«ЛИХТИБРЯСЬ» КЕНЯРТЬФНЕСЫНЕ ЛУВИХНЕНЬ

Ковылкинскяй райононь «Голос Примокшанья» газетать видеса лисенди мокшень кяльса «Лихтибря» лопанясь. Сонь аноклакшнесы А.И.Алямкин, мокшэрзянь народть межрегиональнай общественнай организациянц Ковылкинскяй отделениянц председателец. «Лихтибрясь» лисенди пяк интереснайста, мялень салайста. И сон кельговсь райононь мокшень кяльса лувихненди. Лопаняса азонкшнихть мокшень трудонь кельги ломаттнень, велень козя койхнень-обуцятнень, щапнень и ламонь лиянь колга. И пяк пара, што аф юкснесазь мокшень кяльса сёрмадыхнень. Аф весть макссевсть А.И.Алямкинонь сонцень стихонза.
Мекольце «Лихтибрясь» лиссь 24 октябрьста и лемтьф мокшень содаф поэтти, Россиянь Писателень союзонь члентти, Ковылкинань эряйти П.В.Алёшинати, конанди аф кунара топодсь 75 киза. «Лихтибряса» лятфневи Полина Владимировнань биографияц. Печатлаф «Эсь седицень кизефтьк» сёрматфоц, стихонза: «Тята яка, цёра, мельган», «Казендеда аватненди панчфт», «Аф сяськови Россиясь», «Кучт васенда кудат», «Кадок корхтайхть аяш кельгома», «Свадьбада меле». Ковылкинскяй райононь лувити ули мезе морафтомс лопаняста.
«Лихтибрянь» смекайти-ноляйти арьсетяма оцю творческяй сатфкст. Сон сонцьке сёрмады ломань. А.И.Алямкинонь стихонза аф весть лисендсть «Мокшень правдаса», «Мокша» журналса. Сон кунардонь ялгац тядянь-алянь кяльса лисенди газетать. Учтама эздонза од произведеният.