Мокшавась, патриотсь, газетаньконь кунардонь ялгац Полина Владимировна Алёшинась—Мордовия Республикань Заслуженнай поэт. Улема, аш мокшень стама ломань, конань библиотекасонза афоль уле стихонь хуш фкя сборникоц. Эрь стихотворенияц, нльне эрь стихонь валрисьмоц пачкотькшни морафтыть ваймос. Улема, сяс, мес сонць поэтсь ётафнесы сонь седиенц пачк.
Полина Владимировнань мархта васьфтемась, да и телефонца корхнемась, арси аф оцю праздникокс, эрь шинь тефнень-заботатнень эзда ваймамакс. А стихонь сборниконц лисемац уленди марстонь кенярдемакс творчестванц кельгиензонды.
Мокшэрзянь книжнай издательстваса лиссь П.В.Алёшинать «Шачема крайнязти сюконян» стихотворениянь сборникоц. И вов тага кеняртьфти куля! Тяка издательствась нолдазе тя сборникть нинге весть—тяни аудиокнига лаца.
Мокшэрзянь книжнай издательствань звукозаписень студиясь панжевсь меля и ся пингста сявомок ушедовсь мокшэрзянь писательхнень аудиокнигаснон сёрмадомасна.
Ёфси аф кунара шумордафоль П.В.Алёшинать «Шачема крайнязти сюконян» мокшень кяльса аудиокниганц сёрмадомац.
«Вайгяль» стихонзонды макссь сонць авторсь—Мордовия Республикань Заслуженнай поэтсь П.В.Алёшина.
Мокшэрзянь книжнай издательствать сайтсонза азф, што аудио-книгась кайги 6 частт.
Улема, ламотнень эвондай мяльсна сюконямс шачема ширети Полина Владимировнань мархта.
Аудиокнигась кармай мишендевома Саранскяйса «Масторава» лавкаса.
Т.АЛЬШИНА.