5 ноябрьста «Шумбрат, Мордовия!» Народнай творчествань XXVI республиканскяй фестивальть-конкурсть мяльса кирдезь отчётнай концертонц няфтезе Старошайговскяй районць.
«Россия от края и до края» концертнай программаса кштисть и морасть творческяй коллективонь 150 участниксь, конатнень ёткса 65 шабаль.
Концертть ушедомда инголе сембе пуромфненди лямбе валхт азсь Старошайговскяй райононь оцюнясь Г.А.Мухин, а сяльде сценать лангс фкя-фкянь мельге лисендсть артисттне.
Кода фалу, ваныхнень мяльснон салазе Сире Теризморгань народнай хорсь, кона няфтсь «Нума ланга» фольклорнай спектакльста пакш.
Мокшэрзянь народть морамань коензон-обуцянзон лац няфтезь Сире Теризморгань «Мокшаваня» коллективсь и Лемдяй велень «Синельга» ансамбльсь.
Кядень кайги цяпамаса васьфтьфтольхть «Лада» народнай ансамбльсь и «Мелодия» народнай инструментальнай ансамбльсь, а стане жа Старошайговскяй СОШ-нь учителень хорсь. Новотроицкяй Культурань кудть художественнай руководителец Алексей Гагарин седиень токазь моразе «Я русский» содаф мороть.
Лямбоста васьфтьфтольхть авторсь-исполнительсь Анатолий Мартынов, «Мечта» и «Восторг» кштимань коллектифне.
Кода ни азфоль вяре, концертнай программаса примась участия аф кржа шаба. Кеподсь мяль «Пайгонят» триось. Маша Овтинась, Дима Чудаев и Полина Тундайкинась весяласта морасть мокшень сиде моронят.
Аш кода аф лятфтамс Новотроицк велень «Девчата» и Богдановкань «Рябинушка» народнай ансамбльхнень, а стане жа «Надежда» вокальнай коллективть, конань мархта мораф «Молитва о России» морось токазе ваныхнень седи куцюняснон.
«Флаг моего государства» финальнай мороть залсь кулхцондозе стяда ащезь.
Старошайговскяй районть отчётнай концертоц козяль и мялень салаель аф аньцек моронь-кштимань, но и выставкань ширде. Эсонза эсь маштомошиснон няфтезь 82 мастерсь. Экспозициятненди пуроптфтольхть национальнай щапт-каряпт, сёвоньцта тиф кядьгот-месть, сёрматф нардамат, мокшекс щаф някат, мазоптомбяльхть и стак тов. Пуроптфоль военно-патриотическяй уженя, коса няфтьфтольхть военнай техникать эрь кодама материалста тиф моделенза и поисковикнень экспедицияснон колга презентациясь.
«Марятама гордость» акцияса-галереяса шабатне и культурань волонтёрхне тиендсть открыткат, коза эрти ульсь кода тяштемс Отечествань аралайхненди арьсеманзон. А «С теплотой и заботой» акциять пингста кочкафтольхть лямбе носокт специальнай военнай операциянь участникненди.