Картинасост—эряфсь

С.Д.Эрьзянь лемса изобразительнай искусствань республиканскяй музейса панжевсь Санкт-Петербургскяй художникнень, браттнень-альнякатнень Андрей и Николай Дмитренкотнень «Интеллектуальный реализм» лем ала персональнай выставкасна. Эзонза художникне лихтсть пцтай 100 картина. Синь няфнесазь странань ломаттнень эряфснон.
Кода азозе выставкать панжемста С.Д.Эрьзянь лемса музейть директороц, Мордовиянь Народнай художниксь Людмила Нарбекова, аньцек оцю асуши мархта художникненди няфневи афкуксонь эряфсь. Синь произведениясна ванфневихть Россиянь и омба масторонь инь содаф художественнай галереятнень эса.
Художникнень персональнай выставкаснон панжевоманц мархта поздравляндазь республикань культурань, национальнай политикань и архивнай тевонь министрть заместителец Юлия Елисеева, тя выставкать куратороц, музеень научно-исследовательскяй отделонь заведующайсь Виктор Махаев. Синь валснон коряс, художникне эсь картинасост тонафтсазь тяниень пингонь ломаттнень кельгомс фкя-фкянь, эрямс тя модать лангса киндивок кяжень аф тиендемок, ванфтомок Отечестваньконь.
Андрей и Николай Дмитренкотне азсть оцю сюкпря выставкас сембе сафненди.
«Интеллектуальный реализм» выставкась кармай покодема 3 августти молемс.
Владимир Нестеров.