КОМСЬ КОЛМУВА КИЗА КЕНЯРТЬФНЕСАЗЬ ВАНЫХНЕНЬ МОРОСА

«Эх, мордовочка» Мордовия Республикань Народнай самодеятельнай ансамбльсь пуроптфоль Москуса 2002 кизонь февральста. Руководителец—Ковылкинскяй райононь Сире Борку велеса шачф-касф мокшавась Наталья Кувезенкова. Аф ваномок ширеса эрямать лангс, теенза и колма аканзонды-сазоронзонды—Татьяна Чумбаевати, Елена Чинилинати, Анна Ткачёвати удалась тиемс семейнай музыкальнай ансамбль, кона вов ни лама киза кеняртьфнесыне кулхцондыхнень моронзон мархта.
«Морось мархтонк эряфоньберьф. Васенда тядяньке, мзярда нинге нюрямсотолеме, морсесь тейнек. Касомок, тонадоськ мокшень кой-кона моротнень и тяряфтоме морсемс оцюфнень мархта. Эрямок Москуса, седиеньке лажаткшнесть ся кинятненди-яннятненди, конатнень ланга шабакс ласькондеме кяпе, а нинге—пянакудса аньцек пидеф-паньф рязы кшить танцти шиненцты. Илань шраньконь ваксса мороньке кайгсть фалу и хуш аф ламос мрдафнемазь шачема шири и идькс пингозонк. Москуса эряй ламоц мокшэрзятнень тяфтама лажадомась вятезень «Масторава» общественнай организацияти»,—мярьгсь Наталья Тимофеевна.
Акатне-сазорхне састь мяльс пуроптомс «Эх, мордовочка» ансамбль. Коллективсь ушедозе кинц ёмла аськолксста, но пингонь ётазь колганза кармасть содама кода Москуса, стане и Мордовияса. Ломаттне кулендезь мокшэрзянь, рузонь моротнень, а стане жа няендезь щамоньконь-карямоньконь, сотцесть коеньконь-обуцяньконь, культураньконь мархта. Ансамбльть пяк лама казнедонза. Сонь фалу учендсазь Ковылкинаса, Ковылкинскяй райононь Рыбкино велеса, лия вастса.
Мзярда кизефтине Наталья Кувезенковать сценати лисендемань щамснон колга, сон азозе, што ярмаконь ширде оцю лезкс макссихть мирдьсна. Кой-кона костюпнень сазорхне тиендьсазь одукс, эсь вийсост, лиятнень теест сташендсазь заказс коре.
«Эх, мордовочка» коллективсь канни Мордовия Республикань Народнай самодеятельнай ансамблень лем. Тянь сазорхне лувондсазь инь оцю казнекс! Коллективсь нолдась несколька диск—«Шачем крайняй», «Морак, морак, сазорнязе», «Эх, мордовочка» и лият. Лама вий савсь путомс тя тевти, аф кржа ярмак ётафтомс, но, мзярда тевсь тифоль—ульсь мезень лангс ваномс и мезе кулхцондомс.
Ансамбльсь кирди кеме соткст мокшэрзянь масторть мархта. Аф весть мокшаватне тернезь Москуву Мордовия Республикань Заслуженнай артисткать Любовь Князьковать, композиторть Василий Родионовонь и лиятнень.
«Тняра кизоста коллективоньконь эвондасть кельгиенза, конат ёрайхть повомс эрь концертти. Тя пяк кеняртьфти и няфнесы, што тиенттяма эрявикс тев. Мордовияса шачфне-касфне маряйхть гордость ёмла родинаснон инкса, малаткшнихть тейнек эрь выступленияда меле и азондыхть сюкпря. Сяда товга карматама тиендема тевоньконь»,—азозе Наталья Тимофеевна.
Коллективть улихть лопанянза и каналонза ламоц социальнай сетьтнень эса, коса можна мумс аф аньцек кулятнень, морафтомс колгаст, но и ваномс выступленияснон.
Татьяна АЛЬШИНА.