественно-промышленнай академиять. Сон—«Союз дизайнеров» Мордовскяй региональнай отделениять васенце руководителец, Мордовия Республикань Заслуженнай художник, Художествань Российскяй академиянь член-корреспондент. Выставкать панжемац и книгать нолдамац лемдевсть художникть 60 кизонь юбилеенцты и 30 кизонь кувалмоса творческяй кинцты.
«Искусство интерьера» книгать презентациянц панжезе Художествань Российскяй академияса дизайнань отделениять вице-президентоц Андрей Бобыкин. Приветствиянь валхт юбилярти и сембе инжихненди азсь Культурань, национальнай политикань и архивнай тевонь министрть васенце заместителец Александр Карьгин. Книгань издательсь Константин Шапкарин, кона нолдазе «Искусство интерьера» монографиять, азондозе инжихненди, кода вятевсь книгать лангса работась.
Книгать презентациянц меле панжевсь Иван Петровичень васенце персональнай выставкац. Мордовия Республикань Правительствать Председателенц васенце заместителец Галина Лотванова поздравляндазе мокшалять и мярьгсь: «Тон павазу ломанят! Нинге идькс пингста кочкайть эсь кицень и молят эзганза тянемс. Тя выставкаса няфтьф работатне нолдафт эряфс, синь кеняртьфтихть и кармайхть ламос кеняртьфнема ломаттнень».
МР-нь Госсобраниянь Председательть заместителец Сергей Вдовин азсь юбилярти лямбе валхт и казезе Государственнай Собраниять Почётнай грамотанц мархта.
Художниксь виденцясь, што идькспингста сявомок ульсь мялец арамс живописецокс. Сяс выставкать эса няфтевихть аф аньцек дизайнерскяй работанза, но и графическяй и живописнай картинанза.
Мзяра Выставочнай залса ульсь ломаньда 13 сентябрьста, улема, ашель фкявок выставкаса: юбилярть семьяц, ялганза, коллеганза, пяшксель од ломаньда. Инжихненди няфтьфоль Иван Щанкинонь творчестванц колга киноста пялькс. Маластонь пингть киноть арьсеви тиемс педа-пес.
«Ёран, штоба тяниень пингонь студенттне-дизайнерхне сальхть выставказон и шарфтольхть мяль перьфпяльть лангс. Сяс мес аньцек перьфпяльсь максси тейнек вдохновения»,—мярьгсь Иван Щанкин.
«Искусство интерьера» экспозициясь—«Проект 13» вастста вастс ётафневи выставкать пяльксоц. Саранскяйса сон ули 8 октябрть самс, а сяльде сявови Саратову «Искусство и власть» Международнай научно-практическяй конференцияти.
Оксана плотникова.