27 мартста Саранскяйса, Мокшэрзянь национальнай драматическяй театраса, ётафтовсь торжественнай пуромкс, кона лемтьфоль Театрань Международнай шити. Эсь профессиональнай иласнон васьфтезь актёрхне, режиссёрхне, бутафорхне, художникне и сембе сят, кинь вельде эряй театральнай искусствась.
Мордовия Республикань Оцюнять Артём Здуновонь лемста благодарностень валхт азсь республикань культурань, национальнай политикань и архивнай тевонь министрть васенце заместителец Александр Карьгин. «Мордовиянь театратнень улихть синцень ванысна. И пяк кеняртьфти, мес мрдась ся койсь, мзярда спектакльхненди аф сатнихть билеттне. Сюкпря, мес лезттада касфтомс обществаньконь духовнай и нравственнай ширензон»,— мярьгсь Александр Иванович.
Тяддень театрань шись ётафтовсь «Театрась сяськоманкса» девиз ала. Сяс артисттне нинге весть лятфтазь сятнень, кит аралайхть Родинаньконь эса. Азфтольхть ся артисттнень лемсна, конат эсь мяльснон вельде примайхть участия специальнай военнай операцияса. Мокшэрзянь национальнай драматическяй театрань актёрхне няфтсть «Не забывай незабываемое» спектакльста пакш.
Пара койс коре, Театрань международнай шиня ламотне получасть казнет. «Мордовия Республикань Заслуженнай артист» почётнай лемсь максфоль Мокшэрзянь национальнай театрань актёрти Андрей Анисимовонди и И.М.Яушевонь лемса музыкальнай театрань балетонь солистти Илья Перепёлкинонди. Мордовиянь Оцюнять Почётнай знаконц мархта казьфт Мокшэрзянь национальнай драматическяй театрань актёрсь Алексей Егранов и някань государственнай театрань главнай художниксь Наталья Кочнева.
Режиссёрскяй инь цебярь работакс азф Эдуард Храмовонь од постановкац—«Снегурочка» оперась. Инь цебярь дебютокс эксперттне кочказь вокалистть Михаил Торинонь, кона моразе «Снегурочкаса» Якшама Атять партиянц.
Мордовиянь Оцюнять колма премиянзон сатозе Мокшэрзянь национальнай театрась, кона, конкурсть мяльса кирдезь, няфтезе мокшень драматургть Валентина Мишанинать «Менелень нюрям» пьесанц коряс спектакльть. Художниксь Татьяна Чувыкина казьф сценографиять и щапнень инкса. Актёрсь Максим Акимов сяськсь «Алянь инь цебярь рольсь» номинацияса. Мокшавась Елена Гудожникова сяськсь «Авань инь цебярь рольсь» номинацияса.
«Омбоце планонь инь цебярь рольсь» номинацияса сяськсь Рузонь драматическяй театрань актёрсь Николай Большаков.
Ваныхнень вайгяльснон коряс «Кизонь театра» номинацияса омбоце кизось мельцек сяськсь Государственнай рузонь драматическяй театрась. «Кизонь спектакль» номинацияса сембода лама вайгяльда кочкась Пётр Чайковскяень «Спящая красавица» балетоц, конань Мордовиянь Оцюнять целевой грантонц лангс путозе И.М.Яушевонь лемса музыкальнай театрась. Иттненди инь цебярь спектаклькс арась «Садко» ёфкссь. «Кизонь артист» номинацияса сяськсь Мокшэрзянь национальнай драматическяй театрань актёрсь Алексей Егранов.
Оксана Белкина.