Лама тевса сафтсы мокшавась В.И.Пронина

Старошайговскяй райононь Сире Теризморга велеса шачф-касф, а тяни Саранскяйса эряй мокшавать Вера Ивановна Пронинать лемоц лац содаф аф аньцек ёмла родинасонза и республиканьконь столицаса, но и лама лия вастова. 2002 кизоста сявомок В.И.Пронина работай А.С.Пушкинонь лемса Национальнай библиотекаса национальнай и краеведческяй литературань отделонь главнай библиотекарькс. Тяда инголе ниле кизот работась учителькс Старошайговскяй райононь Конопать велень школаса, коза сась М.Е.Евсевьевонь лемса Мордовскяй государственнай педагогическяй институтть шумордамдонза меле.

Библиотекаса Вера Ивановна работай комсь кизода ламос, тя пингста няфтезе прянц тевонь содай специалистокс. Машты кинянь-яннянь вешема эрь морафтыть, книганкса эрь сайть седис. Мокшавась—эсь кялень, коень-обуцянь афкуксонь патриот, работацка сотф национальнай и краеведческяй литературать мархта. В.И.Пронина лац тонадозень фондть ванфтоманц и комплектованиянц мархта сотф тефнень, маркетинговай ширетнень и информационнай од технологиятнень эряфс сувафтомаснон. Штоба аф лотксемс сатфть лангс, фалу касфнесыне содамошинзон, якай ламоц семинархненди.
Уликс опытонц и содамошинзон Вера Ивановна Пронина маштозь нолясыне тевс выставкатненди, библиографическяй обзорхненди, радио- и теле-информациятненди, библиотекать сайтс информациятненди, электроннай презентациятненди анокламста.
Мокшавать сидеста ули кода няемс «Од пинге», «Сияжар» национальнай телеканалхнень и передачатнень эса, конатнень пингста Вера Ивановна лочазь-лочай мокшень кяльса и кепсесыне тячиень шинь инь эрявикс кизефкснень. Сельмотне аф явфтовихть мокшень щамонзон-карямонзон эзда.
Мокшэрзянь литературать сядовок содафокс тиеманц и оцю вастс кеподеманц инкса главнай библиотекарсь В.И.Пронина ётафни мокшэрзянь писательхнень и поэттнень юбилейснонды лемтьф пуромкст: творческяй илятть, литературнай васедемат и стак тов. 2019 кизоня Вера Ивановна ётафтсь 26, 2020—24, 2021—21 тяфтама пуромкс.
Сонь участиянь примаманц вельде аноклафтольхть «Девин Илья Максимович», мокшень содаф писательть М.Л.Сайгинонь 105 кизонцты лемтьф «Эсь народонь эряфонь сёрмады» библиографическяй указательхне, «А.С.Пушкинонь лемса национальнай библиотекась» путеводительсь мокшень кяльса, М.А.Бебанонь творчестванц коряс «Тяштец тячемс палы» методико-библиографическяй материалсь и ламось мезсь лиясь. Мокшавать материалонза лисендихть «Мокшень правда» газетаса, «Мокша», «Народное образование» журналхнень эса.
Вера Ивановна Пронина примась участия Ханты-Мансийск ошса ётафтф финно-угорскяй нароттнень V международнай конгрессост, межрегиональнай, республиканскяй ламоц конференциятнень и семинархнень эса. Азсаськ аньцек кой-конатнень эздост: «Мир книг на пензенской земле» книгань Межрегиональнай выставкась-ярмаркась, «Шумбрат, Подмосковье!» Московскяй областень национальнай культуратнень I фестивальсна. А стане жа примась активнай участия Мокшэрзянь народть VI съездонц, Россиянь финно-угорскяй нароттнень Ассоциацияснон VII съездонц и лия оцю пуромкснень ётафтомасост.
Аш кода аф лятфтамс сянь, што мокшавась Вера Ивановна Пронина—Девинскяй лувоматнень пуроптыснон-организаторснон эзда фкясь. Сон фалу оцю мяльса якай Сире Теризморгав ня лувоматненди, а стане жа Атюрьевскяй райононь Кяшалу—Малькинскяй, Рузаевскяй райононь Сузгярьге вели—Ельмеевскяй лувоматненди.
Аф кржа тиенди «Гордость нации», «Мордовия мастеровая: история и современность» республиканскяй культурно-образовательнай проекттнень мяльса кирдезь пуромкснень ётафтомаснон инкса, няевомшка путксоц «Этношкола в библиотеке» республиканскяй образовательнай проектть работазонза.
Сон аф весть якась «Волгась—миронь ляй. Волжскяй нароттнень культураснон диалогсна» Международнай этнокультурнай экспедицияс-фестивальс. Экспедициятнень пингста няфтезе А.С.Пушкинонь лемса Национальнай библиотекать работанц мокшень, эрзянь кяльхнень и мокшэрзянь литературать ванфтомаснон коряс.
Ламотненди Вера Ивановна Пронина содаф кода общественница. Сон—Мордовскяй (мокшень и эрзянь) народть Межрегиональнай общественнай организациянц Исполкомонц членоц, «Юрхтава» мокшень аватнень Ассоциацияснон правлениянц советонц членоц. Тя Ассоциациять видеса самай пуроптови фольклорнай ансамбль, коза мокшавась сувась оцю мяльса. Тяда башка, сон вов ни лама киза морси «Ламзурь» народнай фольклорно-этнографическяй ансамбльса. Самай тя коллективса няфтезе морама маштыень асувонц.
Цебярьста, маштозь, седикс-ваймокс работаманкса В.И.Пронина 2008 кизоня казьф Мордовиянь Культурань министерствать Почётнай грамотанц, 2016 кизоня—Мордовия Республикань Госсобраниять Председателенц Благодарностенц мархта, 2020 кизоня—«Межнациональнай согласиянкса» юбилейнай медальса и лама лия казнеса.
Аф кунара Ковылкинаса ётафтфоль «Шумбрат» Межрегиональнай национально-фольклорнай праздниксь. Пингстонза Мордовия Республикань Оцюнясь А.А.Здунов казезе В.И.Пронинать оцю казнеса—газетаньконь цебярь ялганцты максфоль Мордовия Республикань культурань Заслуженнай работниконь лем. Мезть мархта сонь седи ваксста поздравляндасаськ!
Кода азозе корреспондентоньконди Вера Ивановна, общественнай работась и культурнай эряфсь пяк малат теенза. Синь, кле, пцтай ряцок ащихть библиотекаса работазень мархта. Сембе ня тефненди Вера Ивановна малаткшни оцю ответственностень марязь, путнемок тянди седиень лямбонц.
Кудса сон кельгома рьвя и тядя. Мирдец, Андрей Викторович, покоди строительнай организацияса строителькс. Цёрасна, Антон Андреевич, шумордазе М.Е.Евсевьевонь лемса Мордовскяй государственнай педагогическяй институтть «Тренер» специальностть коряс. Работай Саранскяйса лёгкай атлетикать коряс тренеркс—тонафтсыне спортонь тя видти иднятнень.
В.И.Пронина лувондсы эсь прянц павазу ломанькс. «Павазсь—тя мзярда шобдава кенярдезь молят работама, а илять кенярдезь мрдат куду»—содаф ня валхне кунара арасть теенза эряфонь девизкс.
Т.Альшина.

Последние новости

В Мордовии открылись новые благоустроенные зоны отдыха

В Мордовии в этом году открылось сразу 7 новых...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные...

Нацпроект помогает бизнесу Мордовии стать узнаваемым и привлекать новых клиентов

Министерство экономики, торговли и предпринимательства РМ совместно с Центром...

Дан старт приемной кампании по программам «Профессионалитета»

В Мордовии начинается приемная кампания в колледжи и техникумы...

Нацпроект помогает семейному бизнесу Турбиных из Мордовии 

Министерство экономики, торговли и предпринимательства РМ совместно с Центром...

В Мордовии модернизируют службу занятости

Мордовия вошла в число пилотных регионов комплексной модернизации службы...

В Мордовии открылись новые благоустроенные зоны отдыха

В Мордовии в этом году открылось сразу 7 новых пляжей. Средства на их благоустройство были предоставлены предпринимателям республики в качестве грантовой поддержки. Работы велись...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром «Мой бизнес» оказывает поддержку предпринимателям Мордовии. Так, благодаря реализации национального проекта «Малое и среднее предпринимательство...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные дороги» в 2024 году будет капитально отремонтировано порядка 14 км дорог. В мае начались работы на...