«Шумбрат, Мордовия!» Народнай творчествань ХХVII республиканскяй фестивальть мяльса кирдезь, 5 ноябрьста Саранскяйса, Культурань республиканскяй Дворецть сценанц лангса, отчётнай концертонц няфтезе Кадошкинскяй районць. Тяда башка, Дворецть омбоце этажсонза шиньберьф работасть декоративно-прикладной творчествань выставкатне, сяс ульсь мезе ваномс, няемс.
Кадошкинскяй муниципальнай райононь оцюнясь Андрей Чаткин сценать лангста азсь седиста моли валхт художественнай самодеятельностень коллектифнень и артисттнень, а стане жа залу пуромф ваныхнень лемс.
Районть программац каннесь «Кда азсазь «Родина» валть…» лем. Ушедсь сон «Родинать колга мороть эса» прологть театрализованнай вокально-хореографическяй композициянц эзда.
Сценать лангс лисендсть Адажень школань «Цятконя» ансамбльсь, «Чивгокскя» фольклорнай ансамбльсь, тяка школаста тонафнись Вероника Сайгина, кона морафтозе Раиса Орловать «Монь Мордовиязе» стихотворениянц, а стане жа «Сувенир» кштимань коллективсь, «Раздолье» вокальнай ансамбльсь, Кадошкинскяй муниципальнай райононь администрациянь «Новые голоса» ансамбльсь и лиятне.
Шумордавсь отчётнай концертсь «Раздолье» вокальнай ансамбльть, Владимир Домнинонь и концертонь сембе участникнень «Вместе за наших!» выступленияснон мархта.
Татьяна АЛЬШИНА.
Фототне Николай КАРАНОВОНЬ.