КЕМЕ ШУМБРАШИ ТЕЙТЬ, АННА ЯКОВЛЕВНА!

МАССР-нь искусствань Заслуженнай деятельть Анна Левинать лемоц Мордовияса содаф пяк ламотненди. Анна Яковлевна преподаватель, хормейстер, аф фкя киза ульсь «Келу» коллективти руководителькс. Шачсь мокшавась 1938 кизонь 29 январьста Левжа велеса. Аф кунара мархтонза корхнесь корреспондентоньке, и Анна Яковлевна оцю мяльса отвечась сонь кизефксонзон лангс.

—Анна Яковлевна, азонтт, пожалуйста, эряфонь кицень колга: коса шачеть-касоть, тонафнеть.
—Шачема ширезе—Рузаевскяй райононь Левжа мокшень велесь. Алязень, Яков Учватовонь, ульсь 4 класст образованияц. Сон, кода и велень ламоц эряйхне, работась Рузаевкань машина киса. Стрелочниколь, поездонь сцепщиколь. Тядязе, Мария Адмакина—тя стирень фамилияц, грамотать ашезе сода. Покодсь колхозса трудонь шитнень инкса, кода корхнихть ламотне «палканянкса».
Тядязе и алязе шачфтсть-касфтсть ниле итть. Тонафнемазень ушедыне Левжань школаса. 1947 кизоня семьяньке ётась эряма Рузаевкав, содамошинь кочксема васенда кармань 5№, а меле—15№ школаса.
Кудоньконь ваксса ульсть баракт, конатнень эса эста эрясть эвакуированнай семьят. Сембе пингс мялезон лядсь Гомельста семьясь. Ёмла комнатаса ащесь рояль, конань эста няине васенцеда. Инголенза озафоль ава, сон няевсь тейне афкуксонь баяравакс. Кой-коста инструментть каршес озафоль кизос коре лацон стирняц. Но мзярда няине, што рояльть инголи озси стирнять бабац—дивандань тянди. Пади, эста васенцеда арьсезевонь профессиональнай музыкать колга.
—Анна Яковлевна, мезе ся кизотнень эзда лятфталеть тяни?
—Эряме аф козяста, тядязе и алязе коль покодсть, штоба касфтомс минь. Кирдсть тракс, путнесть пере. Но, аф ваномок тянь лангс, ваймаманди ётка мушендовсь: тядязе содась мокшень лама мора и пяк мазыста морась, а алязе морась карзиса и кельгозе кштиманц.
Шачфтынень-касфтынень колга нинге азан вов мезе—синь маштсть лиянь пичефксонь-ризфонь «кулема». Кудсонк фалу мушендовсь васта ломаттненди. 1937 кизоть песта синь вятезь ширезонк 12 кизоса Мария Курилкоть—Украинаста раскулачендаф и репрессировандаф крестьяттнень стирьснон. Тя стирнясь арась тейнек мала ломанькс, сазоркс и стирькс. Сяльде сон ваннемань, пара ваймоль, кельгомазь. Лезнесь кудонь тевса. Стака судьбанц колга ули кода тяштемс книга. Великай Отечественнай войнать пингста сявфоль фронту, коса передовойса панцесь кши солдаттненди. Фкя бомбёжкать пингста ранендафоль и Левжав мрдась фкя пильгса. Мазы стирсь, конань сатозе тяфтама зиян, ризнась-лажнась, и тядязе тага кирдезе ширенц. Алязе эста фронтсоль. Несколька кизода меле Мария музе семьянц, но, мзярс шисоль, кирдсь мархтонк соткст.
Рузаевкав эряма ётамдонк меле тядязе и алязе ашесть аще каршек, мзярда вятине кудозонк мархтон фкя класса тонафни ялгазень Сания Ямбаевать, конань тядяц кулось, а аляц ичкозе вастсоль. Стирнясь эрясь пялес вачеда ичкоздень раднянь подвалса. Сания ширесонк ульсь, мзярс ашезь са аляц.
Тядязе и алязе нолязь кудозонк эряма странницатнень. Мархтост явондозь мекольце кши сускомняснон. Тянь ули кода азомс Шкайти верондай Ульяна бабать колга. Мзярда сон кулось, шачфтыне-касфтыне калмафтозь эсь ярмакснон лангс.
—Поступать музыкальнай училищав. Кода тя ульсь?
—Саранскяи Музыкальнай училищав ускомань алязе. Васенце консультациять тейне максозе земляконьке, дирижёрсь Иван Резепов. Иван Григорьевич макссь музыкальнай асушизти оценка и мярьгсь поступамс дирижёрско-хоровой отделенияв. Повонь цебярь педагогонь классу. Специальностть коряс ульсь Дмитрий Загорулько, вокалть—Тамара Ситникова, теоретическяй предметтнень—Георгий Сураев-Королёв, фортепианоть—Ирина Щербакова. Тядязе и алязе верондасть, што кочкаф тевса сафтса. И алязе, ся пингть пяк оцю ярмакта, музыкальнай инструментонь фабрикаста кучфтсь пианина. Тейне ушедсь од эряф, и пильгонек-прянек тунь классическяй музыкати.
—Сяда тов ульсь М.И.Глинкань лемса Горьковскяй государственнай консерваториясь?
—Виде тяфта. М.И.Глинкань лемса Горьковскяй государственнай консерваторияв поступань 1962 кизоня. Мархтон фкя курсса тонафнесть Г.Вдовин, П.Криворотов, К.Несмеянкин, В.Солдатов, А.Никоноров.
—Анна Яковлевна, пачфтть аф лама творческяй кицень-янцень колга.
—1965 кизоня ушедонь работама Рузаевкань Идень музыкальнай школаса. 1966-2018 кизотнень преподавателелень Л.П.Кирюковонь лемса Саранскяень музыкальнай училищаса. Педагогонь стажезе—50-да лама киза. Сяс, васендакиге, педагоган. Учениконень ётксот: композиторсь, Мордовия Республикань искусствань Заслуженнай деятельсь Н.Митин, морсихне—Мордовиянь Народнай артисткась Н.Спиркина, Мордовиянь Народнай артистсь С.Плодухин, Мордовиянь культурань Заслуженнай работниксь С.Колесникова и ламотне лиятне.
1984 кизоня учителезе, композиторсь Г.Сураев-Королёв «максозе» тейне эсь «иденц»—«Келу» ансамбльть. Мярьгсь: «Аннушка, тон мокшават, лац содасак культураньконь, и тон—классическяй образования мархта асу музыкантат. Тейть тя тевса сафтови!»
«Келуть» мархта работати максыне сембе вийнень, лама киза улень и ходожественнай руководителькс, и хормейстеркс, и вокалть коряс педагогокс, и сценаристокс, и костюмеркс… 1985 кизоня ансамбльсь арась лауреатокс од ломанень и студентонь ХII-це Всемирнай фестивальса, кона ульсь Москуса, 1989 кизоня теенза максфоль Мордовия Республикань Государственнай премиясь. 1990 кизоня «Келусь» сатозе II премиянь лауреатонь лемть «Голоса России» I Всероссийскяй телерадиоконкурсса (Смоленск ошсь), 1990 кизоня примась участия Финляндияса ётафтф Финно-угорскяй народонь Всемирнай фестивальса.
Тя коллективса работамста шарьхкодине, мокшэрзянь песеннай фольклорсь—тя ся, мезсь тейне афкукс мала и мезть мзярдовок аф кадса.
Аф кржа тиень фольклорнай коллектифнень пуроптомаснон инкса: Левжа велень ДМШ-ть видеса «Пайгонят» идень ансамбльть, интернат мархта РДМШ-ть видеса «Лаймоне» идень ансамбльть, кона руководствазень ала арась Финно-угорскяй народонь идень музыкальнай творчестваса Всемирнай фестивалень дипломантокс, Л.П.Кирюковонь лемса Саранскяй музыкальнай училищать видеса студенческяй фольклорнай ансамбльть.
—Азонтт аф лама семьяцень колга.
—Семьязе—тя инь мала и кельгома ломанне, эряфса нежедема вастоне. Мирдезе, Валентин Левин, специальностьс коре инженер. Фалу кирнезе ширезень творческяй тевнень тиемста. Мзярда работань «Келуса», сашендовсь тушендомс гастрольс. Но ашень таколда, сяс мес содайне, што куду лядсь ломань, конань лангс ули кода надиямс. Валентин Алексеевич сембоса лац шарьхкотькшнесамань. Сон, кода и мон, пяк кельгсы тевонц, конань мархта заняфоль. Работань 80 кизозон, а сон, мзярс теенза ашезь топоде 82 киза. Тяддень июльста ули 60 киза, кода марсотама.
Кафта стиреньке. Марина Валентиновна и Екатерина Валентиновна—педагокт-музыкантт, фортепианоть коряс преподавательхть. Уноконьке Настя—педагог, английскяй кялень учитель, Саша получась инженеронь специальность. Аф кунара шачсь уноконь иденьке Алиса.
—Ёмла родинаце—Левжа велесь. Сидеста-аф улендят тоса?
—Левжать пяк кельгса и вестевок ашине юксне. Мзярда ётаме эряма Рузаевкав, коль арьсень колганза. Нльне несколькаксть якань вели ялга, штоба ваномс седити мала васттнень. Тоза калмафт тядязе и алязе, аказе, брадне, лия радняне.
Фалу кеняртькшнян, мзярда кулендян асу земляконень сатфксснон колга. «Ару лихтибря» фольклорнай ансамбльть мархта кирдян творческяй соткст: несколькасть улень репетициясост, макссень консультацият. И тиендине тянь оцю мяльса!
—Спасиба, Анна Яковлевна, интервьюнкса!
Татьяна Альшина.

Последние новости

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель...

РЕСПУБЛИКАВ САСЬ ОД ТЕХНИКА

«Экология» нацпроектть «Сохранение лесов» региональнай проектонц эряфс ётафтоманц рамкаса...

ВАНФТОЛЬХТЬ ЭРЯВИКС КИЗЕФКСТ

23 июльста Саранскяйса, Республикань Кудть конференц-залсонза, ётафтовсь Мордовия Республикань...

В Мордовии развивается система оказания первичной медико-санитарной помощи

В Мордовии в рамках национального проекта «Здравоохранение» развивается система...

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди кенкшнень. Тейнек, Порапа велень шабатненди, тяфтама ломанькс арась Анна Николаевна Купряшкинась. Смузю, внимательнай, заботендай, но...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь Александрия агроошкаса—Днепр ляйть трваса ётафтовсь «Купалье»—«Александрия собирает друзей» республиканскяй оцю ила. Эсонза примась участия кафта...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель 107 киза. Шачема уженясонза, Торбеева посёлкаса, ётафтовсь лама интереснай ила. Ульсть панчфонь путомат, мужествань урокт,...