Курок туй историяв 2024 кизось. Г.И.Сураевонь-Королёвонь лемса «Келу» фольклорнай ансамбльти сон ульсь эсь лацоннекс—юбилейнайкс. Топодсь 45 киза, кода Мордовиянь фкя инь содаф и ламотненди кельгови коллективсь кеняртьфнесамазь кунардонь пингонь мокшэрзянь фольклорнай моронь лама вайгяльса мазы мораманц мархта. «Келу» ансамбльсь—мокшэрзянь культурать эсь лацонь ширензон ванфтысна, народть морамань козяшинц колга мирса-масторса пачфтись. Коллективть седиень токай моронза кулендевихть аф аньцек Мордовияса. Морайхнень-кштийхнень маштомошисна няфтьфоль Россиянь ламоц уженятнень эса, а нинге Германияса, Швейцарияса, Венгрияса, Финляндияса, Польшаса.
Тяниень «Келусь» эвондась самодеятельнай хорста, конань пуроптозе асу композиторсь, народнай моронь кочкайсь и тонафнись, лама вайгяльса морамань пентатоникать тонафниец, а сяльде ни Россиянь искусствань Заслуженнай деятельсь, Мордовия Республикань Государственнай премиянь лауреатсь Георгий Иванович Сураев-Королёв. Од коллективти максфоль священнай шуфтть лемоц—«Келу», конанди мокшэрзянь фольклорса ули лемтьф мора. Г.И.Сураевонь-Королёвонь обработкаса «Келу» морось арась ансамбльти визитнай карточкакс. 1963 кизоня «Келути» максфоль профессиональнай коллективонь лем.
Тяниень пингть «Келу» ансамбльть репертуарсонза сядода лама произведения. Оцюшкась, конешна, Георгий Иванович Сураевонь-Королёвонь обработканза, но улихть и Нина Кошелевать, Гавриил Вдовинонь, Николай Бояркинонь, Василий Родионовонь, Анна Лёвинать, Николай Спиркинонь музыкальнай арьсефсна.
«Келусь» козя моронь ширде, но сембода оцю козяшиц, тя сонь кеме тарадонза—мазы вайгяль стирьхне-аватне, конат эсь творчестванон мархта ванфнесазь мокшэрзянь музыкальнай культурать. Кой-кит морсихть фольклорнай тя ансамбльса пуроптомстонза васенце шиста сявомок, улихть коллективса и од артистт. Тячи минь пара мяльса макстама теест вал.
МР-нь Заслуженнай артисткась Галина Макшева:
—«Келути» тядде топодсь 45 киза и тняра жа пинге мон морсян тя коллективса. Ёфси од стирнякс сань тяза. Эста аньцек-аньцек шумордайне школать. Ся пингть мокшэрзянь содаф композиторсь Г.И.Сураев-Королёв сась мяльс пуроптомс профессиональнай коллектив, коса морсикс мялецоль няемс велень простой ломаттнень. Сань Саранскяи Георгий Ивановичень шири прослушиванияс, а сон тейне: «Эрька, стирь, морак стане, штоба Краснайса кулеволеть». Краснай посёлкась—тя шачема-касома велезе, кона ащи Сире Шайгав аймакса. Няфтине семботь, мезе маштонь. Вайгялезе тусь мялезонза и мон примафолень коллективу. Тя ульсь тейне аф азовомшка оцю кенярдемакс.
Тя пингста пяк лама вастова удалась выступандамс ансамбльть мархта. Ульсь пинге, мзярда кафта ковс тушендоме командировкас, ётаськ сембе региоттнень. Коза афолеме моле, «Келусь» най васьфневсь аш ни кода лямбоста.
Юбилейнай кизоня мялезе арьсемс кельгома коллективозти творческяй кели ки, сяда лама концерт, штоба ансамбльть афолезь юксне ваныхне и шарфнельхть лангозонза мяль вяре ащихне. Ансамбльса морсихненди—шумбраши и паваз!
МР-нь Заслуженнай артисткась Любовь Князькова:
—«Келу» ансамбльсь—тя монь омбоце кудозе, коза мон сашендан вов ни 36 киза. Пяк кельгса коллективть. Тяза морсема примафолень Л.П.Кирюковонь лемса музыкальнай училищада меле. Весть класснай руководителезе азозе тейне, кле, училищаса вяти частт «Келу» ансамбльть руководителец Анна Яковлевна Лёвина, мон корхтан мархтонза, шять, сяфтянза коллективу морсема. Курок васьфтьфтемазь Анна Яковлевнань мархта. Ся кулхцондомань, шарфнемань-ванондомань. Вайгяльце, кле, ару, кайги, ронгска удалафат, шамаска мазыят. И вов дипломонь получамда меле сявомань «Келути». А аф лама пингта меле ульсть ни васенце гастрольне Ардатовскяй району. Колмогемонь котува кизоста эздост пяк ламоль, сембе афи лятфтавихть. Сембода мяляфтовикс тейне арась «Голоса России» российскяй теле-и радиоконкурсса «Келуть» участвовандамац, коса коллективсь занязе омбоце вастть. Мордовияв мрдаме пацявста.
Тядде кельгома «Келувоньконь» юбилеец. Катк тяфтама илада ансамбльть кибрясонза кармай нинге пяк и пяк лама! Ансамбльти арьсян панчфокс панжема. Катк вииста кармай кайгома «Келуть» вайгялец, содафнемок странань и миронь-масторонь эряйхнень мокшэрзянь лама вайгяльса морамать мазышинц и козяшинц мархта.
МР-нь Заслуженнай артисткась Анна Зуева:
—Школаса тонафнемстон шачема-касома велезон, Рузаевка аймаконь Сузгярьги, сась концерт мархта «Келу» ансамбльсь И монь сяшкава тусь мялезон коллективсь—моротне, артисттнень вайгяльсна, сцена лангса прянь вятемасна, эстокиге эвондась оцюдонга оцю мялезе шоворемс ансамбльти. Сань Саранскяи Анна Яковлевна Лёвинати прослушиванияс, а монць таколдонь и виздень аф азовомшка кода. Сон кулхцондомань и примамань. И вов колмогемонь нилие киза ни тясан. Сюконян коллективса эстонь морсихненди, конат лац примамазь, ламоти тонафтомазь. «Келути» самдон меле аф лама пингонь ётазь ни ульсь васенце командировказе, да аф коза-коза, а омба мастору—Финляндияв. Велень од стирти тя афкукс оцю павазоль.
Колмогемонь нилие кизось ётась апак маряк. «Келусь» кемоста сувась эряфозон, коллективсь кода омбоце семьязе. Юбилеень кизоня арьсян ансамбльти и эсонза сембе морсихненди кеме шумбраши, сатнемс творческяй от тёкшт и лама концерт.
МР-нь культурань Заслуженнай работниксь Ирина Макейкина:
—«Келу» ансамбльти сань 1999 кизоня, Н.П.Огарёвонь лемса Мордовскяй госуниверситетонь Национальнай культурань инститтуть шумордамдонза меле. Мольсь дирижированиять коряс васенце госэкзаменоньке. Комиссияса ульсь «Келуть» эстонь вятиец Николай Спиркин. Маладсь экзаменда меле и мярьгсь, што ансамбльти эряви хормейстер. Тердемань монь. Васенда ульсь кодама-бди таколдома, сафтови или аф, но валом-валом тонадонь, прянек-пильгонек ваянь тевти.
Тячи ансамбльсь тейне, кода мала ломань, а тяса эрь морсись—цебярь ялга. «Келусь»—минь мокшэрзянь арзяняньке. Лангозонза эряви шарфтомс сяда оцю мяль. Коллективсь трудяй, артисттне макссесазь сембе вийснон-эрьгаснон кельгома тевснонды. Кеняртьфти, мес ширезонк сашендыхть од морсихть, конат курокста и тёждяста шоворькшнихть творческяй семьязонк. Арьсян «Келути» сатфкст, од выступленият, лама ваны.
Ансамблень артисткась Ираида Родькина:
—Колмогемонь кафтува киза морсян «Келу» ансамбльса. Шабакс ваймонь апак тарксек ванонь телевизор, мзярда няфнезь «Келу» ансамбльть, кона эста ни содафоль лама вастова. Сюконян Галина Николаевна Макшевати, кона тердемань ансамбльти 1992 кизоня. Коллективть эстонь вятиец Николай Спиркин кулхцондозе вайгялезень и сявомань. Васенда ульсь пелькс морсемс тяфтама содаф коллективса. Кепотьксокс тейне эстокиге арасть ансамбльса морсихне Галина Макшевась, Анна Атласовась, Нина Спиркинась. Саворне-саворне стаки тонадонь мельгаст. Тяни монцьке однятненди кой-коста макссян советт. А синь. ансамбльса од морсихне, эряви азомс, пяк асуфт, сяс ули кинди поладомс тевоньконь.
«Келу» ансамбльть юбилеень кизонястонза арьсян теенза валда ки. И, конешна, сянь, мезсь инь питнись эрь артистти—сяда лама концерт и цебярь ваны.
Ансамблень артисткась Наталья Ермошкина:
—Училищаса дипломнай тевть араламдонза ингольдень практикать ётайне «Келуса». Тяда инголе седисон-ваймосон кунара ни «эрясь» мяль морсемс тя коллективса. Токсезь седиезень мокшень кувака моротне, лама вайгяльса морамась. «Келуть» эстонь вятиец Николай Спиркин кулхцондозе морамазень и кадомань. Тя ульсь 1997 кизонь 14 апрельста. Мзяра концерт ётафтф тя пингста, мзяра мора мораф, мзяра инжи примаф-васьфтьф… Мекольдень пингть ичкоздень региоттненди командировкадонк уленди сяда кржа и тя колси мяль. «Келу» ансамбльть мялец няфтемс мокшэрзянь морамань культурать сяда лама вастова и сяда сиденяста содафнемс мархтонза оттнень, штоба сон ётнель поколенияста поколенияс. Катк «Келуть» творчестванц кельгидонза ули сяда лама, а сонць, кельгома коллективоньке, касонды-виензакшни!
Редакциять эзда:
«Келу» ансамбльсь—Мордовия Республикать визитнай карточкац, оцю гордостец. Сонь кельгсазь и учендсазь ваныхне. Арьсетяма коллективти творческяй кувака и кели ки, од сатфкст, а артисттненди—кеме шумбраши и павазу эряф!