Ётай ваймама шитнень Культурань республиканскяй Дворецса тага кайгсть велень артисттнень вайгяльсна. «Шумбрат, Мордовия!» Народнай творчествань XXVIII республиканскяй фестивальть-конкурсть пингста эсь отчётнай концертснон няфтезь Торбеевскяй и Кадошкинскяй райоттне.
Ёткшиста, 26 октябрьста, республикань главнай сценась максфоль Торбеева аймаконь самодеятельнай творческяй коллектифненди и артисттненди. Концертнай программать ушедозе «Вечкума» од семейнай ансамбльсь, кона моразе «Кафта цёрат тише лядихть» содаф мороть. Отчётнай концертсост ламоль номерда, конат лемтьфт Родинати, семьяти, конатнень эса няфтьф шачема-касома масторти кельгомась, патриотизмась, Отечествань аралайхнень инкса гордостень марямась. Тяда башка, Торбеевань артисттне келиста няфтезь народнай койхнень-обуцятнень, обряттнень.
Недляшиста, 27 октябрьста, РДК-са ульсь Кадошкинскяй муниципальнай районть отчётнай концертоц. Сон ащесь колма пяльксста—семейнай, патриотическяй и национальнай. Сембе номерхне—стихне, моротне и кштиматне лемтьфтольхть ня вайжнай тематненди. «Чивгокскя», «Сувенир», «Раздолье», «Родные люди», «Ника», «Дуслык», «Шатлык» ансамбльхне, морсихне Дима Домнин и Дамир Вяльшин… Сембоц концертса примась участия 130 артист, инь ёмлати 5 кизот, сембода сирети—75. Кадошкинскяй районць аф оцю, но лама национальностень. Тяса ладязь эряйхть мокшетне, русне, татархне. Сембонь синь культурасна няфтьфоль выступлениятнень пингста.
Концертнай программада башка Торбеевскяй и Кадошкинскяй райоттне няфтезь декоративно-прикладной творчествань выставкаснон.