«Кургоня» VIII-це Межрегиональнай фестивальсь ётафтовсь мялень салайста

«Кургоня» национальнай культурань I-це Межрегиональнай фестивальсь ётафтовсь 2015 кизонь 29 августста Рузаевскяй райононь Левжа мокшень велеса. Тя праздникти эстокиге максфоль гастрономическяй шире. Кода шарьхкодеви лемонц эзда, фестивалень главнай символкс кочкафоль модамарь мархта кургонясь.
Сяда тов «Кургонясь» ётафтовсь тяка райононь Сузгярьге мокшень велеса, коза сашендсть участникт и творческяй коллектифт аф аньцек Мордовиянь райоттнень эзда, но и Эстонияста, Финляндияста, а стане жа Карелияста, Удмуртияста и Нижняй Новгородста.
TURSTAT.COM порталть версиянц коряс, пуромкссь сувась Россиянь 2017 кизонь инь содаф гастрономическяй фестивалень 10-топненди. Тяда башка, тя праздниксь сувафтф событиянь федеральнай национальнай календарти.
2017 кизоня вяре азф фестивальсь ульсь Приреченскяй велень поселениянь Левженскяй посёлкать маласа кужеса. Кизода меле сяка вастса «Кургоня» национальнай культурань IV-це Межрегиональнай фестивальсь примазе нинге фкя пяк оцю праздникть—«Шумбрат!» Межрегиональнай национально-фольклорнай праздникть-фестивальть, сяс инжихне и сембе пуромфне ульсть «Шумбрат, Кургоня!» лем ала Межрегиональнай национально-фольклорнай праздникса-фестивальса.
2019 кизоня «Кургоня» национальнай культурань V-це юбилейнай фестивальсь 25 августста тага пуропнезень инжихнень Приреченскяй велень поселениянь Левженскяй посёлкать малас.
Кирдемок мяльса коронавирусть, 2020-2021 кизотнень фестивальсь ётафневсь онлайн-форматса.
Тядде «Кургоня» инжиень примама машты мокшэрзятнень VIII-це Межрегиональнай фестивальсна ульсь 28 августста тонатф вастса—Приреченскяй велень поселениянь Левженскяй посёлкать маласа.
Россиянь нароттнень народнай искусствань и аф материальнай культурнай наследиянь кизостост фестивальсь арась пяк питни, кунара учсеф казнекс Рузаевкаста, Саранскяйста, Мордовиянь лия райоттнень, лия региоттнень эзда саф инжихненди. Тяда башка, тя шиня отмечафоль Рузаевскяй районть 94 кизонь топодемац.
«Кургонять» официальнай ушедомац азфоль шить кучканцты, но нинге шобдава ушедсть работама Мокшэрзянь пирьфсь, Мастерхнень ульцясна, Лама нациянь кужесь, колма Спаснень ярмаркасна, Литературнай кужесь, Зоо-кужесь, Идень ошкясь, Налхксемань кужесь, Шумбрашинь кужесь…
Тяддень фестивальть пингста Ёмла сценаса ётафтовсть «Кургоняша кочкси ялгат» идень творчествань фестивальсь, «Бабатнень фестивальсна» семейнай творчествань фестивальсь-конкурссь, М.Н.Антоновать лемса народнай моронь фестивальсь-конкурссь.
Сембе вастова кулевсть тердемат, весяла морот, фестивальть программац арьсефоль мялень салайста. Моронь и хореографическяй казнеснон казендезь фольклорнай коллектифне, башка морайхне.
Шить кучкаста главнай сценать лангса ётафтовсь «Кургонять» торжественнайста панжевомац.
Тяда инголе Мордовия Республикань Оцюнясь А.А.Здунов, Мордовия Республикань Государственнай Собраниять Председателец В.В.Чибиркин, Рузаевскяй райононь оцюнясь А.Б.Юткин ванозь «Кургонять» площадканзон, корхнесть самодеятельнай артисттнень мархта. Башка мяль шарфтсть 60 килограммань сталмоса и 1,5 метрань келеса пяк оцю кургонять—фестивальть «седи куцюнянц» лангс.
Национальнай тя ярхцамбяльть пидезь-панезь Рузаевкаса ИП Екатеринин П.А. кшинь панцемань предприятияса. Фестивальть панжемдонза меле сонь варжазь пуромф сембе инжихне.
«Кургонять» главнай сценазонза тертьфоль Мордовия Республикань Оцюнясь А.А.Здунов, кона азозе, што тя фестивальсь кемоста сотф шить, лямботь, цебярть мархта.
—Содаса, сон арай сядовок оцюкс и инжиень примайкс. Ванфтсаськ национальнай культураньконь и ётафтсаськ сонь аф фкя сяда кизонь пачк,—мярьгсь Артём Алексеевич.
Сон азсь мяль сувафтомс «Кургонять» республиканскяй праздникнень календарезост.
Республикань Оцюнясь казсь государственнай казнет Рузаевкань и тя райононь эряйхненди социально-экономическяй касфтомаса-виияфтомаса оцю сатфксонкса.
Сяда тов поздравляндамань валхт азсть и казнет казсть Мордовия Республикань Государственнай Собраниять Председателец В.В.Чибиркин, Рузаевскяй райононь оцюнясь А.Б.Юткин.
Меле фестивалень участникне и инжихне шарсть оцю кувака хороводса.
Сяльде ушедсь фестивальнай праздничнай концертсь. Сембе пуромфненди цебярь казнекс арась «Сорока» народнай ансамбльть концертоц. Творческяй тя коллективсь сашендсь Великай Новгород ошста.
Кода и эрь «Кургоняти», тяддевок тя фестивальти пидефоль-паньфоль модамарь мархта оцю кургоня, конань колга пачфтеме ни. А сяда ёмла кургонят и национальнай лия ярхцамбяльхть ульсть пирьфнень эса, коса пидемань-панемань маштомошиснон няфтезь Рузаевскяй райононь велень поселениятне.
Шоподемс мольсь «Кургоня» инжиень примама машты мокшэрзятнень VIII-це Межрегиональнай фестивальсна. И ётафтовсь сон мяляфтовиста, мялень салайста.
Т.Альшина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...