Кода содаф, тяниень пингть, мзярда вятеви украинскяй нацисттнень каршес специальнай военнай операциясь, Россиянь лама национальностень народть ёткса няевиста кемокстасть сембе ширдень сотксне. Оцю васта тяфта жа занцихть культурань сотксне, конат кемоксневихть аф фкя лацонь культуратнень ёткса.
Тянь ули кода азомс «Культурась—минь марстонь пространстваньке» телесетть колга, конань ётафтозе Саранск ошень Центральнай библиотекась Уфань Центральнай библиотекать мархта. Пингстонза Мордовия Республикань библиотекарьхне пачфтсть Башкирия Республикань библиотекарьхненди мокшэрзянь кунардонь и тяниень пингонь культурать колга, а сят—эсь культураснон, народснон и республикаснон колга.
«Культурась—минь марстонь пространстваньке» телесетть панжезь и вятезь Саранск ошень Центральнай библиотекань сотрудникне Евгения Глазкова и Инна Царькова.
Культурань межрегиональнай форумть ушетксса синь азондсть пуромфненди «Масторава» мокшэрзянь народнай эпость колга. Сяльде театрализованнай представлениянь вельде синь няфтезь пуромфненди эпость героензон—Нишке-пазть, Масторавать, Вармавать, Паксявать и лиятнень. Представлениять пингста телесетень вятихне пачфтсть эпосонь персонашнень тевснон и сянь колга, мезенкса теест эняльтькшнесть-пшкятькшнесть кунардонь пингонь мокшэрзятне.
Сяльде пуромфненди мокшэрзянь кунардонь пингонь фольклорть и тяниень пингонь поэзиять и прозать колга азондсь Саранск ошень централизованнай библиотечнай системать директороц Мария Денисова.
Тяда меле корхтафоль материальнай культурань эсь лацонь ширетнень колга, конат улихть эрь народонь национальнай культураса. А мокшэрзянь культураса васенце вастса, конешна, ащи авань щамсь. Сонь питненц и эсь лацонь ширензон колга пуромфненди азондсь Саранск ошень П.С.Кирилловонь лемса краеведческяй библиотекать заведующаец Нина Бояркина.
Культурань межрегиональнай форумть омбоце пялестонза Уфа ошень Центральнай библиотекань сотрудникне пачфтсть башкиронь национальнай культурать, литературать, авань и алянь щапнень, республикать и сонь сатфксонзон колга.
Межрегиональнай телесетть аделамста азфоль мяль пингонь ётазь ётафтомс культурань нинге фкя форум.
Владимир ИОСИФОВ.