Инсарскяй райононь Кацятов мокшень велесь кунара содаф асу, тевонь кельги, национальнаень ванфты ломанензон мархта. Тя сембось ётни тяса поколенияста поколенияс. Аш месть корхтамс, маштыхть тяса и покодема, и кштима-морама. Гордостень марязь щашендсазь Кацятовонь мокшаватне эсь народонь щапнень-каряпнень и няфнесазь синь мазышиснон велень, районнай, республиканскяй, а кой-коста межрегиональнай и Всероссийскяй пуромкснень эса выступлениятнень пингста.
Кацятовть прянь шнафтома вастонзон эзда фкясь—тя велень «Мокшаваня» Народнай хорсь, кона пуроптфоль нинге Великай Отечественнай войнада инголе. Тяни теенза 80-да лама киза. Эсонза морси кой-кона мокшаватне тя тевснон ушедозь лама кизода инголе и лувсазь сонь оцю честекс. Эздост фкясь—Кацятовть шачф-удалаф стирец, лии нармонень «паця» мокшавась Любовь Асташкина. Любовь Петровнань колга тячи оцю мяльса пачфттяма «Мокшаваня» рубрикасонк.
Шачсь Любовь Асташкина Кацятовса Людмила и Пётр Климкиттнень семьяса. Людмила Гавриловна и Пётр Степанович шачфтсть-касфтсть колма шабат: Любовь Петровнань улихть альнякац Игорь Петрович и дуганоц Степан Петрович.
Мокшавась лац мяляфтсы, кода тусь Кацятов велень школань нулевой классу. А васенце классу Люба Климкина тусь лия велеса. Тядяц, Людмила Гавриловна, бухгалтероль. Алянц, Пётр Степановичень, путозь Шадымо-Рыскино велень колхозонь председателькс. Тя вели эста сисем кизос эряма ётнесь Климкиттнень семьясна. Тяса Любовь и тонафнесь сисем кизот—васенце класста сявомок сисемцети молемс. Кацятову мрдамда меле семьянь азорсь главнай агрономоль «Кочетовский» совхозса. Пётр Степанович тяни аш шиса, Людмила Гавриловна стаки эряй Кацятовса.
Эсь велень школать кемонце классонц шумордамдонза меле Любовь Климкина поступась тонафнема М.Е.Евсевьевонь лемса Мордовскяй государственнай педагогическяй институтонь химико-биологическяй факультету. Вете кизот мокшень стирсь тонафнесь очнай отделенияса. Высшай образованиять колга дипломть получамдонза меле кой-мзярс работась учителькс Инсарскяй райононь Кириклеевскяй Майдан велень школаса. Сяда тов лиссть цебярь полафткст Любовь Петровнань личнай эряфсонза—сон тусь рьвакс Кацятов велень мокшень лама идень семьяса шачф-касф цёрати Фёдор Асташкинонди. Кизода меле мирдсь и рьвясь «васьфтсть» оцюдонга оцю паваз мархта—Асташкиттнень семьяса шачсь стирьсна Олеся.
1992 кизоня Любовь Петровна ушедсь работама библиотекарькс Кацятов велень библиотекаса. И тя тевсь пяк тусь мялезонза. Улемс тняра книгань «азоравакс», эрь шиня «васьфнемс» омба масторонь, минцень классикнень произведенияснон мархта—кали тя аф кенярдема? Библиотекарсь васенце шиста сявомок мярьгсь эстеенза: «Аш книгат, конат аф салсихть мяль! Аньцек содама, кодама книга эряви эрь морафтыти». Сяс, мзярда библиотекав сашендсть велень эряйхне, Любовь Асташкина тиендезе семботь теест «самай ся мяльс туй книгать» кочкаманц инкса.
Велень библиотекаса мокшавась работась комсь ветие киза. Меле сяда тов поладозе библиотекарень тевть и, тяка пингть, клубонь работниколь. Пингонь ётазь сонь путозь велень Культурань кудти директоркс. Тяни сон Кацятов велень Культурань кудть заведующаец. Целайнек культурати макссь 32 киза и тянивок работанц тиендьсы седикс-ваймокс.
Тяниень пингть велень Культурань кудса работайхть колма ломатть: заведующайсь Любовь Асташкина, библиотекарсь Валентина Голованова, художественнай руководительсь Светлана Азыркина. Нинге ули урятци. Фкя-фкянь шарьхкоди, фкя-фкянди лезды тяфтама командаса работай мокшаватнень марс пуропнесыне нинге ся, што сембе синь—«Мокшаваня» Народнай хорть мазы вайгяль цёфксонза.
«Мокшаваня» Кацятовонь Народнай хорса Любовь Петровна морси кунара. Ялгакс тя коллективть мархта арась нинге школаса тонафнемста. Саранскяйса вузть шумордамдонза, Кацятову мрдамдонза и стиренц Олесянь шачемдонза меле мрдась «Мокшаваняти» и ся пингста сявомок ашезь явонда мархтонза.
Любовь Петровна и Фёдор Никитович колмоксть щават-щятят. Стирьсна, Олеся Фёдоровна, туф рьвакс. Мирденц мархта работайхть Москуса, Инсараса строяйхть эстеест куд. Асташкиттнень уноконясна—13 кизоса София, 11 кизоса Максим, 5 кизоса Варвара сидеста сашендыхть Кацятову, оцюфне кельгсазь тяса ётафнемс каникуласнон.
Асташкиттне, кода и велень ламоц ломаттне, тевфтома аф ащихть мзярдовок. Фёдор Никитович покоди Кацятовонь «Заря» ООО-са. Мирттне-рьвятне касфтыхть тувот, кирдихть сараст. Нинге меля-мана пирьфсост ульсь несколька вазня. Переса касфнихть модамарь, лия перень сёрот, мезсь, тундаста сявомок пцтай ловонь прамати, веши аф кржа вий.
Кельгома тевонзон эзда фкакс Любовь Петровнанди ащи кодамась. Мокшавась машты кода вндерняса, стане и кячкаскаса кодама. Но заняфшить сюнеда теест сяда сидеста кярьмотькшни тялонда. Эсь кядьса кодаф носокнень казендьсыне ломаттненди. Кячкаскаса уноконзонды котци васьт-месть.
Эрь шиня Любовь Асташкина эряскоды кельгома работазонза. Кацятов велень Культурань кудса (мархтонза фкя зданияса) аф кунара панчсть ФАП. Нинге тяса—велень библиотекась. Мокшавась вестевок ашезь каенда, мес судьбац кадозе сонь ёмла родиназонза—Кацятову.
Татьяна Альшина.