КАЗЕЕФНЕНЬ АСУ СЕМЬЯСНА

Зубово-Поляна посёлкаса эряй-ащи лама асу семьяда. Фкясь синь эздост Казеефнень семьясна. Сергей Викторович трудендай Зубово-Полянань газонь хозяйстваса. Сон цебярь специалист эсь тевсонза. А нинге ялгафни музыкать мархта. Шабакс Сергей Казеев якась тонафнема искусствань школав. И тоса кочкаф содамошитне пяк лездсть оцювонь эряфсонза. Тяни сон морай гитараса, пианинаса, гармонияса. Эсь лацонза тусть и колмоцьке иденза.
Оцю стирьсна, Ирина, пяк кельгозе кштимать. Примась участия лама концертса. Вейхкса классонь аделамда меле тусь тонафнема Темникавонь медицинскяй училищав.
Тясовок асу стирнясь кенерсь няфтемс эсь прянц. Ульсь ни аф фкя мероприятияса.
Омбоце стирнясна, Александра, морай «Поляночка» ансамбльса. Теенза тяни 12 киза. А ушедсь морсема вете кизоняса. Тяфта жа ульсь лама концертса, мероприятияса. Пялькстоматнень эса лисендсь сяськикс. Казьф лама казнеса. Тяни морай и цёранясна, Клим. Сон тядде тусь васенце классу. Шабатне тонафнема якайхть Мордовия Республикань культурань Заслуженнай работникти В.Н.Антроповати.
Ня колма асу шабатнень тядясна, Антонина Александровна, покоди Зубово-Полянань населениять социальнай ширде араламань коряс отделсонза. Сон кельгома рьвя, павазу тядя.
—Сюконян Шкайти, мес тейне макссь тяфтама асу мирде, итть,—корхтай Антонина Александровна.—Семьяньке афкукс музыкальнай. Тя тевонди мезевок аф ужяльттяма. Якатама концерттнень, лия мероприятиятнень эзга. Ваныхне минь васьфнесамазь пяк лямбоста.
Лямбе валхт Казеефнень семьяснон колга азсть культурань кудса, школаса. Шабатне аф аньцек лац морайхть, но и тонафнихть. Родительхне школаса фалу учсеф и кельгома ломатть.
Илья ВЕШКИН.