С.Д.Эрьзянь лемса изобразительнай искусствань Мордовскяй республиканскяй музейса 28 декабрьста «Кочкаф произведеният» лем ала панжевсь советскяй и российскяй живописецть, графикть, плакатистть О.М.Савостюконь персональнай выставкац. Выставкас лихтьфоль 30-да лама аф фкя лацонь произведения, конатнень мастерсь сёрмадозень пцтай 75 кизоста.
Живописень академикть персональнай выставканц панжезе С.Д.Эрьзянь лемса изобразительнай искусствань Мордовскяй республиканскяй музеень директорть научнай работать коряс заместителец Александра Лобанова. Эсь выступлениясонза сон макссь оцю питне О.М.Савостюконь лама ширдень творчестванцты, конань аньцек аф оцю пяльксоц няфтьф тячиень выставкаса, кона кармай работама 2023 кизонь 6 февральти молемс.
Мордовия Республикань Общественнай Палатать председателец Иван Капитонов, поздравляндамок пуромфнень выставкать панжевоманц мархта, азсь оцю сюкпря сонь аноклаензонды Од кизонь казнеть инкса. Сон серьгядезень республикань Культурань, национальнай политикань и архивнай тевонь министерствать и С.Д.Эрьзянь лемса музейть пингонь ётазь анокламс О.М.Савостюконь творчестванц коряс нинге фкя мероприятия.
Лама цебярь вал картинатнень колга, конат няфтьфт выставкаса, пуромфненди азсь Николаевка посёлкань Покровскяй церькавонь настоятельсь, протоиерейсь Виктор Зимин.
Крхкаста и келиста мастерть творчестванц, стиленц эсь лацонь ширензон колга пуромфненди азондсь тя выставкать куратороц, С.Д.Эрьзянь лемса изобразительнай искусствань Мордовскяй республиканскяй музеень научнай старшай сотрудниксь Елена Вишнякова.
Сон тяфта жа пачфтсь О.М.Савостюконь тяда ингольдень персональнай выставканзон колга, конат ётафневсть Москуса, Санкт-Петербургса, Парижса и европейскяй лия столицатнень эса.
Мекпяли выставкас сафненди и сонь аноклаензонды-ётафтыензонды оцю сюкпря азсь мастерть цёрац, Москувонь Художниконь союзонь членць Михаил Савостюк.
В.Иосифов.