Кодама морот кайгсть 14 мартста Н.П.Огарёвонь лемса Мордовскяй государственнай университетонь Национальнай культурань институтонь Культурань и искусствань Дворецса? Тянь содасазь сят, кит сашендсть «Кодамо моро минь моратано…» (Какую песню мы споём…) V Межрегиональнай фольклорнай фестивальть-конкурсть участниконзон маштомошиснон ванома.
Аноклазе и ётафтозе сонь Финно-угорскяй народонь культурань Поволжскяй центрась марса Н.П.Огарёвонь лемса Мордовскяй государственнай университетонь Национальнай культурань институтть мархта.
14 мартста шобдаваста сявомок и шиньберьф мольсть прослушиваниятне, а меле жюрись тись итокт и ётась фестивальса-конкурсса сяськихнень каземасна.
«Кодамо моро минь моратано…» V Межрегиональнай фольклорнай фестивальса-конкурсса примасть участия народнай моронь мораень коллектифне, дуэттне, группатне и ськамост морсихне. Сембе синь ванфтсазь и тиендьсазь сяда содафокс Мордовиянь, Башкортостанонь, Нижегородскяй, Пензенскяй, Саратовскяй областтнень традиционнай музыкально-песеннай фольклорснон. Поволжьянь коллектифне кородозь малаткшнихть атянь-атяньконь музыкальнай койснонды.
Сценать лангса участникне морасть фонограммафтома, «эрек» вайгяльса и тя тиендезе эрь выступлениять сяда малакс и кельговикс ваныти.
Фестивальть-конкурсть участниконзон ёткса ульсть и ся исполнительхне и коллектифне, конатнень колга аф весть пачфнеме «Мокшень правдаса». Кепотьксонди, Инсарскяй райононь Мокшень Паёвка велень Культурань кудонь «Поюня» Народнай фольклорнай ансамбльсь, тяка райононь Кацятов велень Культурань кудонь «Мокшаваня» Народнай хорсь, Ковылкинскяй райононь Рыбкина велеста «Ляйня» Народнай фольклорнай ансамбльсь, Саранск ошень «Луч» Культурань кудонь «Ламзурь» Народнай фольклорно-этнографическяй ансамбльсь, Рузаевскяй райононь «Тяштеня» центрань педагогонь «Тяштеня» фольклорнай коллективсь и ламотне лиятне, тяконь лувксса и башка морсихне.
Участникне няфтезь пряснон несколька номинацияса: идень, од ломанень ансамбльхне, ансамбльхне—25 кизода оцю исполнительхне, од ломанень солось, солось—19-25 кизоти молемс исполнительхне (ёмла формась) и стак тов.
Шить омбоце пялестонза азфтольхть сяськихнень лемсна. Гран-прить сатозе Пензенскяй областень Башмаковскяй райононь Межпоселенческяй центральнай районнай Культурань кудста «Артель» алянь Народнай фолк-ансамбльсь (коллективть руководителец Евгений Шлыков), тяка Культурань кудста «Рябинушка» рузонь моронь Народнай ансамбльсь, стане жа сувась сяськихнень лувксс.
Лия участникне арасть тя или тона степенень Дипломонь и Лауреатонь лемонь сатыкс.
Татьяна Альшина.