3 октябрьста Саранскяйса, С.Д.Эрьзянь лемса изобразительнай искусствань республиканскяй музейса панжевсть Мордовия Республикаса Рузонь государственнай музейть шинза. Музейса келептевсь рузонь великай живописецть Иван Шишкинонь картинань выставкац. Эзонза лихтьфт мастерть инь содаф произведениянза.
—Мордовия Республикаса Рузонь государственнай музейтьвыставкать панжевомаснон мархта пуромфнень поздравляндазень МР-нь Правительствать Председателенц васенце заместителец Галина Лотванова.
—Кельгома ялгат, коллегат, Саранск ошень и Мордовиянь эряйхть,—мярьгсь искусствань кельгихненди Галина Алексеевна.—Тячи республиканьконь эряфса культурань оцюдонга оцю события. Тя—Мордовияса Рузонь государственнай музейть шинзон и рузонь великай живописецть Иван Шишкинонь картинань выставканц панжевомасна! Тяда башка, республикасонк васенцеда сась Рузонь государственнай музейть генеральнай директороц, Россиянь художественнай музейхнень Ассоциацияснон председателец Алла Юрьевна Манилова. И тянкса, и Иван Шишкинонь выставканц инкса культурань содаф деятельти мон азондан оцюдонга оцю сюкпря! Надиян, што культурань сотксне, конат ладявсть Рузонь государственнай музейть и Мордовия Республикать ёткса, кизоста кизос кармайхть кемокснема. И минь марса анокласаськ культурань форумть, кона Мордовияса и сембе Россияса ётафтови 2026 кизоня гениальнай скульпторть Степан Дмитриевич Эрьзянь 150 кизонь юбилеенц лемс!
Эсь ширденза Алла Манилова пачфтезе пуромфненди, кле, Рузонь государственнай музейть и Мордовия Республикать ёткса культурань сотксне кемокставихть картинань од выставкаса 2025 кизоня. Арьсеви С.Д.Эрьзянь лемса музейса панжемс рузонь великай живописецть Валентин Серовонь картинань выставканц. А 2026 кизоня Рузонь государственнай музейса панжеви С.Д.Эрьзянь скульптурань выставкац, кона кармай лемтьф гениальнай скульпторть шачема шистонза 150 кизонь топодемати. Сяльде тя выставкась няфтеви Саранскяйса и странань лия региоттнень эса.
Корхтамок Иван Шишкинонь выставканц колга, Алла Манилова макссь теенза творческяй оцю питне. Выставкати, кона кармай работама С.Д.Эрьзянь лемса музейса сай кизонь 12 январьти, лихтьфт мастерть инь цебярь работанза. Синь инксост сон аф весть казьфоль творческяй лама казнеса.
Мордовияса Рузонь государственнай музейть и выставкать панжевомдост меле С.Д.Эрьзянь лемса музейть директороц Людмила Нарбекова ётафтсь пуромфненди экскурсия экспоцициятнень эзга.
Владимир НЕСТЕРОВ.