Кочетовскяй народнай хорсь—всероссийскяй фестивалень лауреат

24 майста Туласа ётафтовсь «Тульский заиграй» Всероссийскяй фестивальсь-конкурссь, кона лемдевсь традиционнай народнай культурати. Россиянь эрь-кодама уженяста—Архангельскяй, Белгородскяй, Волгоградскяй, Московскяй, Омскяй, Пензенскяй, Тверской, Тульскяй, Самарскяй областтнень эзда и Мордовия Республикаста кемготува ансамбльсь пуромкшнесть ошу, штоба няфтемс народнай творчестваснон.
Мордовияста фестивальса примась участия «Мокшаваня» Кочетовскяй народнай хорсь. Коллективсь арась II степенень лауреатокс.
Кочетовскяй народнай хорсь пуроптфоль нинге Великай Отечественнай войнада инголе, 1940 кизоня. Эсонза морсесть эрь-кодама профессиянь ломатть, конат кельгозь народнай мороть. Васенце руководителькс коллективти ульсь МАССР-нь культурань Заслуженнай работниксь Раиса Григорьевна Климкина. Лама киза хорть вятезе Российскяй Федерациянь культурань Заслуженнай работниксь Анна Трофимовна Асташкина. Анна Трофимовна пяк лац содазень мокшэрзянь койхнень-обуцятнень, сядонгольдень народнай моротнень, тяка пингть старандась сувафтомс эзост мезе-мезе одня. Сон тись обработка комозьда лама мокшэрзянь народнай моронди.
2008 кизоста сявомок коллективть вятьсы Светлана Петровна Азыркина. Светлана Петровнань саманц мархта хорсь арась тяниень пингоннекс. Репертуарсонза, кунардонь пингонь мокшэрзянь морода башка, эвондасть тяниень пингонь композиторхнень произведениясна. Эсь мороснон вельде хоронь участницатне старандайхть няфтемс национальнай характерть эсь лацонь ширензон, историять, народть коензон-обуцянзон, эрь шинь эряфонц.
Кочетовскяй народнай хорть сатфксонзон колга ули кода азондомс пяк лама. Тяфта, 1999 кизоня «Мордовию славлю свою» народнай творчествань республиканскяй фестивальса, кона лемтьфоль Мордовскяй автономиять пуроптомста 70 кизонь топодемати, участвовандаманкса хорсь казьф «Лауреатонь дипломса», теенза максф «Мордовия Республикань Государственнай премиянь лауреат» лем. 2000 кизоня коллективсь ульсь Венгрияса, коса примась участия Финно-угорскяй нароттнень VIII Международнай фестивальсост. 2003 кизоня хорсь няфтезе морамаса маштомошинц Тверской областьса, а 2004 кизоня гастроль мархта якась Германияв. Тяда башка, коллективсь аф весть макссесь концертт Москуса и Московскяй областьса.
Эрь кизоня Кочетовскяй народнай хорсь примси участия «Шумбрат, Мордовия!» Народнай творчествань республиканскяй фестивальса, коса сон аф весть казендевсь «Лауреатонь дипломса» и питни казнеса.
Тячи «Мокшаваня» Кочетовскяй народнай хорса морси кемгафтува ава. Ётксост улихть кода пенсионерхт, стане и работай ломатть. Аф ваномок эрь шинь заняфшиснон лангс, синь аф сашендови кошярямс пуромкшнемс марс репетицияс, лисендемс сценать лангс. Морамась—тя синь кельгома тевсна, кона эжнесы ваймоснон, максси вийхть-эрьгат. Арьсетяма коллективти творческяй од сатфкст, катк сон сяда товга кепсесы мяленьконь седиень токай мокшень мороса, ванфнесы культураньконь.
Ольга ЕВДОКИМОВА.