Мокшаватнень ёткса лама машты кядь ломаньда. Синь тиендихть мазы паршихть, конатнень няемста дивандама сяфтянза. Мокшаватне и сёрмадыхть, и стайхть, и кодайхть, и сюлгапт-крганят кочксихть-тиендихть. Ваймосна фалу венеми творчествати. Кудъётконь пефтома тевда башка аваньке фалу тяряфнихть тиемс мезе-бди одня, сядонга мазы и мялень салай.
Темниковскяй райононь Кондровка велеста Нина Семёновна Бисяева тиенди мялень салай паршихть кяскавонь котфста, ленгяста, шуфтонь керста и ракакудняста. Сонь тифксонза аф весть няфневсть эрь кодама илатнень и фестивальхнень пингста кода Темниковскяй районца, стане и Саранскяйса. Авать, кода цебярь мастерицань, лац содасазь марнек республикаса и шабра региоттнень эсовок. А вдь тяфтама мялень салай паршиень тиендемати сон кярьмодсь ёфси аф кунара. 2015 кизоня Нина Семёновна няезень велезост Саровста сашенды авать Галина Филимоновать тифксонзон. Сонга тевс нолясы кяскавонь котфть. Нина Бисяева тяфтама поделкат тяда инголе вестевок ашезь няенде. Синь салазь мяленц и авась тяряфтсь сонцьке тонадомс тянди. Саровонь инжись ашезь атказа, азондозе семботь, мезе эряви. Казсь образецонди кой-мзяра эсь налхкшензон эзда. Вов лангозост ванозь, Нина Семёновна и кармась тонафнема. Ётаф кизотнень пингста кядензон алда лиссть алашанят, крандаскат, няканят, ангелнят, перяфкс мархта меленця и стак тов. А кода-бди весть, содаф флотоводецть Фёдор Ушаковонь юбилеенцты лемтьф илати, сон тись ракакудняста кораблень флотилия—парус мархта 87 венеж. Пцтай сембе синь срадсть казне лаца.
—Мон эсь тифксонень аф мишендьсайне. Лама инксост аф анат, а кржа аш мезенди, материалтьке питненц аф мрдафтсак. Казендьсайне ялганенди, инжиненди, мала ломанненди,—азозе Нина Семёновна.
Материалть мокшавась рамсесы и Москуста, и Саранскяйста, и Нижегородскяй областень Вознесенкс ошста. Тоса предпринимательхне тиендихть шуфтонь матрёшкат. Тя производстваснон эзда лядондыхть эрь кодама эчкса ленгасна, конат пяк кондястихть поделканди. Весть, мзярда рамаф ленгясь аделавсь, авась тяряфтсь сонць анокламс. Мольсь пере песонза касы пешетненди. Фкять эздост аньцек-аньцек синдезе даволсь. Вов лангстонза и ваткась. Аньцек лиссь ленгяц калгода, казяма. Улема, аф эрь шуфтсь кондясти ленгянди. Но тя материалсь стак ашезь юма. Эздонза авась тись меленцянцты вельхкс и перяфкс. Нина Семёновна сидеста нолясы тевс сянь, мезсь ули перьфканза. Кепотьксонди, ангелнятненди пацянят тиенди саразонь толгаста. Налхкшкятне лисендихть сяшкава «лямбоста», нльне эждихть седи и вайме. Мокшавать козя коллекцияц ванфтови Кондровка велень библиотекаса, коса покоди Нина Семёновна. Да вдь библиотекатьке сонць и пуроптозе. 2010 кизоня велесост лиссь оцю зиян, марнек палсь велень клубсь, конань видеса ульсь ингольдень библиотекась. Эста мокшавась покодсь клубса. Зиянда меле сон сась мяльс вельмофтемс лувома кудть. Мольсь районнай центральнай библиотекав, тоста кочкась книгат-месть. Мезе-бди макссть ломаттне. Мувсь помещениявок. И вов библиотекась тага панжезень кенкшензон. Тяса сёрматфнесазь «Мокшень правда» газетать. И катк Кондровкась лувондови рузонь велекс, тяса эряйхть мокша ломатть, конат пара мяльса лувондсазь изданиять.
Сидеста Нина Семёновна ётафни мастер-класст. Аф кунара, кепотьксонди, райцентраса тонафтозень иднятнень и синь тядяснон синтепонцта ловонь бабань тиендема. Сембонь мяльс пяк тусь тя тевсь. Нина Семёновна пуропнесыне перьфканза велень аватненьге. Синь васетькшнихть библиотекаса и тиендихть од налхкшкат-месть кодамовок иланди.
—Тяфтама паршиень тиемась аф стака. Кда кядце моли, лама пинге аф сявихть. Койсон, тя сяськови эрти, кинь ули мялец. Выставкатнень, фестивальхнень пингста маласон фалу шарыхть ломатть, мастер-класснень эса пара мяльса примсихть участия сиренек-однек. Эстейне, рузкс мярьгомс, вдохновения максси сонць эряфсь, перьфпяльсь. Лама тяни ули кода няемс интернетста, телевизорста. Арьсян, творческяй ломанць мусы сянь, мезсь теенза эряви,—мярьгсь Нина Бисяева.
Нина Семёновна ашезь тонафне декоративно-прикладной искусствати. Аделамок Конак шачема велесонза средняй школать, тусь тонафнема райцентрав велень хозяйствань техникуму, коса получась бухгалтеронь специальность. Меле эряфсь вятезе эряма Кондровкав, коса сон покодсь колхозонь идень садикса бухгалтеркс, мзярс ашезь сёлга. Меле 10 кизот косовок ашезь работа, вятезе кудонь хозяйстванц. Сяльде лиссь покодема велень клубу. Но, кда Шкайсь путсь ломанть ваймос творчествань цятконя, сон сякокс тяфта или лиякс няфтьсы прянц.
Ирина Фадеева.